Ua faapea mai Agostinho lea e nofo i Pasili, “Na ou ola aʻe i se faatoʻaga i se nuu maotua. E matuā matitiva lo matou aiga, ma na ou nofo ma le aʻoga ina ia ou faigaluega e tausi ai lo matou aiga.” Na faatoʻā iloa e Agostinho faitau ma tusitusi ina ua 33 ona tausaga. Na ia faapea mai, “O loʻu iloa faitau ma tusitusi ua maua ai loʻu mautinoa ma lē ulagia ai aʻu e tagata.”

 E silia ma le 70 tausaga talu ona aʻoaʻoina e Molimau a Ieova tagata ia iloa tusitusi ma faitau tusi, ma o Agostinho o se tasi o i latou e pe ā ma le kuata o le miliona o tagata na aʻoaʻoina e Molimau a Ieova. Aiseā e aʻoaʻo ai e Molimau tagata ina ia iloa faitau ma tusitusi? Ua faapefea ona aogā i tagata na aʻoaʻoga?

 I le 1935, na talaʻi ai Molimau a Ieova i atunuu e 115. Ina ia talaʻi atu i tagata e tautatala i isi gagana, e tā e misionare lauga faale-Tusi Paia ua uma ona puʻeina ma faaliliuina, ma na latou ofo atu foʻi lomiga i nisi o gagana e tautatala ai na tagata. E ui e toʻatele na fiafia i le Tusi Paia, ae o le luʻi o le lē iloa faitau ma tusitusi.

 E faigatā i tagata ona faatatau mataupu silisili o le Tusi Paia, pe a lē iloa faitau le Tusi Paia. (Iosua 1:8; Salamo 1:2, 3) E faigatā foʻi ona latou faataunuuina o latou tiute tauave faa-Kerisiano. O se faaaʻoaʻoga, pe a lē iloa e se matua faitau, e faigatā la ona latou aʻoaʻoina le fanau i le Tusi Paia. (Teuteronome 6:6, 7) E faigatā i Molimau fou e lē iloa faitau ona aʻoaʻo isi i le Tusi Paia.

 I vaitausaga o le 1940 ma le 1950, na faimalaga ai i atunuu eseese Nathan H. Knorr ma Milton G. Henschel, o nisi na taʻimua i Molimau a Ieova, ina ia fesoasoani i le faamaopoopoina o le galuega talaʻi. I atunuu e toʻatele tagata e lē iloa faitau ma tusitusi, na la faalaeiauina ofisa o lālā e faatulaga ni vasega i faapotopotoga e aʻo ai le faitau ma le tusitusi.

 Na lafo atu e ofisa o lālā taʻiala i faapotopotoga i le auala e aʻoaʻo ai na vasega. I nisi atunuu, ua uma ona iai polokalame a le malo mo le aʻoaʻoina o le faitau ma le tusitusi, ma e mafai ona faaaogā e Molimau a Ieova. O se faaaʻoaʻoga i Pasili, na maua e le ofisa o le lālā mai i le malo tusi ma sapalai o mea e faaaogā, ma na auina atu loa i faapotopotoga. Ae i nisi atunuu, na faatulaga e Molimau sa latou lava polokalame e aʻoaʻo ai le faitau ma le tusitusi.

 Na mafai e so o se tasi ona auai i nei vasega, e aofia ai tamāloloa, fafine, talavou ma tagata matutua. O le fuafuaga autū, o le aʻoaʻo lea o tagata ia iloa faitau i la latou lava gagana, e tusa pe tele gagana e aʻoaʻoina i se faapotopotoga e tasi.

 Ua faapefea ona aogā i tagata lenei polokalame? Ua faapea mai se Molimau i Mekisikō: “Ua mafai nei ona ou malamalama e uiga i le Tusi Paia, ma ua pāʻia ai loʻu loto. O loʻu iloa faitau ua fesoasoani iā te aʻu e saʻoloto ai le talanoa i oʻu tuaoi, ma ua mafai ai ona ou talaʻi atu le feʻau o le Tusi Paia i le toʻatele o tagata.”

 O le iloa faitau ma tusitusi, e lē gata ua malamalama ai i le Tusi Paia ae e tele isi aogā ua maua ai. Ua faapea mai Isaac mai i Burundi, “O le iloa faitau ma tusitusi, ua fesoasoani iā te aʻu e aʻoaʻo ai tomai faufale. Ua avea nei faugāfale ma aʻu galuega tumau, ma o loo ou vaavaaia nei faugāfale tetele.”

 E 49 tausaga o Jesusa mai i Peru ina ua amata ona auai i vasega na aʻoaʻo ai le faitau ma le tusitusi. Na faapea mai o ia, “Ona o aʻu o le tinā o le aiga, e tatau la ona ou iloaina tau ma igoa o oloa e faatau i le maketi. I le taimi ua teʻa na faigatā ia aʻu lenā mea. Ou te matuā talisapaia vasega na aʻoaʻoina ai la matou faitau ma le tusitusi, ua ou maua nei le mautinoa pe a ou alu e fai se faatau mo lo matou aiga.”

 I le tele o tausaga, na viiviia ai e tagata o malo Molimau a Ieova ona o lo latou galulue mamafa e aʻoaʻo tagata ia iloa faitau ma tusitusi. I aso nei, o loo aʻoaʻoina pea e Molimau a Ieova tagata ia iloa faitau ma tusitusi, e faaaogā ai polokalame ma meafaigaluega o loo faaleleia pea a o faagasolo tausaga. Ua latou tusia ma lolomiina le toetoe 224 miliona polosiua i gagana e 720, ina ia fesoasoani ai i tagata ia iloa faitau, pe fesoasoani ai foʻi iā i latou e itiiti aʻoaʻoga. a