A o faagasolo Setema, o le a tatou faia ai ni taumafaiga malolosi e ofo atu ni suʻesuʻega faale-Tusi Paia i tagata uma, e faaaogā ai le polosiua Se Olaga Fiafia e Faavavau! E mafai ona filifili tagata talaʻi e paeonia lagolago mo le 30 itula. O le a faapefea ona faia so tatou sao i lenei tauiviga faapitoa?

• I le Uluaʻi Asiasiga: Ia faaaogā le taulimaga i le pito i tua o le polosiua e faaosofia ai le naunau o le tagata, ma taumafai e faataʻitaʻi se suʻesuʻega. Ia manatua i latou na faaalia le fiafia i le taimi muamua, e aofia ai ma toe asiga. E tusa pe e latou te leʻi mananaʻo e suʻesuʻe le Tusi Paia i le taimi muamua, ae atonu o le a latou fiafia i le auala fou e faia ai suʻesuʻega, ma lenei polosiua. E lē tatau ona tuu se polosiua i fale e lē maua ai se isi, pe lafo faatasi atu foʻi ma se tusi i se tasi e leʻi faaalia muamua le naunau. E ono faatulaga e le Komiti o le Auaunaga a le Faapotopotoga nisi faatasiga faaopoopo mo le talaʻiga a o faagasolo le masina.

• Isi Auala: Pe a faaaogā e la outou faapotopotoga ni fata tusi, ia tuu i ai le polosiua Se Olaga Fiafia e Faavavau! Pe a faaalia e se tasi le fiafia i le polosiua, ia faailoa i ai e mafai foʻi ona faia ai sana talanoaga faale-Tusi Paia, e leai se totogi. Ia faataʻitaʻi le auala e faia ai le suʻesuʻega i le taimi lenā, pe faatulaga se isi taimi e faia ai. E ono faatulaga e le ovasia o le auaunaga ni tagata talaʻi tomai e ofoina atu suʻesuʻega faale-Tusi Paia i oganuu pisinisi. E mafai foʻi ona e ofo atu se suʻesuʻega faale-Tusi Paia i ē e tou te faigaluega faatasi, po o i latou e te molimau lē fuafuaina i ai.

Na faatonuina i tatou e Iesu ina ia ʻfai tagata ma soo,’ ma “aʻoaʻoina i latou.” (Mat 28:19, 20) Tau ina ia fesoasoani lenei tauiviga faapitoa iā i tatou e faataunuu ai lenei sini, e faaaogā ai le polosiua Se Olaga Fiafia e Faavavau!