Na maua e mātua o loʻu tinā le upu moni i le 1906, ina ua faatoʻā mavae le maliu o le la tama ona o le maʻi o le lipi. O le la fomaʻi o se Tagata Aʻoga o le Tusi Paia, e pei ona taʻua ai Molimau a Ieova i na aso. Na ia faailoa atu iā i laʻua le faamoemoe faamāfanafanaloto o loo i le Tusi Paia, e aofia ai le faamoemoe o le toetū. O le iʻuga, na avea loʻu tinā, o lona uso, ma o la mātua, ma Tagata Aʻoga o le Tusi Paia.

 Na avea i latou o ni auauna maelega i le upu moni mo le tele o tausaga. Na galulue foʻi loʻu tinā, o lona uso, ma lona tinā, e faasino nofoa o ē na ō atu e matamata i le “Photo-Drama of Creation” na faaalia i Chicago, Illinois, i le Iunaite Setete. Ae faanoanoa ona e na o loʻu tinā na faaauau pea ona auauna iā Ieova. E leʻi faigofie lenei mea mo ia, ona na umi se taimi o latou tapuaʻi faatasi o se aiga, seʻia oo i le vaitausaga o le 1930. Sa telē se aafiaga lelei iā te aʻu o le faamaoni ma le usitaʻi o loʻu tinā iā Ieova, faapea le faaaʻoaʻoga a loʻu tamā, o sē na avea foʻi o se tagata aʻoga faamaoni o le Tusi Paia.

 Na ou fanau i le 1927, ma o aʻu le ulumatua o le matou fanauga e toʻaono. Na matou tumau uma i le upu moni. O loʻu tamā o se kamuta, ma na matou nonofo i le taufaasiʻusiʻuga o Chicago. E telē le matou togālaau o fualaau ʻaina, ma na iai foʻi se matou lafu moa ma pato.

 Na ou fiafia e galue. E masani ona ou suʻiina pūpū o totini o le matou aiga. I aso nei, ua seāseā toe fonofono e tagata ni totini ua pūpū, ae i aso la, e masani ona toe suʻi totini nai lo o le tatiaʻi. Na aogā loʻu aʻoaʻoina o lenā tomai, auā na tele ina ou suʻisuʻi a o faagasolo le olaga.

 Na faamautinoa e loʻu tamā e matou te lē misia se vala o le matou faasologa faaleagaga. Na matou auai i sauniga uma, faia e lē aunoa se sao i le galuega talaʻi, ma faitau i aso uma se mau o le Tusi Paia. I afiafi o Aso Toonaʻi, e matou te suʻesuʻe o se aiga le Tusi Paia e faaaogā ai Le Olomatamata.

 Ina ia avatu se molimau lelei i o matou tuaoi, na faatū e lo matou tamā se faailoilo e alu i le uila, i le potu mālōlō o le matou fale. Na faia e o tatou uso nei faailoilo, ina ia faalauiloa atu ai se lauga lautele po o se tasi o a tatou lomiga. O le emoemo o le molī o le faailoilo, na tosina mai ai le vaai a tagata na pasi ane i luma o le matou fale. Na faapipii foʻi e loʻu tamā isi faailoilo e lua i le matou taavale.

 Na aʻoaʻoina i matou e lo matou tamā i le tāua o le usitaʻi iā Ieova, e ala i ana upu ma faaaʻoaʻoga. Na lagolagoina o ia e lo matou tinā i le tele o auala. Na amata ona paeonia faataimi atoa lo matou tinā ina ua lima tausaga o loʻu uso laʻitiiti, ma na faaauau lana paeonia seʻia oo lava ina maliu. Ou te lotofaafetai ona na ou maua ni mātua lelei.

 E matuā ese lava le olaga na iai i na aso mai lenei taimi. Talu ai e leʻi iai se matou TV, na masani ona matou faalogologo ma nai oʻu tei i polokalame mananaia na sau i le leitiō. Ae na sili ona fiafia lo matou aiga e faalogologo i polokalame faaleagaga a le faalapotopotoga a Ieova na faasalalau mai ai.

 Na matou fiafia e auai i tauaofiaga a Molimau a Ieova. I le tauaofiaga na faia i le 1935, na matou aʻoaʻoina ai, o le “motu o tagata e toʻatele” lea o loo taʻua i le Faaaliga 7:9, 14 o le a faasaoina mai i le “puapuaga tele,” o le a latou maua le faamoemoe e ola ai e faavavau i le lalolagi Parataiso. A o leʻi oo i le 1935, na tagofia uma e oʻu mātua le areto ma le uaina i le taimi o le Faamanatuga. Peitaʻi, ina ua uma le tauaofiaga, e na o loʻu tamā na faaauau ona faia faapea. Na iloa e loʻu tinā mai i lenā tauaofiaga, o lona faamoemoe o le ola e faavavau i le lalolagi, ae e lē ina ia pule faatasi ma Keriso i le lagi.

 I le tauaofiaga na faia i St. Louis, Missouri i le 1941, na tatala ai le tusi Children e Joseph Rutherford, o lē na taʻimua i le galuega i lenā taimi. Na umi se taimi o patipati leotele le aofia ina ua tatala le tusi! O le taimi lenā ua 14 oʻu tausaga, ma ua faatoʻā tasi le tausaga talu ona ou papatiso. Ou te manatua lelei le matou laina faatasi ma isi tamaiti, e matou te ō i luga o le pulelaa ina ia aumai ni a matou tusi.

 Na matuā ese foʻi le auala na fai ai le talaʻiga i na aso. I le vaitausaga o le 1930, na matou faaaogā ai i le talaʻiga ni fonokalafi, po o laau e tā ai lauga faale-Tusi Paia. A o leʻi tuʻituʻi le faitotoʻa, e matou te viliina le auvili o le laau e tā ai lauga, ma faamautinoa o loo taatia lelei le nila i luga o le record. Pe a sau le tagata, e matou te fai atu se faatomuaga puupuu, tā se lauga faale-Tusi Paia e fā ma le ʻafa minute le umi, ma ofo atu se lomiga. Ou te manatua na faalogologo lelei tagata i le matou vaipanoa i na lauga, ma e leai nisi na faaalia ni uiga lē fiafia. Ina ua ou paeonia i le 16 o oʻu tausaga, na aumai e loʻu tamā saʻu ia lava laau e tā ai lauga, ma na ou fiafia e faaaogā i le talaʻiga. O laʻu paga paeonia, o se tuafafine e igoa iā Lorraine.

 O se tasi o auala na matou talaʻi ai, o le savavali lea o se vaega i tafā ala ma tauave ni faailoilo o loo iai ni faamatalaga i luma ma tua. Na tusia i nisi o faailoilo faaupuga nei “Religion Is a Snare and a Racket” (O Lotu o se Mailei ma o se Faiga Faapiʻopiʻo) ma le “Serve God and Christ the King” (Auauna i le Atua ma Keriso le Tupu).

 O sauniga na sauniunia ai i matou mo teteega, ma iloa ai le tala e fai atu ina ia puipuia ai le upu moni. Na fetaui lelei na toleniga auā na matou feagai ma teteega. O se faataʻitaʻiga, ina ua matou ofoina atu mekasini i se nofoaga pisi mo fefaatauaʻiga, na ō mai leoleo ma ave i matou i le ofisa o leoleo. Na faasaʻoloto i matou i nai itula mulimuli ane, ma na matou fiafia ona na sauāina i matou ona o le usitaʻi iā Ieova.

 I se taimi mulimuli ane, na ou feiloaʻi ai i se uso e igoa iā Eugene Rosam, o sē na masani ai Lorraine i se fonotaga na faia i Minneapolis, i Minnesota. Na ola aʻe Eugene i Key West, i Florida. Na tuli o ia mai i le aʻoga a o iai i le vasega sefulu, ona o le musu e auai i se sauniga na faaalia ai le lotonuu. Na amata ai i le taimi lava lenā lana auaunaga paeonia. I se tasi aso, na la fetaui ai ma se teine na la vasega, o sē na fia iloa pe aiseā na tuli ai Eugene ae o ia o se tamaitiiti lelei i le aʻoga. O tali a Eugene mai i le Tusi Paia, na ia talia ai se suʻesuʻega faale-Tusi Paia, ma mulimuli ane avea ai o se tuafafine faamaoni.

 Na ma faaipoipo ma Eugene i le 1948, ma na ma paeonia o se ulugalii i Key West. Mulimuli ane, na valaaulia i maʻua e auai i le vasega lona 18 o le Aʻoga o Kiliata, lea na faauu i le amataga o le 1952. Na aʻoaʻoina le gagana Sipaniolo i se tasi o vasega, o lea na ma faatalitalia ai o le a tofia i maʻua o ni misionare i se atunuu e tautatala i le gagana Sipaniolo. Peitaʻi, e lē o le mea lenā na tupu. A o ma iai i Kiliata, na poloaʻia ai Eugene e auai i le vaegaʻau ona o le taua i Korea. Na faateʻia i maʻua ona i le Taua Lona Lua a le Lalolagi, na maua ai e Eugene se faatagaga e lē auai ai i le vaegaʻau, ona o ia o se faifeʻau. O lenei poloaʻiga, na tatau ai ona ma nonofo pea i le Iunaite Setete. Na ou tagi i loʻu faanoanoa ona o le tulaga o mea ua iai. Na faatoʻā toe maua e Eugene le faatagaga e lē auai ai i le vaegaʻau, ina ua mavae le lua tausaga. E ui i lea, o le mea na tupu na ma aʻoaʻoina mai ai se lesona tāua—pe a foliga mai ua faigatā ona e faataunuuina se faaeaga, o le a saunia e Ieova se isi auala e faaaogā ai oe i lana auaunaga. O le mea lenā na ia faia mo i maʻua, ae na manaʻomia ona ma onosaʻi.

 I le 1953, ina ua mavae se taimi o ma paeonia i se faapotopotoga faa-Sipaniolo i Tucson, i Arizona, na tofia ai i maʻua e avea ma ovasia matagaluega. A o faagasolo taimi, na ma galulue i matagaluega i Ohio, Kalifonia, ma le aai o Niu Ioka. I le 1958, na ma galulue ai i le faaeaga o le ovasia itumalo a i Kalifonia ma Oregon, ma na tele ina ma nonofo i fale o uso. Mulimuli ane i le 1960, na ma siitia atu ai i Kanata, ma na avea ai Eugene o se faiaʻoga mo le Aʻoga o le Faiva o le Malo, lea e auai ai tane tofia o faapotopotoga. Na ma nonofo i Kanata seʻia oo i le 1988.

 O se tasi o mea ou te manatua ai pea Kanata, o se aiga na ma fetaui ai ma se tuafafine i le taimi o le talaʻiga i le fale i le fale. Na ma feiloaʻi muamua iā Gail, ma na ia faailoa mai le faanoanoa o lana fanau tama i le maliu ai o lona tamā. Na latou fesili atu iā te ia pe aiseā ua maliu ai le toeaina ma po o fea ua alu i ai, ae e leʻi iloa e Gail tali o a latou fesili. O lea, na ma faailoa atu ai iā te ia ni tali faamāfanafanaloto mai i le Tusi Paia.

 I le taimi lenā, o loo avea ai Eugene ma ovasia matagaluega, ma e na o le tasi le vaiaso na ma iai i inā. Peitaʻi, na toe foʻi le tuafafine lea na ma galulue faatasi e toe asi Gail. O le iʻuga, na talia e Gail le upu moni, faatasi ma lana tane o Bill, ma le la fanau tama o Christopher, Steve, ma Patrick. Ua avea nei Chris o se toeaina i Kanata, o Steve o se faiaʻoga i le maota e fai ai aʻoga faale-Tusi Paia i Palm Coast, i Florida, a o Patrick o se sui o le Komiti o le Lālā i Taialani. Na matou fesootaʻi pea ma lenei aiga a o faagasolo tausaga, ma ou te fiafia ona sa faia soʻu sao itiiti ina ia fesoasoani ai iā i latou e iloa Ieova!

 A o ma iai i Kanata, na faaaogā ai e Ieova Eugene i se isi auala mataʻina. Seʻi oʻu faamatala atu.

 I le tele o tausaga ua mavae, e leʻi malamalama tagata i le māfuaaga e tatou te lē taliaina ai tuigātoto, ma na iʻu ai ina talitonu le toʻatele i faamatalaga sesē e faatatau iā i tatou. Na faasalalau e nusipepa i Kanata e faapea o loo maliliu tamaiti Molimau, ona e mumusu mātua e tui toto o a latou fanau. Na maua e laʻu tane le faaeaga e fesoasoani ai e faailoa le sesē o na lipoti.

 A o leʻi faia le tauaofiaga faavaomalo i Buffalo i Niu Ioka i le 1969, na ō atu ai Eugene ma nisi o uso i falemaʻi tetele i lenā vaipanoa, e faailoa atu i ai e pe ā ma le 50,000 Molimau mai i Kanata, ma le Iunaite Setete o le a auai i lenā tauaofiaga. Pe afai e iai se tasi i le tauaofiaga e maʻi tigāina, o se mea lelei mo fomaʻi le malamalama i o tatou talitonuga e tusa ai o tuigātoto, ma le māfuaaga e talafeagai ai. Na avatu foʻi e uso i fomaʻi ni faamatalaga e faatatau i togafitiga faafomaʻi e lē faaaogāina ai le toto, lea na latou aumaia mai i ni tusi e maufaatuatuaina e fomaʻi. O le tali lelei mai o fomaʻi, na uunaʻia ai Eugene ma isi uso ina ia amata ona fai ni asiasiga i falemaʻi i Kanata. Na latou fesoasoani foʻi i toeaina i lenā vaipanoa, e iloa ni auala aogā e feagai ai ma mataupu faafomaʻi e ono tulaʻi faafuaseʻi mai.

 A o faagasolo taimi, na iai ni iʻuga lelei o na taumafaiga. O le mea moni, o nei asiasiga na maua mai ai ni aogā e matou te leʻi faatalitalia. Seʻi oʻu faamatala atu aogā na maua mai ai.

 I le ogatotonu o le vaitausaga o le 1980, na vili mai ai Milton Henschel mai i le ofisa ulu i Brooklyn i Niu Ioka iā Eugene. Na mananaʻo le Vaega Pule ina ia faalautele atu se polokalame o loo faagasolo i le Iunaite Setete, ina ia saunia atu ai faamatalaga i le toʻatele o fomaʻi. O lea na ma siitia atu ai i Brooklyn, ma iā Ianuari 1988, na faavae ai e le Vaega Pule i le ofisa ulu se matagaluega fou e taʻua o Auaunaga o Faamatalaga Faafomaʻi. Mulimuli ane, na tofia ai laʻu tane ma isi uso e toʻalua, ina ia faia ni seminā i le Iunaite Setete, ona sosoo ai lea o isi atunuu. E leʻi umi ae faavaeina Matagaluega o Faamatalaga Faafomaʻi i lālā, ma Komiti o Mataupu Tau Falemaʻi i le tele o aai eseese. E toʻatele Molimau ma a latou fanau ua maua aogā mai i nei sauniuniga alofa mai iā Ieova. Pe a alu Eugene i seminā ma asiasiga i falemaʻi, ou te galue i le Peteli i le umukuka po o le potu e faia ai suʻisuʻiga.

 I le 2006, na ou feagai ai ma le luʻi e sili ona faigatā, o le maliu o si aʻu tane pele o Eugene. E ese loʻu misia o taimi e ma te faifaimea faatasi ai ma lona alofa iā te aʻu. O le ā na fesoasoani iā te aʻu e onosaia ai lenei tulaga faigatā? E tele mea na fesoasoani iā te aʻu, e pei o le mafuta vavalalata atu iā Ieova e ala i le tatalo ma le faitau e lē aunoa o le Tusi Paia. Ou te faalogologo i le talanoaina o le mau o le aso i le aiga Peteli, ma ou faitauina le mataupu atoa o loo faavae mai ai le mau o lenā aso. Ou te pisi foʻi i loʻu faaeaga i le Peteli i le Matagaluega o Suʻisuʻiga, lea ou te manatu i ai o se faaeaga tautele. I tausaga ua mavae, na ou maua foʻi le faaeaga e suʻiina ai ʻie faamalama mo Maota mo Fonotaga i New Jersey ma Niu Ioka. O loo ou auauna nei i le Peteli i Fishkill, lea ou te faia ai ni nai suʻisuʻiga ma isi galuega lāiti. b

 O mea e sili ona tāua iā te aʻu i le olaga, o le alofa lea iā Ieova ma usitaʻi iā te ia ma lana faalapotopotoga. (Eperu 13:17; 1 Ioane 5:3) Ou te fiafia ona na ma faamuamua ma Eugene na mea i o ma olaga. Ou te mautinoa o le a tauia i maʻua e Ieova i le ola e faavavau i se lalolagi Parataiso, ma maua le olioli i le toe vaai o le tasi i le isi.—Ioane 5:28, 29.