O le a sili ona tāua le Paseka mulimuli a Iesu. Talu ai ua toeitiiti oo i lona maliu, na ia filifili ai e ʻaai faatasi ma ona aposetolo i le tausamiga o le Paseka ma faailoa atu ai se faamanatuga fou e faia i tausaga taʻitasi, o le Talisuaga Afiafi a le Alii. O lea na ia auina atu ai Peteru ma Ioane e saunia le potu. (Lu 22:7-13; tagaʻi i le ata i le faavaa.) Ua faamanatu mai i lenei mea le tāua o le sauniuni mo le Faamanatuga iā Mati 27. E faia e le faapotopotoga faatulagaga mo se failauga, le areto ma le uaina ma isi mea. E ui i lea, o le ā e mafai e i tatou taʻitoʻatasi ona faia ina ia sauniuni ai mo le Faamanatuga?

Ia sauniunia lou loto. Faitau ma manatunatu loloto i le faitau Tusi Paia o le Faamanatuga. E mafai ona maua le faasologa i le tusi Iloiloina Tusitusiga Paia i Aso Taʻitasi. (Tagaʻi foʻi i le Polokalame mo le Sauniga o le Faiva ma le Olaga Faa-Kerisiano o Aperila 2020.) E mafai ona maua e aiga faamatalaga i le tāua o le taulaga togiola ina ia iloilo i le latou tapuaʻiga a le aiga, pe a suʻe i mataupu o loo i le Watch Tower Publications Index po o le Tusi Taʻiala mo Saʻiliʻiliga a Molimau a Ieova.

Valaaulia isi ia auai. Ia faia sou sao atoatoa i le tauiviga o le tufatufaina o le valaaulia. Ia mafaufau i se tasi e mafai ona valaaulia e pei o se toe asiga, se tagata na suʻesuʻe muamua, o ē e feiloaʻi i ai ma tauaiga. E faamautinoa e toeaina ua valaaulia i latou ua lē o toe talaʻi. Ia manatua, pe afai e lē nofo le tagata i le oganuu o loo e iai, e mafai ona e saʻilia le taimi ma le nofoaga e faia ai le Faamanatuga i lona vaipanoa, e ala i le oomi o le vaega MOLIMAU A IEOVA o loo i le pito i luga o le itulau autū o le jw.org ma filifili le vaega “Faamanatuga.”

O ā nisi mea e mafai ona tatou faia ina ia sauniuni ai?