E tatou te mananaʻo e faafiafiaina Ieova i mea uma tatou te faia. (Fat 27:11) Ina ia faia faapea, e manaʻomia ona tatou faia filifiliga e atagia atu ai lona finagalo, e tusa lava pe e leai ni tulafono po o ni faatonuga maʻoti e taʻitaʻia ai i tatou. O le ā e fesoasoani iā i tatou?

Tausisi i se faasologa faifai pea o le suʻesuʻeina o le Tusi Paia. O taimi uma lava e tatou te faitauina ai le Tusi Paia, e tai pei o loo tatou faaalu lenā taimi ma Ieova. E tatou te malamalama i le finagalo o Ieova, e ala i le mātauina o le auala na ia feutagaʻi ai ma ona tagata, ma suʻesuʻeina faaaʻoaʻoga a i latou na faia mea lelei po o mea leaga i lana silafaga. Pe a tatou faia se filifiliga, e faamanatu mai e le agaga paia iā i tatou lesona tāua ma mataupu silisili na tatou aʻoaʻoina mai i le Afioga a le Atua.—Ioa 14:26.

Faia ni saʻiliʻiliga. Ao leʻi faia se filifiliga, ia fesili ifo, ʻO ā ni mau po o ni tala o le Tusi Paia e fesoasoani iā te aʻu e malamalama ai i le finagalo o Ieova i lenei mataupu?’ Ia tatalo mo le fesoasoani a Ieova, ma faaaogā a tatou meafaigaluega mo saʻiliʻiliga o loo maua i lau gagana, ina ia maua ai se mataupu silisili o le Tusi Paia e mafai ona faatatau i lou tulaga.—Sl 25:4.

MAIMOA I LE VITIŌ E TATAU ONA TATOU “TAUFETULI MA LE ONOSAʻI”—TAUSAMI I MEAʻAI PALENI, ONA TALI LEA O FESILI NEI:

• O ā omiga na feagai ma le tuafafine talavou i le vitiō?

• E faapefea ona e faaaogāina meafaigaluega mo saʻiliʻiliga pe a e fesagaʻia omiga faapena?

• E faapefea ona aogā le faaalu o le taimi e fai ai saʻiliʻiliga ma suʻesuʻega a le tagata lava ia, i le faia o filifiliga lelei?—Epe 5:13, 14