E fā a tatou vitiō mo suʻesuʻega faale-Tusi Paia o loo faaaogā i le talaʻiga. O le ā le fuafuaga o nei vitiō taʻitasi?

• Aiseā e Suʻesuʻe ai le Tusi Paia?—Vitiō Atoa. Na saunia lenei vitiō ina ia faaosofia ai le fiafia o le tagata i le Tusi Paia, e tusa lava po o ā ona talitonuga faalotu. E faalaeiauina ai tagata ina ia saʻili ma maua i le Tusi Paia tali o fesili tāua i le olaga. O loo faamatala mai ai foʻi le auala e talosaga ai mo se suʻesuʻega faale-Tusi Paia.

• Aiseā e Suʻesuʻe ai le Tusi Paia? (vaaiga puupuu). E taitutusa lava ma le vitiō atoa, ae e pe ā ma le lua minute e puupuu ai. E aogā lenei vitiō i oganuu e tele ina pisi tagata.

• O le ā e Faia i se Suʻesuʻega Faale-Tusi Paia? Na saunia ina ia faaosofia ai le fiafia o le tagata i la tatou polokalame o le faia o suʻesuʻega faale-Tusi Paia e aunoa ma se totogi, ma tali ai nisi o fesili masani a tagata, e aofia ai le auala e talosaga ai mo se suʻesuʻega.

• Le Auala e Fai ai Lau Suʻesuʻega Faale-Tusi Paia. E mafai ona faaali i le tagata suʻesuʻe. E ui o loo faatomua mai lenei vitiō i le itulau e lua o le tusi Se Olaga Fiafia e Faavavau!, ae e mafai foʻi ona faaali pe a suʻesuʻeina le polosiua Se Olaga Fiafia e Faavavau! O loo faamatala mai ai vaega o le tusi, ma mea e ao ona faatalitalia e le tagata suʻesuʻe a o faagasolo le suʻesuʻega.

E ui e iai ni fuafuaga patino na saunia ai nei vitiō, ae e mafai lava ona faaali pe lafo atu i le tagata pe a talafeagai. E faalaeiauina tagata talaʻi e faamasani ma faaaogā lelei nei vitiō i le faiva.