Ua tele ina tutupu mala faalenatura i aso nei. Pe a tupu se mala, e tatau ona maopoopo ma lelei le auala e saunia ai le fesoasoani. O le māfuaaga lenā ua faatulaga ai e le Vaega Pule le Matagaluega o Fesoasoani mo Mala i ofisa o lālā uma.

Pe a iloa e uso i lenā matagaluega se vaipanoa ua tupu ai se mala, e vave lava ona latou faafesootaʻi toeaina ina ia iloa po o le ā le fesoasoani o loo manaʻomia e tagata talaʻi. Pe afai e tele ni mea ua faaleagaina ma ua lē mafai e uso ma tuafāfine ona faaleleia, o le a tofia e le lālā ni uso agavaa e taʻimua i le galuega laveaʻi. E talosaga atu nei uso mo ni tagata galulue tauofo po o ni meatotino o loo manaʻomia, pe atonu e latou te faatauina foʻi ma tufatufa atu mea o loo manaʻomia.

E tele aogā o le avatuina o fesoasoani i lenei auala. E ʻalofia ai le toe avatu o se fesoasoani ua uma ona saunia, o le lē mautonu, ma le maʻimau o foaʻi tautupe ma meatotino, pe afai e avatu tuusaʻo e le tagata lava ia lana fesoasoani.

E iloilo e uso ua tofia e le lālā le aofaʻiga o tupe ma le toʻatele o tagata tauofo e manaʻomia mo galuega laveaʻi. E mafai foʻi ona latou talanoa atu i ofisa o le malo mo se fesoasoani, ina ia vave ai ona saunia le fesoasoani laveaʻi. O lea, e lē tatau i tagata taʻitoʻatasi ona aoina ni fesoasoani tautupe, lafoina atu ni fesoasoani laveaʻi, po o le malaga atu i le nofoaga ua aafia, seʻi vaganā ua talosagaina e faia faapea.

Pe a tupu se mala, e tatou te mananaʻo e avatu le fesoasoani. (Epe 13:16) E tatou te alolofa i o tatou uso! O le ā e mafai ona tatou faia? O le gaoioiga e sili ona tāua, o le tatalo mo i latou ua aafia i le mala ma i latou o loo saunia le fesoasoani laveaʻi. E mafai foʻi ona tatou faia foaʻi tautupe mo le galuega i le lalolagi aoao. E ala i le taʻitaʻiga a le Vaega Pule, e filifili ai e ofisa o lālā le auala e sili ona lelei e faaaogā ai na foaʻi tautupe. Pe afai e tatou te mananaʻo e tauofo mo galuega fesoasoani, e mafai ona faailoa atu e ala i le faatumu o le pepa talosaga Pepa Talosaga e Avea ai o Sē Tauofo i Faugāfale i le Vaipanoa (DC-50).

MAIMOA I LE VITIŌ LOLOGA TETELE I PASILI, ONA TALI LEA O LE FESILI LENEI:

O le ā se mea e mataʻina ai fesoasoani laveaʻi a Molimau a Ieova ina ua uma lologa i Pasili i le 2020?