DAVID MAZA | TALAAGA O LE SOIFUAGA
Se Aiga Fiafia na Mafatia, ae ua Toe Faamalosia
Ina ua ou suʻesuʻeina le Tusi Paia ma faatatau mataupu silisili, na mafai ai ona ou maua se aiga fiafia, o se mea na ou manatu e lē mafai ona ou mauaina. Na matou auauna faatasi ma le lotoatoa iā Ieova, ma laʻu avā ma le ma fanau e toʻatolu.
Peitaʻi, e matou te leʻi faatalitalia o le a iai se mea mataʻutia o le a tupu iā Aperila 24, 2004.
Ina ua fanau le ma tama teine o Lauren, na matuaʻi oʻu lē iloa lava pe e faapefea ona avea aʻu ma tamā lelei. O le mea foʻi lenā na tupu ina ua fanau le ma tama lona lua o Michael. Ou te manatua o le faaipoipoga a oʻu mātua e masani ona tauaʻimisa ma na iʻu ai lava ina teteʻa. E ui na ou manaʻo e avea o se tane ma se tamā lelei, ae ou te leʻi iloa le auala e faia ai faapea.
O le mea e leaga ai, a o oʻu talavou na ou faaaogāina le ʻava malosi ma fualaau faasāina, ma e oo lava ina ua ou matua e leʻi mafai ona ou pulea le ituaiga olaga ou te ola ai. O aʻu masaniga leaga e pei o le taalo i taaloga faitupe, na iʻu atu ai i loʻu faia o le tele o filifiliga sesē. Na faateteleina le leaga o le tulaga o mea, ma na iʻu ai lava ina alu Kaye ma ave le ma fanau e toʻalua, ae tuua na o aʻu. Na matuā ou mafatia ai lava.
Na ou fesili iā Kaye pe o le ā se mea ou te faia ina ia toe foʻi mai ai. O le taimi lenā, o loo faia ni ana talanoaga faale-Tusi Paia ma Gloria, o se tasi o Molimau a Ieova. Na faigofie le mea na manaʻo ai Kaye, “Ia suʻesuʻe le Tusi Paia.” Ou te leʻi iloa mea e aofia ai i le suʻesuʻeina o le Tusi Paia ma ou te leʻi fiafia foʻi i ai, ae ona o loʻu manaʻo e toe foʻi mai Kaye, na ou malie ai e matou te feiloaʻi ma Gloria ma lana tane o Bill.
Se Talanoaga na Suia ai Loʻu Olaga
Ina ua ō mai Bill ma Gloria i le matou fale, na ou maofa i le māfana o le la mafutaga. Na ou iloa mai i a matou talanoaga, e iai se la fanau matutua e tai tutusa o matou tausaga o loo faaaogā tatau o latou olaga. O le taimi muamua lea na ou mafaufau ai, atonu e mafai ona fesoasoani le Tusi Paia ia maua ai se aiga fiafia.
Na talanoa mai Bill ma Gloria i loʻu faafitauli, ma faasino mai le manatu o le Tusi Paia o loo i le Kalatia 6:7 lea e faapea mai: “O le mea e lūlūina e le tagata, o le mea lava lea e na te seleseleina mai.” Na ou faapea ifo, ʻPe ana fai aʻu filifiliga e ōgatusa ma lenā mataupu silisili, semanū e lē tele oʻu faafitauli!’
Kaye ma David
A o faagasolo taimi, na ou iloa ai le faaleleia o loʻu olaga ona o le faatatauina o mataupu silisili o le Tusi Paia.Na tuu le ma ulaula ma Kaye ma na mafai ai foʻi ona ou tuua isi masaniga leaga. I le 1985, ina ua fanau le ma tama lona tolu e igoa iā David, lea e matou te valaauina o Davey, na ou lagona ai e peiseaʻī ua ou iloa le auala e avea ai o se tamā lelei.
Auauna Faatasi iā Ieova
I le avea ai o ni mātua, na ma mātauina ma Kaye o le aʻoaʻoina o le ma fanau ia alolofa iā Ieova, na matou vavalalata atu ai foʻi iā te ia. E tele mea na matou aʻoaʻoina mai i lomiga e pei o le tusi Ia Faalogo i le Faiaʻoga Sili! I le taimi e tasi, na avea aiga o le matou faapotopotoga ma faaaʻoaʻoga lelei iā i maʻua ma le ma fanau.
Michael ma lana avā o Diana
Mulimuli ane, na auauna uma le ma fanau o ni paeonia. I le amataga o le 2004, na auai ai Lauren i se faapotopotoga faa-Sipaniolo. O le taimi lenā na tuua ai e Michael le Peteli ina ia faaipoipo atu i lana avā o Diana, ma ua sauni e siitia atu i le la faaeaga e talaʻi ai i Guam. A o Davey lea e 19 tausaga, e leʻi leva talu ona amata lana auaunaga i Dominican Republic.
Na matuā ma fiafia ma Kaye i filifiliga na faia e le ma fanau. Na ma tofo i le moni o upu o loo i le 3 Ioane 4: “E leai se isi mea e sili ona ou olioli ai, nai lo o loʻu faalogo atu o loo savavali pea laʻu fanau i le upu moni.” Peitaʻi, na lilo i o ma manatu o le a suia atoa o matou olaga ina ua vili mai se tasi o a ma uō.
Se Faalavelave na Tuia ai o Ma Loto
Iā Aperila 24, 2004, na matou ō ai ma Kaye ma isi ulugalii e toʻalua e aai i se faleʻaiga. Talu ai e silia ma le selau kilomita (60 maila) le mamao o le faleʻaiga, o lea na matou ō faatasi ai i le ma taavale. Ina ua uma le matou meaʻai, na matou ō loa i se isi faleʻaiga e ʻai ai sina mea suamalie. A o oʻu alu e suʻe se mea e paka ai le taavale, ae tatagi loa le telefoni. E tali atu o se tasi o a ma uō e pei e iai se mea o popole ai.
Na ia faapea mai, “E iai se faalavelave faafuaseʻi o loo tupu ua aafia ai Davey.”
Na ou fesili atu ma loʻu popole tele, “O OK Davey?”
Na umi se taimi o oʻu faatali mo sana tali, ae fai mai loa ua maliu Davey.
Ina ua uma ona ma talanoa, na ou tatalo loa iā Ieova mo le malosi. Na ou alu i le faleʻaiga ma fai atu i le isi vaega pe mafai ona matou ō i le fale, ona ua lē lelei laʻu faalogo. Ou te leʻi manaʻo e taʻu iā Kaye le mea ua tupu seʻia na o maʻua.
Na sili ona faigatā iā te aʻu le 90 minute a o matou toe foʻi atu i le fale. Na ou lagona atu le tala fiafia o Kaye i le isi vaega e faatatau i le malaga mai o Davey e asi i maʻua. I le taimi lea, e leʻi iloa lava e Kaye ua maliu Davey, ae ua tele feʻau tusitusia o faamāfanafanaga ua lafo mai e isi i laʻu telefoni.
Ina ua uma ona momoli isi ulugalii, na ma toe foʻi loa i le fale. Na tasi lava le vaai a Kaye iā te aʻu ia iloaina ua iai le mea ua faalētonu. Na ia fesili mai, “O le ā le mea ua tupu?” Na ou iloa o le tali i le fesili a Kaye o le a matuā tuia ai lona loto, e pei foʻi ona tuia loʻu loto ina ua ou maua le valaau i le pe ā ma le lua itula muamua atu.
Onosaia le Maliu o Sē e Pele
E iai luʻi na ma fesagaʻia muamua ma na ma iloa ai e faamāfanafanaina e Ieova ona tagata. (Isaia 41:10, 13) Peitaʻi, e ese le luʻi lenei mai i luʻi uma na ma fesagaʻia. Na fesili pea loʻu mafaufau, ʻE faapefea ona tupu lenei mea iā Davey, o sē na faia le tele o mea mo le auaunaga iā Ieova? Aiseā e leʻi puipuia ai o ia e Ieova?’
Na matuā mafatia foʻi si a ma fanau. Na pei Lauren o se isi tinā o Davey, ma o le mea lea na matuā mafatia ai lava o ia. Na matuā mafatia foʻi Michael. E ui ua lima tausaga o matou nonofo eseese ma Michael, ae na ia matuā talisapaia le tuputupu aʻe o lona uso e avea ma talavou taʻumatuaina.
Ina ua tulaʻi mai lenei faafitauli, na vave ona fesoasoani mai le faapotopotoga. O se faataʻitaʻiga, e ui e leʻi talia lelei e Kaye le mea moni ua maliu Davey, ae na gasolo mai pea uō mai le faapotopotoga e faamāfanafana ma fesoasoani mai iā i matou. (Faataoto 17:17) E lē galo iā te aʻu le alofa na latou faaalia!
Ina ia faaitiitia lo ma faavauvau, na ma tausisi pea ma Kaye i le ma faasologa o le tatalo, suʻesuʻeina o le Tusi Paia ma le auai pea i sauniga faa-Kerisiano. E ui e leʻi aveesea atoatoa ai o ma tigā, ae na ma iloa e tāua le faia o na mea ina ia ma malolosi ai pea faaleagaga.—Filipi 3:16.
Lauren ma lana tane o Justin
I le taimi lenā, na toe siitia mai ai Michael ma Diana e nonofo latalata mai iā i maʻua, ae toe foʻi mai Lauren i le matou faapotopotoga faa-Peretania. O le matou faifaimea faatasi i isi tausaga na sosoo ai, na fesoasoani e tuuitiitia ai o matou faalogona faavauvau ona o le maliu o Davey. Ina ua faaipoipo mulimuli ane Lauren, na avea lana tane o Justin ma fesoasoani aogā iā i matou.
Se Faigāmalaga Faigatā
E iai se isi mea e sili ona faigatā na matou faia ina ua mavae le maliu o Davey, ae na mulimuli ane avea o se faamanuiaga. O le a faamatala atu e Kaye le tala.
“Ina ua taʻu mai e laʻu tane ua maliu Davey, na pei ua leai soʻu faamoemoe ma na umi se taimi o oʻu faavauvau. O loʻu mafatia tele na faigatā ai ona ou faia mea i aso faisoo ma na ou tagi i le tele o taimi. O le mea moni, e iai taimi na ou ita ai iā Ieova ma isi tagata o loo soifua pea. E leʻi saʻo laʻu vaai i le tele o mea.
“Na ou manaʻo ou te alu i Dominican Republic i le mea na nofo ma auauna ai Davey iā Ieova a o leʻi maliu. Ae i le taimi e tasi, na ou lagona le matuā mafatia ma na ou manatu e lē lava loʻu malosi ou te malaga ai i se mea mamao.
“E iai saʻu uō vavalalata na faapea mai o loo mafatia foʻi uō a Davey o loo i Dominican Republic, ma o loo fia feiloaʻi i le aiga o Davey. O lana fesoasoani na faamalosia ai aʻu ina ia ou alu.
“O le matou malaga o le mea tonu lava lea na manaʻomia e lo matou aiga. O i inā na matou iloa ai le ituaiga tagata faaleagaga e iai Davey. E na o le toʻatasi le toeaina i le faapotopotoga na iai Davey, ma na ia taʻua lona maufaatuatuaina o Davey i so o se faaeaga na tuuina atu i ai.
“A o matou sāvali solo i le vaipanoa na nofo ai Davey, na ō mai tagata ma faamatala mai mea lelei na ia faia mo i latou. Na ou iloa o si aʻu tama o se tagata lelei, ae o lenei faigāmalaga ua faamautinoa atili mai ai iā te aʻu taumafaiga a Davey ina ia mulimulituʻi i tulaga aao o Iesu.
Davey a o auauna i Dominican Republic
“Na matou feiloaʻi foʻi ma se tasi na suʻesuʻeina le Tusi Paia ma Davey, o se tamāloa na faataotolia i lona moega i lona tamaʻi fale. E matuā mativa lenei tamāloa, ae na faapea mai uso ma tuafāfine o le faapotopotoga, na feutagaʻi Davey ma ia i se auala faaaloalo ma agalelei. Na ou matuā fiafia lava ina ua ou faalogo i lenā tala!
“O le faigāmalaga lea na sili ona faigatā mo aʻu. Ae na fesoasoani le mafatia faatasi ma i latou na iloa Davey, ma faamāfanafana le tasi i le isi. Na pei ua tuuitiitia ai lo matou lotomafatia.”
Faalaeiauina i le Faaaʻoaʻoga a Davey
I le Awake! o Ianuari 8, 2005, na lomia ai se mataupu e faatatau i le maliu o Davey ma lana auaunaga i Dominican Republic. I lenā taimi, e matou te leʻi iloa o le a aogā lenei mataupu i isi. O se faataʻitaʻiga, iā Me 2019 na fesootaʻi mai ai se uso e igoa iā Nick ma faapea mai:
“I le faaiʻuga o le 2004, a o oʻu iai i le aʻoga maualuga, e leʻi iai ni oʻu sini faaleagaga ma ou te leʻi fiafia. Na ou tatalo iā Ieova ia fesoasoani mai iā te aʻu ina ia faaaogā tatau loʻu tulaga talavou. E leʻi umi ae ou faitau loa i le tala e faatatau iā Davey i le Awake! ma o le tali lenā i aʻu tatalo!
“Na ou tuua loa le aʻoga ma amata laʻu paeonia. Na ou faatū foʻi se sini e aʻoaʻo le gagana Sipaniolo ma siitia atu i se isi atunuu. Mulimuli ane, na ou auauna i Nicaragua ma na ou auai foʻi i le Aʻoga mo Tagata Talaʻi o le Malo faatasi ma laʻu avā. Pe a fesili mai tagata po o le ā na uunaʻia ai aʻu e paeonia, ou te faamatala i ai le tala e faatatau iā Davey.”
Na ma maua foʻi se isi faalaeiauga ina ua ma feiloaʻi i se tuafafine e igoa iā Abi. Na tofia o ia i le faletalimālō na matou api ai, i le Tauaofiaga Faavaomalo i le 2019 na faia i Buenos Aires, i Anitenitina. E ese le agalelei ma alofa o Abi, ma na faamanatu mai ai iā i maʻua ma Kaye uiga o Davey.
O le tala e faatatau iā Davey, na uunaʻia ai Abi ia ulu atu i le auaunaga faataimi atoa ma siitia atu i se oganuu maotua
Ina ua ma foʻi i le ma potu, na ma lafoina iā Abi se link o le mataupu e faatatau iā Davey o loo i le Awake! E leʻi umi lava ae toe tali mai o ia, ma na matuā naunau e talanoa mai iā i maʻua. O lea na matou feiloaʻi ai i le potu faatalitali o le faletalimālō. O i inā na ia faamatala mai ai ma loimata, o le tala e faatatau iā Davey na uunaʻia ai o ia e amata lana paeonia iā Setema 2011, ma auauna i se oganuu maotua i se taimi mulimuli ane. Na ia faapea mai: “Pe a ou fesagaʻia luʻi ma faafitauli i loʻu faaeaga, ou te toe faitau i lenā mataupu.” Na iai foʻi iā te ia se kopi o le Awake!
O tala faapenei e faailoa mai ai, o i tatou o se vaega o le ʻauaiga i le lalolagi aoao. E lē mafaatusalia le autasi o tagata o Ieova!
E faamāfanafanaina i maʻua ma Kaye i le iloaina na iai se aafiaga lelei o le faaaʻoaʻoga a Davey i isi. O le mea moni, e faapena foʻi isi talavou uma o loo faia le mea sili i le auaunaga iā Ieova. Atonu e latou te lē o iloa, o lo latou maelega ma a latou faaaʻoaʻoga, ua uunaʻia ai foʻi isi ina ia faia le mea sili i le latou auaunaga iā Ieova.
“O Loo Latou Feola Uma iā te Ia”
I le Luka 20:37, na taʻua ai e Iesu fetalaiga a Ieova, ina ua ia fetalai e faatatau iā te ia lava, “o le Atua o Aperaamo, o le Atua o Isaako, ma le Atua o Iakopo.” E leʻi fetalai Ieova e na o le taimi sa latou feola ai na avea ai o ia ma o latou Atua. Nai lo o lea, o loo avea pea o ia ma o latou Atua. Aiseā? Na faapea mai Iesu i le fuaiupu e 38: “O loo latou feola uma iā te ia.”
Ioe, e silasila Ieova i ana auauna faamaoni ua maliliu, e peiseaʻī o loo feola pea i latou. E faailoa mai ai iā i tatou, e maumauaʻi o ia e toe faatutūina mai i latou! (Iopu 14:15; Ioane 5:28, 29) Ou te mautinoa o faalogona foʻi na o Ieova mo Davey, ma isi ana auauna ua maliliu.
E ui i loʻu naunau e toe fia vaai iā Davey, ae e sili atu ona ou manaʻo ia toe feiloaʻi Kaye ma si oʻu atalii. E leai se isi na sili ona mafatia e pei o Kaye. E ese le pāʻia o loʻu loto i upu o loo i le Luka 7:15, lea e faapea mai: “Ua tū i luga lē na oti ma amata ona tautala, ona avatu lea o ia e Iesu i lona tinā.”
Iā Setema 2005, na amata ai ona ou auauna o se paeonia. O se faaeaga le paeonia faatasi ma laʻu avā, o le ma fanau, ma o la taʻitoʻalua. I le avea o se aiga autasi, e matou te lagolagosua le tasi i le isi ma taulaʻi atu i lo matou faamoemoe mo se lalolagi fou, lea o le a toe feiloaʻi ai ma si a ma tama pele o Davey.