Seʻi faapea o loo e nofo i Kalilaia a o soifua Iesu. Ua e malaga i Ierusalema e faamanatu le Tausamiga o Fale Lauvao, ma ua tumu le aai i tagata tapuaʻi mai i nuu mamao. Talu ai o loo e manaʻo e faia se taulaga iā Ieova, o lea na e alu ai ma taʻitaʻi se ʻoti e ui atu i magāala tumutumu o le aai agaʻi i le malumalu. E te taunuu atu i le malumalu, o loo iai foʻi le toʻatele o tagata o loo mananaʻo e fai a latou taulaga. Ua oo nei i le taimi e avatu ai lau ʻoti i ositaulaga, ae e toe manatua lava e iai le mea e lē o fiafia ai lou uso iā te oe, ma atonu o loo iai o ia i le aai po o lenei motu o tagata. Na faamatala mai e Iesu le mea e tatau ona e faia. (Faitau le Mataio 5:24.) E faapefea ona e tausia le filemu ma lou uso e tusa ai ma le faatonuga a Iesu? Faailoga le tali saʻo i lisi o loo i lalo.

E AO ONA E . . .

• faatoʻā talanoa i lou uso pe a e iloa e iai se māfuaaga tatau o lona lē fiafia

• taumafai e faasaʻo lou uso ona e te manatu ua maʻaleʻale naʻuā ona faalogona pe e iai foʻi sona sesē

• faalogologo ma le onosaʻi a o faailoa mai faalogona o lou uso, ma e tusa pe e te lē malamalama atoatoa, ia faatoese atu ona o ona faalogona tigā po o iʻuga foʻi e te leʻi mafaufauina o au gaoioiga

E AO I LOU USO ONA . . .

• faamatala atu i isi o le faapotopotoga le auala na e faatigā ai iā te ia

• inainā mai iā te oe, faamatala auʻiliʻili mai mea na e sesē ai, ma manaʻo e te taʻutino atu o oe e sesē

• amanaʻia lou lotomaulalo ma le lototele e talanoa atu iā te ia, ma ia faamagalo ma le lotoatoa

E ui e lē o toe faia ni taulaga i manu i la tatou tapuaʻiga i aso nei, ae o le ā na aʻoaʻo mai e Iesu e faatatau i le fesootaʻiga o le tausia o le filemu ma o tatou uso, ma le talia e le Atua o la tatou tapuaʻiga?