Na ou fanau i le 1941 i Virrat i Finilani, mai i se aiga e logonoa le toʻatele. E logonoa uma oʻu mātua, o le toʻatele o o matou tauaiga, ma loʻu uso ma loʻu tuafafine e lāiti ifo iā te aʻu. O lea, na matou faaaogāina le gagana faataga e talanoa ai.

 Na matuā faasā le gagana faataga i le aʻoga na ou auai ai, lea e pe ā ma le 240 kilomita (150 maila) le mamao mai i le matou aiga. I lenā taimi, na faamalosia ai e aʻoga mo tagata logonoa i Finilani le faaaogāina o le gagana tautala, ma le mātauina o le memu o gutu o isi ina ia iloa ai a latou tala o loo fai. Pe a iloa mai e faiaʻoga o loo matou faaaogāina le gagana faataga, e latou te matuā sasaina o matou lima i se laau, ma iʻu ai ina fulafula o matou tamatamaʻilima mo le tele o aso.

 Na iai se faatoʻaga a oʻu mātua, ma ina ua uma laʻu aʻoga maualuga, na ou auai ai i se aʻoga tau faatoʻaga ina ia aʻoaʻoina ai tomai o se faifaatoʻaga. Ina ua ou toe foʻi i le matou aiga, na ou vaaia ai mekasini o Le Olomatamata ma le Ala Mai! i luga o le laulau. Na faamatala mai e loʻu tamā, o nei mekasini o loo faailoa mai ai ni folafolaga mataʻina mai i le Tusi Paia, ma o loo la suʻesuʻeina ma loʻu tinā le Tusi Paia faatasi ma se ulugalii e lē logonoa. Na mafai ona fesootaʻi le ulugalii ma oʻu mātua, e ala i le fetusiaʻi o a latou faamatalaga.

 Na faamatala mai e loʻu tamā, pe a pule le Malo o le Atua, o le a avea le lalolagi ma parataiso matagofie ma o le a toe faatutūina ē ua maliliu. Ae ona na aʻoaʻoina aʻu e ō tagata lelei i le lagi, o lea na ou faapea ai e leʻi malamalama loʻu tamā i faamatalaga a le ulugalii Molimau a Ieova, ona e latou te leʻi faaaogāina le gagana faataga.

 Ina ua toe asiasi mai le ulugalii, na ou fesili i ai pe e saʻo mea na faamatala mai e loʻu tamā. Na la faapea mai, “O lenā e saʻo lelei lou tamā,” ona la faailoa mai lea o fetalaiga a Iesu e faatatau i le toetū o loo i le Ioane 5:28, 29. Na la faamatala mai le auala o le a tafiesea ai e le Atua le amioleaga mai i le lalolagi, ma o le a ola e faavavau tagata i se lalolagi filemu ma e leai ni maʻi.—Salamo 37:10, 11; Tanielu 2:44; Faaaliga 21:1-4.

 O loʻu fia iloa atili na ma suʻesuʻe ai loa le Tusi Paia ma se Molimau e lē logonoa e igoa iā Antero. Talu ai e na te lē iloa le gagana faataga, o lea na ou tusia ai aʻu tali i se pepa pe a faia fesili o le ma suʻesuʻega, ona faitau lea e Antero ma toe tusi mai isi fesili po o nisi faamatalaga. Na ia faaaogāina ma le onosaʻi lenei auala e faia ai le ma suʻesuʻega mo le lua itula i vaiaso taʻitasi.

 I le 1960, na ou auai ai i se tauaofiaga a Molimau a Ieova na faaliliuina i le gagana faataga. I le aoauli o le Aso Faraile, na faasilasila mai ai o le a faia se papatisoga i le aso e sosoo ai. O lea, i le taeao o le Aso Toonaʻi, na ou alu ai ma loʻu solo ma loʻu ofu e sui ai, ma na ou papatiso ai loa i lenā aso. a E leʻi umi ae papatiso foʻi oʻu mātua, ma loʻu uso ma loʻu tuafafine laʻitiiti.

 Na ou manaʻo e faasoa atu mea na ou aʻoaʻoina i isi tagata logonoa, ma o le auala sili e faia ai faapea o le faaaogā o le gagana faataga. O lea, na amata ai loa ona ou talaʻi i tagata logonoa i le matou aai.

 E leʻi umi ae ou siitia atu i Tampere, o se aai e tele ai falegaosimea. Sa ou saʻilia tagata logonoa e ala i loʻu alu i fale taʻitasi ma fesili i ai pe e latou te iloa ni tagata logonoa. O le auala lea na maua ai aʻu suʻesuʻega faale-Tusi Paia, ma i ni nai tausaga, ae ua silia ma le toʻasefulu tagata talaʻi logonoa i Tampere.

 I le 1965, na ou feiloaʻi ai i se tuafafine lalelei e igoa iā Maire, ma na ma faaipoipo i le tausaga na sosoo ai. Na vave ona aʻoaʻoina e Maire le gagana faataga, ma na avea o ia o se tuafafine faamaoni ma galue mamafa mo le 50 tausaga na ma auauna faatasi ai iā Ieova.

 E lua tausaga talu ona ma faaipoipo ae fanau le ma tama tama o Marko, ma e lē logonoa. I le matou aiga, na ia aʻoaʻoina ai le gagana Finilani, o lana gagana muamua lea, faapea le gagana faataga a Finilani. Na papatiso Marko i le 13 o ona tausaga.

 A o faagasolo taimi, e toʻatele tagata fou na auai i le matou vaega i le gagana faataga i Tampere. O lea, i le 1974, na matou siitia ai i le aai o Turku, lea e lē iai ni Molimau logonoa. Na matou toe saʻilia tagata logonoa i inā, e ala i le fesili atu i aiga i fale taʻitasi. A o matou iai i Turku, na papatisoina ai le toʻa 12 o tagata na matou suʻesuʻeina le Tusi Paia.

 I le 1987, na valaaulia ai Marko e galue i le Peteli. Ina ua faatupulaʻia le aofaʻi o le matou vaega i le gagana faataga i Turku, na ma faia loa ni fuafuaga e toe siitia atu i se isi nofoaga.

 E oo mai i le taimi lenā, ua mafai ona matou saʻoloto e talaʻi i Europa i Sasaʻe. O lea, iā Ianuari 1992, na ma malaga atu ai ma se isi uso logonoa i Tallinn, i Estonia.

 Na matou feiloaʻi i inā ma se tuafafine Kerisiano e logonoa lona tuagane. E ui e leʻi fia faalogo lona tuagane i le feʻau o le Malo, ae na lotomalie lava e fesoasoani mai ina ia maua le toʻatele o tagata Estonia e logonoa. I le pō mulimuli o le ma asiasiga, na ia ave ai i maʻua i se fonotaga na faia e le Faalapotopotoga o Tagata Logonoa i Estonia. Na vave ona ma taunuu i le nofoaga na faia ai le fono, ma fola i luga o se laulau le tele o mekasini ma tusi i le gagana Estonia ma le gagana Rusia. E pe ā ma le 100 tusi ma mekasini e 200 na ave e tagata, ma pe tusa e 70 tagata fiafia na faailoa mai a latou tuatusi. O i inā na amata mai ai le galuega talaʻi i le gagana faataga i Estonia.

 E leʻi umi ae fai ma ma masani ma Maire le malaga atu i Estonia e talaʻi ai. Na faaitiitia o ma taimi faigaluega ae talosaga atu e avea o ni paeonia sauatoa. I le 1995, na ma ō ai e nonofo latalata i Helsinki ina ia faigofie ai ona ma malaga i le vaa i Tallinn. E tele atu faamanuiaga ma mea na faataunuuina i le ma faiva i Estonia, nai lo o mea na ma mafaufauina.

 E toʻatele tagata sa matou suʻesuʻeina faatasi le Tusi Paia. O le toʻa 16 o i latou na agaʻigaʻi i luma ma papatiso, e aofia ai se ʻauso teine e toʻalua e tauaso toe logonoa. Na faia la matou suʻesuʻega e ala i lo la fetagofi mai i oʻu lima, a o oʻu faia le gagana faataga (tactile signing).

 E leʻi faigofie le suʻesuʻe ma tagata logonoa. Talu ai e leʻi iai ni lomiga i le matou gagana faataga i lenā taimi, o lea na ou aoaoina ai le tele o ata mananaia mai i a tatou lomiga ma tuufaatasi i se tusi e tasi.

 Na talosaga mai le lālā i Finilani, pe e mafai ona ou alu i Latvia ma Lithuania e vaai po o ā ni mea e mafai ona fai e fesoasoani ai i tagata logonoa i na atunuu. E tele taimi na matou asiasi ai i na atunuu, ma fesoasoani i tagata talaʻi i inā e saʻili tagata logonoa. E toeitiiti tofu le atunuu ma la latou lava gagana faataga. O lea, na ou aʻoaʻoina ai le gagana faataga a Estonia, Latvia ma Lithuania, faatasi ai ma le gagana faataga a Rusia, lea e faaaogā e tagata Rusia logonoa o loo nonofo i na atunuu.

 Ae o le mea e faanoanoa ai, ina ua mavae le valu tausaga talu ona ma femalagaaʻi i Estonia, Latvia ma Lithuania, na tatau ona tuua le ma auaunaga i na atunuu ona ua maua Maire i se maʻi, lea e tetete ai le tino (Parkinson’s disease).

 I le 1997, na amata ai i le lālā i Finilani se vaega faaliliu mo le gagana faataga. Talu ai na ma nonofo latalata i le lālā, na mafai ai ona ma fesoasoani e saunia lomiga i le gagana faataga, ma e oo mai i aso nei, o loo oʻu faia pea faapea i nisi taimi. Na matou galulue faatasi ma le ma tama o Marko. Mulimuli ane, na mafai foʻi ona fesoasoani Marko ma lana avā o Kirsi e toleni vaega faaliliu i gagana faataga i isi atunuu.

 E lē gata i lea, na faamaopoopo foʻi e le ofisa o le lālā ni aʻoga e fesoasoani ai i tagata talaʻi e lē logonoa, e aʻoaʻo le gagana faataga. O le fesoasoani a nei aʻoga, ua mafai ai ona auai le toʻatele i vaega ma faapotopotoga e faaaogāina le gagana faataga, ma fesoasoani i a latou talaʻiga, sauniga, ma isi tiute tauave i le faapotopotoga.

 I le 2004, na ma fesoasoani ai ma Maire e amata le faapotopotoga muamua i le gagana faataga a Finilani i Helsinki. E uma ane le tolu tausaga, ua malosi ma maelega le faapotopotoga, ma ua toʻatele paeonia ua iai.

 O lea, na ma toe fuafua ai loa e siitia i se vaipanoa o loo tele ai le manaʻoga. I le 2008, na ma nonofo ai e latalata i Tampere, ma toe auai i le vaega i le gagana faataga lea na ma iai i le 34 tausaga ua mavae. Ina ua mavae le tausaga, na avea lenā vaega i le gagana faataga ma faapotopotoga. O le faapotopotoga lona lua lea i le gagana faataga ua iai i Finilani.

 O le taimi lea ua faasolo lava ina leaga le maʻi o Maire, ma na ou tausia o ia seʻia oo ina maliu i le 2016. E ui ou te misia si aʻu avā pele, ae ou te tulimataʻia le toe vaai iā te ia i le lalolagi fou pe a lē toe iai se maʻi.—Isaia 33:24; Faaaliga 21:4.

 E oo mai i le taimi lenei, o loo tumau pea loʻu faanaunauga e faaoo atu le tala lelei i isi tagata logonoa, o se galuega na ou faia i le 60 tausaga ua mavae.