E faigofie ona pāʻia loto o tagata i vitiō, auā e fiafia e matamata ma faalogologo i ai. E fesoasoani foʻi i le tagata e uaʻi mai ma umi ona manatuaina manatu na matamata i ai. O Ieova o le faaaʻoaʻoga sili i le faaaogāina o fesoasoani vaaia ina ia aʻoaʻo atu ai.—Ga 10:9-16; Fal 1:1.

O vitiō Pe e Iai se Suafa o le Atua?, O Ai le Tusitala o le Tusi Paia?, ma le E Faapefea Ona Tatou Mautinoa e Saʻo Aʻiaʻi le Tusi Paia?, e fesootaʻi atu i le lesona e 2 ma le 3 o le polosiua Tala Lelei. O vitiō Aiseā e Suʻesuʻe ai le Tusi Paia?, O le ā e Faia i se Suʻesuʻega Faale-Tusi Paia?, ma le O ā Mea o Loo Faia i se Maota mo Sauniga?, e faalaeiau ai tagata ina ia suʻesuʻe le Tusi Paia ma i tatou ma auai mai i sauniga. E mafai foʻi ona faaaogā nisi o a tatou vitiō uumi e aʻoaʻo atu ai i a tatou suʻesuʻega faale-Tusi Paia.—km 5/13 3.

• Kopi muamua mai i le Upega tafaʻilagi le vitiō e te manaʻo e faaali i le tagata o le aiga

• Sauni se fesili se tasi pe lua lea e taliina i le vitiō

• Matamata faatasi le vitiō

• Talanoa i manatu autū

• Tagaʻi i le pito i tua o se tasi o sāvali, ma faauaʻi le tagata i le code lea e maua ai le vitiō Aiseā e Suʻesuʻe ai le Tusi Paia?

• Faaali le vitiō E Faapefea Ona Tatou Mautinoa e Saʻo Aʻiaʻi le Tusi Paia?, ofo le polosiua Tala Lelei, ma faamatilatila le lesona e 3