O le taugatā o le soifuaga i le tele o atunuu ua avea ma faafitauli i le toʻatele, e aofia ai ma Molimau a Ieova. Ae nai lo o le atuatuvale ai, e faamāfanafanaina Molimau a Ieova i le iloa e “lē tuulafoaʻia lava” e Ieova ana auauna. (Eperu 13:5) E tele taimi ua faamaonia ai e Ieova le moni o lenā folafolaga. Na ia faia faapea i Filipaina, o se atunuu o loo ola ai pea tagata i se tulaga mativa. Ae i vaitausaga o le 1970 ma le 1980, na oo ai lenei atunuu i tulaga sili ona faigatā.

 Na faapea mai se tuafafine e igoa iā Vicky a: “O nisi o taimi ou te tagi ai ona o le leai o se meaʻai. Na iai le taimi na o le pau le meaʻai na totoe, o le araisa, masima ma vai.” Na faapea mai se uso e igoa iā Florencio o lē na fiu e suʻe sana galuega: “E na o le tolu lava oʻu ofu tino ma ofu vae na ofu auauaʻi i sauniga ma fonotaga.” Na faapefea ona onosaia e tagata o Ieova le tulaga lē tagolima? O le ā na fesoasoani iā i latou e tumau ai pea ona malolosi faaleagaga? E faapefea ona aogā la latou faaaʻoaʻoga mo i tatou i aso nei pe a feagai ma tulaga faigatā.

 Na mautinoa e Molimau a Ieova i Filipaina, o le a tausia e Ieova i latou i taimi faigatā. (Eperu 13:6) Na faia faapea e Ieova i le tele o auala e latou te leʻi faatalitalia. Mo se faataʻitaʻiga, ua faapea mai se tuafafine e igoa iā Cecille: “Na iai le taimi e na o le tasi le ipu araisa na totoe e fai ai le meaʻai a le matou aiga e toʻafā. O lea na matou tatalo ai mo mea na manaʻomia o lenā aso. A o inu le matou tī o lenā taeao, ae taunuu mai loa se uso ma se taga araisa e lima kilokalama (11 pauna) le mamafa. Na matou fetagisi i lo matou lotofaafetai iā Ieova mo lenei faamanuiaga. E tele foaʻi faapea na matou tofo i ai.”

 E lē gata i lenā, na faaaogā e tagata o le Atua le atamai aogā mai le Tusi Paia. (Faataoto 2:6, 7) Mo se faataʻitaʻiga, ina ua faatoʻā papatiso le tuafafine o Arcelita o lē na nofofua i lenā taimi, na ia sasaa atu ona popolega iā Ieova mo le tausiga o ia i le itu faaletino. Na ia manatua le Faataoto 10:4 o loo faapea mai, “O lima e paiē e iʻu ai i le mativa, ae o lima e toʻaga e mauʻoa ai.” I le faatatauina o na upu, na ia filifili ai e fai sana togālaau ʻaina. Na ia faapea mai, “Na matuā faamanuia e Ieova aʻu taumafaiga. Na maua meaʻai e tausia ai aʻu faapea ma seleni ou te pasese ai.”

 E leʻi lava ni tupe e faatau ma fauina ai e uso ni Maota mo Sauniga. Ae e leʻi taofia ai i latou mai le usitaʻia o le poloaʻiga e faapotopoto faatasi ma fefaalaeiauaʻi. (Eperu 10:24, 25) Na latou faia le mea e mafai. Mo se faaaʻoaʻoga, na faapea mai se tuafafine e igoa iā Deborah, “E pe ā ma le toʻaono i matou na auai i sauniga i se tamaʻi fale na ma fauina ma laʻu paga paeonia. Na ma aumaia lau o niu e taʻua o le nipa e ato ai le fale, ma lau o niu taatele e puipui ai, ae faaaogā ogāniu e fai ai nofoa.”

 O le tele o taimi na faaaogā ai fale o uso e fai ai sauniga. Na faapea mai se tuafafine e igoa iā Virginia, “Na fai o matou tamaʻi fale i vaovao ma ofe.” O Aso Toonaʻi taʻitasi e laʻu ese uma ai a matou meafale ina ia faaavanoa le fale mo le sauniga i le aso e sosoo ai. O le isi fale sa faaaogā na tutulu. Na faapea mai le uso e igoa iā Noel, “Ina ua timu, sa matou faaaogā pakete e tali ai tutulu. Ae e leʻi matuiā tele lenā tulaga auā na matou faatasitasi i inā o se aiga faaleagaga.”

 E leʻi avea le lē tele o ni meafaitino ma mea na faaitiitia ai le maelega o Molimau i le galuega talaʻi. Na faamatala e Lindina o lē e nofo i le motu o Negros, “Ona o le toʻatele o le matou aiga ae sa na o loʻu tamā na faigaluega, e lē o taimi uma na maua ai se tupe e pasese ai. O lea na masani ona matou savavali i le oganuu. Ae o se taimi fiafia auā e toʻatele i matou na ō faatasi. Na matou iloa foʻi o a matou taumafaiga na faafiafiaina ai Ieova.”

 O se tasi o luʻi tele na iai o le oo atu lea i oganuu maugā ma maotua ina ia talaʻia ona sa lē tele po o le leai foʻi o ni auala o femalagaaʻiga. Na faamatala mai e Esther o lē e nofo i le motu o Luzon e faapea: “Ona o le mamao, e usupō le savaliga a la matou vaega o uso ma tuafāfine e pe ā ma le toʻa 6 i le toʻa 12. E alu le aso atoa o matou talaʻi. E faatau mai ni a matou meaʻai vela ma aai i lalo o se laau paolo. E lē o uso uma ma tuafāfine na maua ni meaʻai, ae na ō mai lava. E matou te fai i ai, ʻAua le popole. E tatou te tofu uma i meaʻai ia e iai.’”

 Na matuā faamanuiaina e Ieova lenā agaga faataulaga. Mo se faataʻitaʻiga, i le 1970, e pe ā ma le 54,789 tagata talaʻi i Filipaina. Ae i le 1989, na toetoe lava a faaluaina le faitau aofaʻi o tagata talaʻi i le 102,487. I le 2023, o le aofaʻi o tagata talaʻi o le Malo i Filipaina ua oo atu i le 253,876.

 E ui ina lē tagolima uso ma tuafāfine, ae na galulue mamafa pea faaleagaga. Na faapea mai se uso e igoa iā Antonio, “E leʻi avea le mativa e taofia ai lo matou alofa mo Ieova.” Na mātauina e le tuafafine o Fe Abad e faapea, “Pe a ma fesagaʻia ma laʻu tane tulaga faigatā tau tupe, na ma faalagolago pea iā Ieova ma tofo ai i le olioli e maua pe a ola faafaigofie. O le iʻuga, na aʻoaʻoina ai foʻi la ma fanau e maufaatuatuaina Ieova.”

 Ua faapea mai Lucila o lē e nofo i le motu o Samar: “E lē o se faafitauli le mativa pe a tatou auauna iā Ieova. O le faamuamua o le Atua e tatou te maua ai le lotomalie, ma lagona ai pea le fiafia. Ua ou tofo i le olioli i le vaai atu i aʻu suʻesuʻega faale-Tusi Paia o latou atiaʻe se faiā lelei ma Ieova, ma mulimuli ane matou auauna faatasi o ni paeonia.”

 I le mafaufau atu i tulaga faigatā o loo fotuaʻi mai, seʻi o tatou manatua upu a se tasi o toeaina e igoa iā Rudolfo: “I le ola ai i taimi faigatā i vaitausaga o le 1970 ma le 1980, na ou lagona ai le agalelei o Ieova iā te aʻu. E ui ina itiiti se tupe na maua, ae e leai se mea na ou mativa ai. Na tausia lelei e Ieova aʻu. Ua ou maua se olaga sili ona fiafia i le taimi nei, ma ou te tulimataʻia le ʻola moni’ i le Parataiso i le lumanaʻi.”—1 Timoteo 6:19.