MĀFUAAGA E TĀUA AI: Afai “o manatunatuga i le loto o le tagata, o vai loloto ia,” o fesili la ua pei o se pakete o loo utufia mai ai manatu o tagata. (Fat 20:5) E fesoasoani fesili ina ia faaaofia ai la tatou ʻaufaalogologo. O tali i fesili e filifilia lelei, e masani ona iloa ai itu e manaʻomia ona faaleleia atili. Na faaaogā lelei e Iesu fesili. E faapefea ona tatou faaaʻoaʻo iā te ia?

LE AUALA E FAI AI:

• Fai atu fesili e faaalia mai ai manatu. Na fai atu e Iesu ni fesili ina ia iloa ai manatu o ona soo. (Mat 16:13-16; be 238 ¶3-5) O ā ni fesili e mafai ona e fai atu ina faaali mai ai manatu o tagata?

• Fai atu fesili tataʻi. Ina ia faasaʻo manatu o Peteru, na fai atu e Iesu ni fesili faapea ma tali ina ia fesoasoani iā Peteru e maua le manatu saʻo. (Mat 17:24-26) O ā ni fesili tataʻi e mafai ona e faaaogā ina ia fesoasoani i se tasi e maua le manatu saʻo?

• Faamālō i lau ʻaufaalogologo. Na faamālō atu Iesu i se tusiupu na “tali mai ma le atamai” iā te ia. (Mar 12:34) E faapefea ona e faamālō i se tasi pe a tali mai i sau fesili?

MAIMOA I LE VAEGA MUAMUA O LE VITIŌ IA FAI LE GALUEGA NA FAIA E IESU​—AʻOAʻO, ONA TALI LEA O FESILI NEI:

• Aiseā e faapea atu ai e lē o se auala lelei lea e aʻoaʻo atu ai, e ui o loo saʻo faamatalaga o loo fai atu?

• Aiseā e lē lava ai le tau ina faamatala atu o faamatalaga?

MAIMOA I LE VAEGA LONA LUA O LE VITIŌ, ONA TALI LEA O FESILI NEI:

• Na faapefea ona faaaogā ma le atamai e le uso fesili?

• O ā nisi vala o lana aʻoaʻo atu e mafai ona tatou faaaʻoaʻo i ai?