I le tausaga 2020, na tutupu ai le tele o mala faalenatura ma na amata pepesi ai foʻi i le lalolagi le faamaʻi o le KOVITI-19. Na faapefea ona fesoasoani Molimau a Ieova iā i latou na aafia?

 I le tausaga faaleauaunaga a 2020, na faamaonia ai e le Komiti o Sooupu a le Vaega Pule le faaaogāina o le 28 miliona tālā b, e fesoasoani ai iā i latou na aafia i mala. O lenā fesoasoani na maua e i latou na aafia i mala e sili atu ma le 200, e aofia ai le KOVITI-19, o afā, le lologa i Aferika, le oge i Venezuela ma le lāmala i Zimbabwe. O lenā tupe na maua mai i foaʻi tauofo na faaaogā e faatau ai meaʻai, vai, mea e nonofo ai, lavalava, togafitiga faafomaʻi, fasimoli ma vailaau e faamamā ai mea, faapea le toe faaleleia ma le toe fausia o fale. Seʻi mātau nisi o faaaʻoaʻoga o na galuega laveaʻi.

 KOVITI-19. I le lalolagi aoao, ua aafia le soifua mālōlōina o o tatou uso ma tuafāfine, o latou itu tau faalogona ma lo latou tamaoaiga, ona o le faamaʻi. E silia ma le 800 Komiti o Fesoasoani mo Mala na faatulaga i le lalolagi aoao, ina ia saunia ai le fesoasoani. O nei komiti na gafa ma le vaavaaia o manaʻoga o tatou uso, ma na latou saunia vave lipoti e fesoasoani ai i le Komiti o Sooupu a le Vaega Pule e iloa le auala sili e avatu ai le fesoasoani laveaʻi.

 A o faagasolo le tausaga, na fesoasoani le Komiti o Fesoasoani mo Mala i le toʻatele e avatu i ai meaʻai, vai, mea e faaaogā mo le fufuluina o lima ma vailaau faafomaʻi. I nisi vaipanoa, na galulue faatasi le Komiti o Fesoasoani mo Mala ma toeaina e fesoasoani i uso ia maua foaʻi mai i le malo.

 Na mātauina e tagata e lē o ni Molimau a tatou galuega laveaʻi. O se faaaʻoaʻoga, o Field Simwinga o le komesina o le itumalo o Nakonde, i Zambia. Na ia faapea atu i o tatou uso: “E matou te matuā lotofaafetai ona o le fetaui lelei o le taimi e aumai ai la outou fesoasoani ma le manaʻomia e aiga na aafia.”

 Le Oge i Angola. Ona o le faamaʻi o le KOVITI-19, ua utiuti ai meaʻai ma ua sii ai le tau o meaʻai i Angola. O lea, ua lē gafatia ai e le toʻatele o tatou uso ma tuafāfine ona faatau meaʻai.

 Na talosagaina le fesoasoani a le Lālā i Pasili ina ia auina atu ni pusa meaʻai mo o tatou uso i Angola. Ina ia faaaogā tatau foaʻi tauofo, na iloilo lelei ai e uso le auala sili e faatau ma auina atu ai meaʻai. O lea, na faatau siiatoa ai meaʻai. O pusa meaʻai taʻitasi, e pe ā ma le $22 le tau e aofia ai ma le tau e auina atu ai i le vaa. E toeitiiti 20 kilokalama (44 pauna) le mamafa o le pusa meaʻai e tasi, lea e iai totonu araisa, beans ma fagu gaʻo. E 33,544 pusa meaʻai na auina atu i le vaa, e tusa lona mamafa ma le 654 meta tone (721 U.S. tone). O nei fesoasoani ma meaʻai na maua ane i Angola na mafai ona fafaga ai le silia ma le 50,000 tagata.

 O ā faalogona o tatou uso i nei fesoasoani? Ua faapea mai Alexandre e nofo i se nuu maotua o Angola: “O se tasi lenei o faamaoniga o le alofa o Ieova iā te aʻu ma e na te lē tuulafoaʻia aʻu. E tāua aʻu i le faalapotopotoga a Ieova!” Ua faapea mai se tinā nofo toʻatasi e igoa iā Mariza: “Na tali mai Ieova i oʻu mafatiaga. Ou te matuā faafetai iā te ia ma lana faalapotopotoga!”

 Fesoasoani mo i latou na aafia i le lāmala i Zimbabwe. I le tausaga faaleauaunaga 2020, na tupu ai se lāmala i Zimbabwe ma na matuā fia ʻaai ai lava le faitau miliona o tagata. E faitau afe Molimau na aafia ona o le utiuti o meaʻai.

 O lea, e lima Komiti o Fesoasoani mo Mala na faatulaga ai, ina ia saunia meaʻai mo o tatou uso. E faitau selau le ʻautalaʻi na fesoasoani i le tuuina o meaʻai i pusa, utaina o meaʻai i taavale ma na ofo atu foʻi e faaaogā a latou taavale. c I le tausaga faaleauaunaga 2020, na faaaluina ai le $691,561 e fafaga ai le silia ma le 22,700 tagata!

 O nisi uso ua leai ni meaʻai i le taimi na taunuu atu ai le fesoasoani. Ae ina ua taunuu atu meaʻai, na vivii o tatou uso iā Ieova, a o nisi na amata ona latou usuina pese o sauniga.

 I se isi vaipanoa, na auai ai ni tuafāfine Molimau ua maliliu a la tane i se fono na talanoaina ai se fesoasoani tau meaʻai na ofo atu e se faalapotopotoga. Peitaʻi, na iʻu ina faapolotiki le fono. O lea, e leʻi taliaina ai e tuafāfine mea na latou faapea mai e fai muamua faatoʻā maua ai se fesoasoani. A o tuua e tuafāfine le fono, na taufaifai atu tagata ma fonō atu: “Aua la neʻi lua toe ō mai e suʻe meaʻai mai!” Peitaʻi, i le lua vaiaso mulimuli ane ai, na taunuu atu ai o tatou uso ma meaʻai mo o tatou tuafāfine a o leʻi taitai oo atu le faalapotopotoga lea na ofo atu la latou fesoasoani.

 Na avatu ai foʻi se molimau lelei ona o fesoasoani mo i latou na aafia i mala i Zimbabwe. O se faataʻitaʻiga, o le mea na tupu iā Prisca lea e nofo i se nuu laʻitiiti. E ui i faigatā ona o le lāmala, ae na faaalu e Prisca Aso Lulu ma Aso Faraile taʻitasi e talaʻi ai e oo lava i le vaitau e suōtosina ai le fanua. Na ulagia Prisca e tagata o lona nuu ma faapea atu: “O le a matuā fia ʻaai lou aiga ona o lau talaʻiga.” Ae na tali atu i ai Prisca: “E leai ma se auauna a Ieova ua fiaʻai.” E leʻi leva talu ona tupu lenā mea, ae maua loa e Prisca le fesoasoani mai i la tatou faalapotopotoga. Na matuā maofa nisi o tuaoi o Prisca ma faapea atu: “E lē tuulafoaʻia oe e le Atua, o lea, e matou te fia iloa o ia.” Ua toʻafitu nei tuaoi o Prisca ua faalogologo i sauniga e faasalalau i le leitiō.

 A o tatou latalata atu i le iʻuga, o le a tatou fesagaʻia pea mala faalenatura. (Mataio 24:3, 7) E matuā talisapaia auala eseese na faia ai au foaʻi tauofo i le donate.pr418.com. Ua mafai ai ona saunia fesoasoani aogā i le taimi talafeagai.