Ua sili atu ona tele meaʻai faaleagaga ua maua e Molimau a Ieova i masini faaonapōnei i le taimi lenei, nai lo o le taimi muamua. Ae i nisi vaega o le lalolagi, e lē o gafatia e o tatou uso ona maua le initaneti. O nisi e nonofo i vaipanoa e motusia soo ai le initaneti, e lē saoasaoa le initaneti, po o le matuā leai lava o se initaneti e maua.

 E ui i lea, e toʻatele o tatou uso ma tuafāfine ua mafai nei ona kopi a latou lomiga i masini faaonapōnei e tusa lava pe leai se initaneti. Ua faapefea ona tupu lenei mea?

 O le JW Box o se tamaʻi pusa o mea e manaʻomia, ua saunia mo faapotopotoga o loo faigatā ona o latou mauaina le initaneti. E aofia ai i totonu o lenei tamaʻi pusa se masini e mafai ona fesootaʻi ai i le initaneti na faatauina mai i se kamupani faipisinisi, o se polokalame na tuufaatasia e le Matagaluega o Komepiuta i le Peteli, ma lomiga ma vitiō o loo i le jw.org. O le tau o le pusa e tasi e tusa lea ma le $75 tālā Amerika.

 I le Maota mo Sauniga, e faaaogā ai e uso ma tuafāfine le initaneti mai le JW Box e kopi mai ai lomiga ma vitiō i a latou telefoni ma masini faaonapōnei. E oo lava foʻi iā i latou ua tuai a latou masini pe o faaaogā ni masini e taugofie, e mafai lava ona latou kopiina lomiga ma vitiō. Ae e faapefea la ona maua lomiga fou i le JW Box, pe afai e faigatā ona maua e le faapotopotoga le initaneti? E mai i lea taimi i lea taimi, e avatu ai e le lālā ni USB, e pe ā ma le $4 tālā Amerika le tau o le USB e tasi, lea ua iai mea fou mai i le jw.org ina ia tufatufaina atu i isi e faaaogā ai le JW Box.

 Na faapefea ona fesoasoani le JW Box i o tatou uso? Ua faamatala mai e Nathan Adruandra, o se tamā e nofo i le Malo Faatemokalasi o Congo e faapea: “Ua leva ona ou taumafai e kopi ia ata o le ʻIeova e, . . . Ou te Faatuatua Atu iā te Oe’ ma le Ia Manatua le Avā a Lota, ae e leʻi mafai lava, ma e na ou lotovaivai ai. O lea la ua mafai nei ona ou kopiina nei vitiō i laʻu telefoni, ma ua fesoasoani iā i maʻua o ni mātua e faaleleia le auala e aʻoaʻoina ai le ma fanau.”

 Na faapea mai se uso o loo fesoasoani i le faapipiiina o JW Box mo le faaaogāina e faapotopotoga i Nigeria: “E manatu uso o le JW Box o se meaalofa faapitoa mai iā Ieova. Ua matuā fiafia lava ona ua faigofie nei ona o latou kopiina lomiga ma vitiō mai a tatou Meafaigaluega mo le Aʻoaʻo Atu.”

 E silia ma le 1,700 pusa ua uma ona auina atu i o tatou uso i Aferika, Oceania, ma Amerika i Saute, ma e o loo faagasolo fuafuaga mo le auina atu o nei fesoasoani i le tele o isi faapotopotoga. Ua faapefea ona faatupeina lenei fuafuaga? E ala i foaʻi tauofo o loo faia mo le galuega i le lalolagi aoao, o le tele o na foaʻi o loo faia i le donate.pr418.com. Faafetai tele mo ā outou foaʻi o loo faia ma le agalelei.