I le afiafi o le Aso Sa, Fepuari 24, 1924, na faia ai mo le uluaʻi taimi le faasalalauga a tagata aʻoga o le Tusi Paia a i le latou alāleo faasalalau o le WBBR. Na faapeʻī la latou uluaʻi faasalalauga? O ai na faalogologo i ai? Ua faapefea ona faaaogā pea e Molimau a Ieova tomai fou faaonapōnei e faaoo atu ai le “tala lelei o le Malo i le lalolagi atoa”?—Mataio 24:14.

 Na amata le uluaʻi faasalalauga i le 8:30 i le afiafi mo le lua itula. Na faasalalau le polokalame mai i se fale fou i Staten Island i Niu Ioka. Na faapea mai le uso o Ralph Leffler, o lē na galue e faamautinoa o loo lelei leo o le faasalalauga: “Na matou lagona uma le popole.” Na ia taumānatu, “Pe e iai se isi o le a faalogo mai iā i matou? Na ou tago ki masini ma amata loa le faasalalauga, ma faamoemoe o le a lelei mea uma.”

 O le uso o Victor Schmidt na faia lenā uluaʻi faasalalauga, ma o ia foʻi o le faatonu o le alāleo. Na ia faatomua le polokalame e ala i le faasilasila o tagata fai musika tomai ma le ʻaupepese, o i latou uma o Tagata Aʻoga o le Tusi Paia. Na amata i le tāina e se uso o le piano, ona sosoo ai lea ma le usuina e Cora Wellman o le pese “Le Ivasefulu Iva” lea e faavae i le talafaatusa a Iesu i le mamoe na leiloa. (Luka 15:4-7) Na sosoo ai ma isi pese e aofia ai le pese “Salamō” na usuina e Frederick W. Franz, lea e faamatala ai le tala i le atalii faamaumauʻoa.—Luka 15:11-25.

 Na tauaaoina e le uso o Joseph F. Rutherford, o lē na taʻimua i Tagata Aʻoga o le Tusi Paia i lenā taimi, le lauga autū lea na taʻua ai o le a faaaogā le alāleo faasalalau “e faaauiluma ai manaʻoga o le malo o le Mesia.” Na ia taʻua: “Talu ai o le finagalo o le Alii ua māfua ai ona iai lenei alāleo faasalalau, o lona finagalo foʻi la ia faaaogā lenei alāleo e aʻoaʻo ai tagata e faatatau i le faataunuuga o Ana valoaga tāua.”

 E toʻatele tagata i le itu i mātū i sasaʻe o le Iunaite Setete sa faalogologo i lenā uluaʻi faasalalauga. Na lipotia mai e se tasi na faalogologo mai i Morrisville i Vermont e silia ma le 320 kilomita (200 maila) le mamao e faapea: “O loo oʻu lagona lelei atu le polokalame. . . . O loo manino lelei le leo o Rutherford. . . . O loo lagona lelei atu ana upu uma.” Na faalogologo ane foʻi se tagata mai i Monticello i Florida i le polokalame. E toʻatele tagata sa faalogologo i polokalame a lenei alāleo fou, ma na lafo mai e le toʻatele a latou tusi faafetai.

 E 33 tausaga b na faasalalau ai e lenei alāleo le feʻau o le Malo aemaise lava i le itu i mātū i sasaʻe o le Iunaite Setete. E iai taimi na galulue faatasi ai le alāleo o le WBBR ma isi alāleo, ma mafai ai ona oo atu faasalalauga i le faitau miliona o tagata i le Iunaite Setete, Kanata, ma isi atunuu. Na taʻua i le tusi 1975 Yearbook of Jehovah’s Witnesses: “O le 1933 o le tausaga iloga lenā o le alāleo. E oo ane i le tausaga lenā, ua 408 alāleo ua faaaogā e faasalalau atu ai le feʻau i konitineta e ono, ma e 23,783 lauga faale-Tusi Paia ua faasalalauina . . . I le taimi lenā, na maua polokalame a le Watch Tower i le tele o alāleo faasalalau. Ioe, na mafai ona maua i alāleo upu moni e faamamaluina ai le Atua.”

 I se fua faatatau, e toʻa 1,064 tagata talaʻi o le Malo na iai i le Iunaite Setete i le taimi na amata ona faaaogā ai e Tagata Aʻoga o le Tusi Paia le WBBR. Na fesoasoani tele iā i latou faasalalauga i le alāleo. Peitaʻi e oo ane i le 1957, ua toʻa 187,762 tagata talaʻi o le Malo i le Iunaite Setete, ma e toʻa 653,273 tagata talaʻi i le lalolagi aoao. E lē gata i lea, ona o toleniga na maua i sauniga a faapotopotoga, na faaleleia ai tomai o na uso ma tuafāfine maelega i le galuega talaʻi mai i le fale i le fale, ma isi vala o le faiva.

 O na suiga lelei na māfua ai ona toe iloilo e uso taʻimua aogā o faasalalauga i le leitiō pe a faatusatusa i le asiasi i fale o aiga. O lea, na faia le faaiʻuga e faatau ese le WBBR, ua na o le pau lea o le alāleo faasalalau o totoe a le Watchtower Society. Na faatau ese le alāleo iā Aperila 15, 1957. A o faia le faasalalauga faaiʻu faapitoa i le aso na muamua atu, na fesiligia ai Nathan H. Knorr i le māfuaaga ua faatau ese ai le WBBR. Na ia taʻua o se tasi o māfuaaga autū ua faatuputeleina ai le aofaʻi o Molimau a Ieova, o le galuega talaʻi mai i le fale i le fale. Na ia faapea mai, “Na fesoasoani faasalalauga a le WBBR i le toʻatele. Peitaʻi, na tutusa le faatelega i le aofaʻi o Molimau a Ieova i nofoaga e leʻi maua ai faasalalauga, ma nofoaga na mafai ona maua ai faasalalauga.” O lea, na manatu ai uso e tele atu iʻuga lelei e maua mai i le galuega i le fale i le fale, nai lo o faasalalauga i le leitiō. Peitaʻi, e leʻi muta ai i inā faasalalauga a Molimau a Ieova. Na toe aliaʻe mai i le tele o tausaga mulimuli ane, ae ua sui le auala e faia ai.

 Na iai se mea mataʻina na tupu i le faalapotopotoga a Ieova iā Oketopa 6, 2014, o le tatalaina lea o le TV i le Initaneti a Molimau a Ieova. E mafai e Molimau a Ieova ma isi ona maimoa ma faalogologo i na polokalame faalemasina e faaaogā ai le Initaneti, o le polokalame JW Library, po o se alāata e lē faaaogāina ai le Initaneti. c Ae i isi vaega o le lalolagi, o loo faaauau ona faaaogā e tagata o Ieova le leitiō ma le televise. O le ā le uiga o lea manatu?

 I tausaga talu ai nei, ua faaaogā e le faalapotopotoga a Ieova leitiō ma televise a nisi o pisinisi, e faasalalau ai sauniga a faapotopotoga i vaiaso taʻitasi ma tauaofiaga i nofoaga e lē lelei le Initaneti. Ua oo atu nei faasalalauga i le toʻatele o tagata e lē o ni Molimau a Ieova, e aofia ai ma le toʻatele o ē e naunau i le Tusi Paia. O se faataʻitaʻiga, i le 2021 i le 2022, na faailoa atu ai e pule o alāleo faasalalau i le ofisa o le lālā o Molimau a Ieova i Aferika i Sasaʻe, e toʻatele tagata e lē o ni Molimau a Ieova o loo talisapaia a tatou sauniga. E toʻatele ē e faalogologo mai i Kenya, South Sudan, ma Tanzania na talosaga mai mo ni a latou suʻesuʻega faale-Tusi Paia.

 Ae o le auala autū e folafola atu ai e Molimau a Ieova le tala lelei o le Malo i le lalolagi aoao, e ala i le galuega mai i le fale i le fale, o fata tusi, ma le Upega tafaʻilagi o le jw.org. Ona o la tatou Upega tafaʻilagi, ua faigofie ai i tagata fiafia ona faitau i le Tusi Paia ma isi lomiga faale-Tusi Paia i le silia ma le 1,080 gagana, e aunoa ma se totogi. E mafai foʻi ona latou maua ai tali o fesili faale-Tusi Paia, ma saʻili nofoaga e faia ai sauniga faa-Kerisiano. Ona o nei taumafaiga, ua mafai ai e Molimau a Ieova ona faasalalau atu le tala lelei o le Malo o le Atua i le tele o auala, nai lo o se isi lava taimi. Ioe, e pei ona valoia i le Tusi Paia, ua folafola atu le tala lelei “i le lalolagi atoa.”—Mataio 24:14.