Iā Ianuari 2021, na faasilasila mai ai e le Vaega Pule le tatala aloaʻia o se lomiga fou e faaaogā e suʻesuʻe ai le Tusi Paia, e taʻua Se Olaga Fiafia e Faavavau! a O ā ni ou faalogona e faatatau i lenā faasilasilaga? Ua faapea mai Matthew mai i Kanata: “Na ou matuā fiafia lava! Na faateleina loʻu fiafia i le taimi na faia ai lauga ma faaali vitiō, na faamatala ai māfuaaga na saunia ai lenei lomiga ma le auala na faataʻitaʻi ai ona faaaogā. Na ou matuā naunau lava e maua saʻu kopi o le tusi, ma amata loa ona faaaogā.”

 Na faailoa mai i le tusi Se Olaga Fiafia e Faavavau!, se auala fou e faia ai suʻesuʻega faale-Tusi Paia. Peitaʻi, e lē na o le pau lenā o le eseesega i le lomiga fou lenei, ma isi lomiga na faaaogā muamua mo suʻesuʻega faale-Tusi Paia. Pe a e faaaogāina se kopi ua lomia o le tusi Se Olaga Fiafia e Faavavau!, atonu e te mātauina ai le mataʻina o le auala na saunia ai. O lea, seʻi o tatou iloiloina le auala na saunia ai lenei tusi.

 E mafiafia laupepa. Aiseā na talafeagai ai le faaaogāina o na ituaiga pepa? E silia i le 600 ata felanulanuaʻi o loo i le lomiga Se Olaga Fiafia e Faavavau! O lona uiga, e toetoe sefulu taimi e sili atu ai ona tele ata i lenei lomiga, nai lo o le tusi Aʻoaʻoga Mai i le Tusi Paia. E tele foʻi avanoa i itulau o lenei lomiga e lē o iai ni upu po o ni ata, e mafai ona faia ai ni faamaumauga. Peitaʻi, ua tulaʻi mai ai se faafitauli: Pe a manifinifi le pepa, o le a mafai ona iloa atu ai ata o loo i le isi itulau. Ina ia ʻalofia lenā faafitauli, na faataʻitaʻi ai e uso i le International Printing Department (IPD) i Wallkill i Niu Ioka i le Iunaite Setete o Amerika, ni ituaiga o pepa se fā lea o loo faaaogāina i a tatou fale lomitusi. Na iloiloina e le Komiti o Tusitusiga a le Vaega Pule na pepa taʻitasi, ma filifili ai le pepa e sili ona latalata i le pepa o loo manaʻomia. E ui lava e 16 pasene e sili atu ai le tau o lenei pepa nai lo o le pepa o loo faaaogā i le tele o a tatou lomiga, ae o loo mafai e le tagata aʻoga ona faitau i itulau taʻitasi o Se Olaga Fiafia e Faavavau!, e aunoa ma le faalavelavea o lana vaai i ata o loo i le isi itulau.

 Le ituaiga o laminate na faaaogā mo le faavaa. Pe a e tago i le faavaa o le lomiga fou, e te iloa le eseesega mai i faavaa o isi a tatou lomiga, ona o loo iai se mea o loo puipuia ai le faavaa mai i le faaleagaina (protective film). Nai lo o le faaaogā o le normal gloss laminate mo le faavaa, ae ua faaaogā le matte laminate ina ia matilatila mai ai le ata o loo i le faavaa. Talu ai e tele ina faaaogā lenei lomiga, e fesoasoani foʻi le matte laminate e puipuia ai le tusi mai i le faaleagaina. Peitaʻi, e lima taimi e sili atu ai le taugatā o lea faiga, nai lo o le gloss laminate. O lea, na galulue faatasi ai le tele o lālā ina ia faatau mai se matte e itiiti le tupe e alu ai.

 Aiseā na faaaogāina ai nei mea e ui i le taugatā? Ua faamatala mai e se uso e galue i le IPD: “E matou te faatalitalia e faaaogā lelei lenei lomiga. O lea, na matou taumafai ai ina ia faatumauina pea le matagofie o foliga o le lomiga, e tusa po o le ā le tele o taimi e faaaogā ai.” Ua faapea mai Eduardo, o sē e galue i le ofisa lomitusi a le lālā i Pasili: “Ua matou matuā lagona le fiafia i le vaaia o le auala o loo faaaogā ai e le faalapotopotoga a Ieova mea e sili ona lelei, ina ia matagofie, umi ona lelei, ma faigofie ona faaaogā lenei tusi, ae i le taimi e tasi o loo faaaogā tatau foaʻi tauofo.”

 Na amata ona lomia le lomiga Se Olaga Fiafia e Faavavau!, iā Mati 2021. O le taimi lenā o le Koviti-19, ma na tulaʻi mai ai ni luʻi. Talu ai na tapunia Peteli, e leʻi mafai e uso ma tuafāfine na galulue tausāvali i le Peteli ona toe galulue i fale lomitusi, ma e leʻi mafai foʻi ona toe valaaulia ni uso fou e auauna i le Peteli. O lea, e leʻi lava ni tagata e galulue i nisi fale lomitusi, a o isi fale lomitusi na tapunia mo se taimi lē tumau ona o faasāsāaga a malo.

 Na faapefea ona foʻia na faafitauli? Ina ua mafai ona toe faaaogā fale lomitusi, na tofia uso ma tuafāfine mai i isi matagaluega o le Peteli ina ia fesoasoani i fale lomitusi. Ua faapea mai Joel o sē e galue i le IPD: “O lo latou agaga faataulaga ma lo latou lotomalilie e aʻoaʻo ni galuega fou, na matuā aogā i le faataunuuina o le galuega lomitusi.”

 E ui i luʻi, ae ua mafai ona matou lomiaina le faitau miliona o kopi o le tusi Se Olaga Fiafia e Faavavau! O le saunia o nei tusi, na manaʻomia ai le tele o mea e pei o ʻapa na faaaogā e lolomi ai lomiga (printing plates), laminate film, pepa, vaitusi, ma kelū. I masina muamua e lima talu ona lolomi le tusi, e silia i le $2.3 miliona tālā Amerika na faaaogā mo na o mea na saunia ai le tusi. Ina ia faaitiitia tupe faaalu, na matou lolomiina ai na o tusi e manaʻomia moni e faapotopotoga.

 O ā faalogona o faiaʻoga o le Tusi Paia ma a latou tagata aʻoga e faatatau i lenei tusi? Ua faapea mai Paul, o se uso i Ausetalia: “E ese loʻu fiafia e faaaogā le tusi Se Olaga Fiafia e Faavavau!, ma ou te tulimataʻia taimi e faia ai aʻu suʻesuʻega faale-Tusi Paia. E ese le matagofie o le auala e faatulaga ai vaega taʻitasi o le tusi. E faigofie ai foʻi ona fefaasoaaʻi le faiaʻoga ma le tagata aʻoga i manatu mai i le Tusi Paia. E manino faamatalaga o loo iai, o fesili faatupu manatu, vitiō, ata, siata, ma sini mo le tagata aʻoga. O se tusi e matuā mataʻina, e uunaʻia ai aʻu ina ia faaleleia le auala e aʻoaʻo atu ai.”

 Ua faapea mai se tagata aʻoga o le Tusi Paia i le Iunaite Setete: “Ou te matuā fiafia i le tusi fou. E fesoasoani ata o loo iai ou te malamalama ai i manatu autū. E pāʻia loʻu loto i vitiō, ma uunaʻia ai aʻu e faia se gaoioiga.” E faalua i le vaiaso ona faia suʻesuʻega a lea tagata aʻoga, ma e auai e lē aunoa i sauniga a le faapotopotoga.

 E faitau miliona kopi o le tusi Se Olaga Fiafia e Faavavau!, e leʻi lomiaina i le tele o gagana. O le mea moni, ua faamaonia e le Vaega Pule le lomiaina o lenei tusi i gagana e 710. O lona uiga, e 340 gagana e sili atu ai nai lo o gagana na lomiaina ai le tusi Aʻoaʻoga Mai i le Tusi Paia.

 Ua faapefea ona faatupeina le lolomiina o lenei tusi? E ala i foaʻi tauofo mo le lalolagi aoao, lea ua tele ina faia e faaaogā ai le donate.pr418.com. E matou te talisapaia lo outou agaga limafoaʻi, lea ua fesoasoani i le sauniaina o nei lomiga e faia ai suʻesuʻega faale-Tusi Paia ma i latou e mananaʻo e aʻoaʻo e faatatau iā Ieova, ma ʻfiafia i le olaga e faavavau.’—Salamo 22:26.