Na matou feola faatasi aʻe ma loʻu tuafafine matua ma loʻu uso i nuu maotua i Egelani e latalata i le aai o Bicester i Peretania. Na matou nonofo mautotogi ma oʻu mātua i se fale i se faatoʻaga. I le 19 o oʻu tausaga, na ou auai ai i le auaunaga paeonia e pei o oʻu tei matutua. Mulimuli ane, na tofia aʻu e auauna o se paeonia faapito i Sikotilani. I le 23 o oʻu tausaga, na valaaulia ai aʻu e auauna i le Peteli i Lonetona i le 1970. O i inā na ou aʻoaʻoina ai le gagana faataga lea na suia ai loʻu olaga. Na matuā tauia loʻu olaga ma maua le faamalieina.

Aʻoaʻoina o le Gagana Faataga

 A o oʻu iai i le Peteli, na tofia aʻu i le faapotopotoga a Molimau a Ieova i Mill Hill, lea na ou feiloaʻi ai ma nisi o Molimau e logonoa. Ou te leʻi manaʻo e avea aʻu o se tagata ese iā i latou ona e eseese a matou gagana. O lea, na ou filifili ai e matou te nonofo faatasi ma uso ma tuafāfine logonoa i sauniga.

 E leʻi iai ni faapotopotoga i le gagana faataga i Peretania i le taimi lenā. Na auai tagata logonoa i sauniga na faia i le gagana Peretania lea na faaliliuina ai e uso ma tuafāfine le polokalame i le upu i le upu e faaaogā ai tāga. Na matuā onosaʻi mai uso ma tuafāfine logonoa a o latou aʻoina aʻu i le gagana faataga. O i inā na ou iloa ai, e matuā ese lava le latou gagana mai i isi gagana uma. O le mea moni, e latou te leʻi malamalama i le gagana Peretania. Ina ua ou malamalama i lo latou tulaga, na atili ai ona ou alofa ma faaaloalo i nei uso ma tuafāfine pele, ona o lo latou auai ma le faamaoni i sauniga faa-Kerisiano. Na faamalosia ai foʻi loʻu faanaunauga ina ia ou matuā lelei i le gagana faataga.

 E iai le gagana aloaʻia mo tagata logonoa i Peretania, lea e taʻua o le BSL po o le gagana faataga a Peretania. A o faasolo taimi, na faaaogā e le ʻaufaaliliu i a matou sauniga lenā gagana, nai lo o le faia o tāga e mulimuli i le upu i le upu i le faa-Peretania. O le iʻuga, na amata ona malamalama lelei uso ma tuafāfine logonoa i sauniga. Na atili ai foʻi ona latou autasi ma uso ma tuafāfine e lē logonoa. Pe a ou toe mafaufau i le silia ma le 50 tausaga ua mavae, ua ou vaaia le tele o le faamanuia a Ieova i le oganuu e faaaogāina le gagana faataga. Seʻi oʻu faamatala atu ni mea mataʻina na tutupu na tofia aʻu e Ieova e faia ai soʻu sao.

Agaʻigaʻi i Luma le Oganuu e Faaaogāina le Gagana Faataga

 I le 1973 i le pe ā ma le tausaga talu ona ou auauna o se toeaina, na faapea mai ai se uso logonoa e igoa iā Michael Eagers e faia nisi o a matou sauniga i le BSL. Ina ua talia e le lālā le talosaga, na ma faatulaga loa ma se isi toeaina sauniga i le gagana faataga e faia i masina taʻitasi i Deptford i le itu i saute i sasaʻe o Lonetona.

 Maʻeu ni iʻuga lelei na maua mai ai! Na auai uso ma tuafāfine logonoa mai i Lonetona ma isi vaipanoa i le itu i saute i sasaʻe o Egelani i le sauniga muamua na faia i le gagana faataga a Peretania. Ioe, na maua e uso ma tuafāfine ma tagata fiafia logonoa meaʻai faaleagaga i la latou lava gagana! Ina ua uma le sauniga, na matou fefaalaeiauaʻi ma olioli i ni nai taumafataga māmā. Na ou maua foʻi le avanoa e faia ai ni asiasiga faaleoleo mamoe na manaʻomia e uso ma tuafāfine.

 Mulimuli ane, na faia foʻi sauniga i le gagana faataga i aai o Birmingham ma Sheffield. E toʻatele uso ma tuafāfine e lē logonoa na auai i sauniga, o ē na naunau e aʻo le BSL. O le toʻatele o i latou na mulimuli ane fesoasoani e faalautele atu le oganuu a le gagana faataga i isi vaipanoa o le atunuu.

Ua Ou Maua se Avā Lelei

 I le 1974, na ou feiloaʻi ai iā Stella Barker o se tuafafine lalelei na auauna o se paeonia faapito i se faapotopotoga e lata ane i le Peteli. Na faasolo ina māfana o ma faalogona alofa o le tasi i le isi, ma faaipoipo ai i le 1976. Ina ua uma ona ma faaipoipo, na ma auauna faatasi o ni paeonia faapito. Na ma auai i le faapotopotoga i Hackney i le itu i mātū o Lonetona, ma na fesoasoani mai Stella i le oganuu a tagata logonoa. Pe a ou toe mafaufau i ai, ou te faapea atu ma le mautinoa, o le ma auauna faatasi o ni paeonia o se tane ma se avā, o se amataga sili lea ona lelei o le ma faaipoipoga.

 E leʻi umi ae valaaulia i maʻua ma Stella e galulue tausāvali i le Peteli. Na matuā pisi lava o ma olaga. Na ou galue foʻi o se ovasia matagaluega suitulaga, ma faiaʻoga i le Aʻoga o le Faiva o le Malo mo toeaina. Mulimuli ane, na ou fesoasoani i le faamaopoopoina o le faaliliuina o tauaofiaga itumalo faa-Peretania i le gagana faataga. E ui ina ma lē lavavā, ae na ma lagona le olioli ma le faafouina.—Mataio 11:28-30.

 Na faaopoopo i a ma avega tauave le olioli o le avea ma mātua. I le 1979, na fanau ai le ma tama tama o Simon, ae i le 1982 na fanau ai Mark. Na faapefea ona ma taulimaina nei tiute tauave? Na ma filifili ma Stella, po o ā lava faaeaga mamao e tofia i ai aʻu, o le a matou malaga faatasi o se aiga ma faaalu se taimi e tafafao ai. Na ma mananaʻo e iloa e le ma fanau, o le auauna iā Ieova e matou te maua ai le fiafia. O le ā le iʻuga? A o tuputupu aʻe le ma fanau, na la aʻoaʻoina le gagana faataga ma amata ai foʻi ona la paeonia. E lē gata i lea, i le pe ā ma le 40 tausaga talu ona foaʻi le tamaʻi povi a oʻu mātua i le Peteli, ae amata foʻi le auaunaga a Simon ma Mark. Maʻeu lo matou fiafia!

Fesoasoani i Manaʻoga o Tagata Logonoa

 E oo ane i le taufaaiʻuiʻuga o le vaitausaga o le 1990 i le 1999, e leʻi iai lava ni toeaina logonoa i Peretania, ae na o auauna o le faiva. O lea na filifili ai toeaina e lē logonoa ma e lē iloa le gagana faataga, pe e iai nisi o na uso “e agavaa e aʻoaʻo atu” ma avea o ni ovasia. (1 Timoteo 3:2) O se tasi o auauna o le faiva e logonoa, e igoa iā Bernard Austin sa auai i se faapotopotoga faa-Peretania. O se uso e taʻumatuaina ma e matuā alofa i mamoe a Ieova. Na matuā ou fiafia lava ina ua ou iloa ua tofia Bernard o se toeaina. O ia o le toeaina logonoa muamua i Peretania.

 Na iai se mea mataʻina na tupu i le 1996. Na faamaonia e le lālā le faavaeina o le faapotopotoga muamua i le gagana faataga i Peretania, lea na faatūina i Ealing i le itu i sisifo o Lonetona. E tele isi suiga mataʻina na tutupu mulimuli ane.

Aogā Mai i Faatasiga Uma Faa-Kerisiano

 I le vaitausaga o le 1980 i le 1999, na ou galue atu ai mai i loʻu fale mo le Matagaluega o le Auaunaga i le Peteli i le taliina o fesili e faatatau i le oganuu a tagata logonoa. E iai nisi o taimi e tusi atu ai uso i le lālā ma fesili pe e faapefea ona latou fesoasoani i tagata logonoa, e malamalama i lauga e faia i le gagana Peretania i sauniga, fonotaga, ma tauaofiaga. I le taimi muamua, e leʻi iai ni sauniuniga aloaʻia mo le gagana faataga i faatasitasiga tetele. E leʻi iai foʻi ni lomiga i le gagana faataga. O lea la, e masani ona ou faalaeiauina uso logonoa ma uso e lē logonoa ina ia onosaʻi ma faatalitali iā Ieova.

 Na tauia lo matou onosaʻi. E leʻi umi ae faamaopoopo e le lālā le faaliliuina o sauniga ma fonotaga faa-Peretania i le gagana faataga. E lē gata i lea, na nonofo foʻi tagata logonoa i le pito i luma lea na mafai ai ona latou iloa lelei atu le failauga ma le tagata faaliliu. Na lagona e uso ma tuafāfine logonoa le tele o le alofa o Ieova iā i latou, ma o i latou o se vaega tāua o lona aiga faaleagaga.

 Na faia le uluaʻi fonotaga faapitoa i le gagana faataga i le Maota mo Fonotaga i Dudley i le vaipanoa o West Midlands, iā Aperila 1, 1995. Na ou fesoasoani i le uso o David Merry, o lē sa avea muamua ma ovasia matagaluega i le faamaopoopoina o le fonotaga. E faitau selau maila na malaga mai ai nisi o uso ma tuafāfine logonoa e auai i le fonotaga. O nisi na malaga mai i Sikotilani i le itu i mātū, a o isi na malaga mai i Cornwall i le itu i saute i sisifo. Ou te manatua pea lo matou matuā fiafia ina ua auai le silia ma le 1,000 i lenei fonotaga iloga.

 I le 2001, na valaaulia ai i maʻua ma le uso o Merry e le lālā e faamaopoopo se tauaofiaga itumalo mo le gagana faataga a Peretania i le tausaga e sosoo ai. E tele galuega na aofia ai. E toʻatele ē na tauofo ma na faamanuia e Ieova a latou taumafaiga. Na taulau manuia le tauaofiaga ma e lē mafai ona galo. Mulimuli ane, na ou galue o se ovasia i le faamaopoopoina o fonotaga ma tauaofiaga i le gagana faataga mo le tele o tausaga, seʻia oo ina tofia e Ieova ni uso talavou agavaa e tauaveina lenā faaeaga.

Vitiō mo Tagata Logonoa

 I le 1998, na matuā faafiafiaina i matou ina ua tatala e le faalapotopotoga a Ieova kaseti vitiō o le polosiua, O le ā e Manaʻomia e le Atua mai iā i Tatou? O le lomiga muamua lenā i le gagana faataga a Peretania. Na matou faaaogāina na kaseti vitiō e faia ai le tele o suʻesuʻega faale-Tusi Paia.

 I le tauaofiaga i le 2002, na faaliliuina ai pese o le Malo i le gagana faataga a Peretania mo le taimi muamua. Na mafai e uso ma tuafāfine logonoa ona faia tāga o pese e mulimuli i le tagata faaliliu, ma latou usuina faatasi upu matagofie o pese ma pāʻia ai o latou loto i le musika. E lē mafai ona galo iā te aʻu se toeaina logonoa na tagi ona o le fiafia a o latou usuina faatasi se pese i le tauaofiaga mo le taimi muamua.

 E iai foʻi se isi mea mataʻina na tupu i le tauaofiaga i le 2002. Na valaaulia le faapotopotoga e faaaogāina le gagana faataga i Lonetona e saunia se vitiō o se tala faale-Tusi Paia. E faapefea ona matou faia lenā mea, ae e leai ni o matou tomai i le puʻeina o se tala faale-Tusi Paia? Na toe fesoasoani mai Ieova i le saʻilia o uso e iloa puʻe ma tuufaatasi vitiō. Na taulau manuia na taumafaiga. E lē gata i lea, o tomai na matou maua mai ai, na fesoasoani tele iā te aʻu. I le vā o le 2003 ma le 2008, na tofia aʻu i le Peteli e vaaia le saunia o vitiō o tala faale-Tusi Paia mo tauaofiaga i le gagana faataga a Peretania i le lumanaʻi.

 Na ma fiafia ma Stella i le auauna faatasi ma le ma fanau tama i le Peteli. Peitaʻi e faigatā le galuega. Ina ua mavae vaiaso o faataʻitaʻi ma puʻe vitiō, na lagona e ē na faatinoina ma puʻeina le tala le vaivai o le tino ma le mafaufau. Ae na matuā tauia a matou taumafaiga. Na matou lagona le olioli ina ua matou vaaia le faagaeetia o uso ma tuafāfine logonoa i tala faale-Tusi Paia. E toʻatele i latou na fetagisi ona o le fiafia.

 Na faamanuia pea e Ieova uso ma tuafāfine logonoa. I le 2015, na matou maua ai foʻi vitiō o lomiga mo suʻesuʻega o Le Olomatamata i le gagana faataga a Peretania. Na tatala foʻi i le 2019 le tusi o le Tusi Paia o Mataio i le gagana faataga. Ua matou maua nei le Tusitusiga Paia Eleni atoa, ma o loo galulue pea uso i le saunia o le Tusitusiga Paia Eperu. E matuā talisapaia e uso ma tuafāfine logonoa le fesoasoani a Ieova.

 Ona o i tatou o tagata o Ieova, ua avea la i tatou o se vaega o lona aiga faaleagaga e faaatagia atu le alofa lē faailoga tagata o lo tatou Tamā i le lagi. (Galuega 10:34, 35) E matou te maofa ma loʻu aiga i le tele o le taimi, malosi, ma meafaitino o loo faaalu e le faalapotopotoga a Ieova, e fesoasoani ai i tagata uma e aofia ai tagata logonoa ma i latou e pō le vaai. a

 Ua matuā tauia na taumafaiga, auā ua iai isi faapotopotoga i le gagana faataga i Peretania. O le faia o se sao i le agaʻigaʻi i luma o le gagana faataga mai i se “amataga faatauvaa,” ua ou maua ai le tele o le olioli ma le faamalieina. (Sakaria 4:10) Ua alagatatau ai ona avatu iā Ieova le viiga, auā o loo ia taʻitaʻia lana faalapotopotoga. Ua ia faaauupegaina ana auauna e faalauiloa atu le tala lelei i ituaiga uma o tagata. E na te faatupuina le fatu o le Malo i loto o ē ua tatau i ai le feʻau.