E amata atu i lenei tausaga, o le a tele atu le taimi e tatou te sauniuni ai mo le Faamanatuga o le maliu o Keriso. Pe afai e paʻū le Faamanatuga i se aso o le vaiaso, o le a leai la se Sauniga o le Faiva ma le Olaga Faa-Kerisiano i lenā vaiaso. Ae afai e paʻū le Faamanatuga i se faaiʻuga o le vaiaso, o le a leai se lauga i le lautele ma se Suʻesuʻega o Le Olomatamata. Po o le a e faaaogā tatau lenā taimi faaopoopo? E pei lava o le uluaʻi senituri, e iai tapenapenaga aogā e tatau ona faia mo lenei sauniga faapitoa. (Lu 22:7-13; km 3/15 1) Peitaʻi, e tatau foʻi iā i tatou uma ona sauniunia o tatou loto. E faapefea ona faia faapea?

• Ia mafaufau i le tāua o le auai i le Faamanatuga.​—1Ko 11:23-26

• Ia tatalo ma mafaufau i la oulua faiā ma Ieova.​—1Ko 11:27-29; 2Ko 13:5

• Ia faitau ma manatunatu loloto i mataupu faale-Tusi Paia o loo talanoaina ai le tāua o le Faamanatuga.​—Ioa 3:16; 15:13

O nisi tagata talaʻi e faitau ma manatunatu loloto i le faitau Tusi Paia o le Faamanatuga, o loo i le tusi Iloiloina Tusitusiga Paia i Aso Taʻitasi. O nisi e latou te faitauina mau o loo iai i le siata o loo i lenei mataupu. Ae o isi e latou te autaluina mataupu i Le Olomatamata o loo talanoaina ai le Faamanatuga, faapea le alofa o Ieova ma Iesu iā i tatou. Po o le ā lava le auala ua e filifili e faaaogā, tau ina ia aogā lenā auala ia atili ai ona e vavalalata atu iā Ieova ma lona Alo.