I le Tulafono a Mose, na tatau i se tamāloa na manaʻo e tatala lana faaipoipoga ona saunia se tusi faamaonia e faateʻa ai lana avā. O le faia faapea na taofia ai tagata mai i le vave tatala o a latou faaipoipoga. Peitaʻi i aso o Iesu, na faafaigofie e taʻitaʻi lotu le tatalaina o faaipoipoga. Na mafai ona faateʻa e tane a latou avā i so o se māfuaaga. (“faateʻa i lana ava,” “ua mulilua o ia, ma ua agasala ai i le fafine muamua” faamatalaga mo suʻesuʻega o le Mar 10:4, 11, nwtsty) Na faamatilatila mai e Iesu le mea moni o Ieova na faavaeina ma faamaonia le faatulagaga o le faaipoipoga. (Mar 10:2-12) Ua avea le tane ma le āva ma “tino e tasi” i se mafutaga e tumau. O loo taʻua i le tusi o Mataio, e pau le māfuaaga faale-Tusi Paia e tatala ai se faaipoipoga, pe afai ua faia le “faitaaga.”​—Mat 19:9.

O le toʻatele o tagata i aso nei ua vaai i le faaipoipoga e pei o le ʻau Faresaio, ae e lē pei o Iesu. Pe a tulaʻi faafitauli, e vave ona tatala e tagata o le lalolagi a latou faaipoipoga. Peitaʻi, e faatāua e ulugalii Kerisiano a latou tautoga o le faaipoipoga, ma taumafai e foʻia faafitauli e ala i le faatatau o taʻiala o le Tusi Paia. Faaali le vitiō O le Alofa ma le Faaaloalo e Autasia ai Aiga, ona tali lea o fesili nei:

• E faapefea ona e faatatauina le Faataoto 15:1 i lau faaipoipoga, ma aiseā e tāua ai le faia faapea?

• E faapefea ona e ʻalofia faafitauli pe a faatatauina le Faataoto 19:11?

• Pe afai ua tauau ina malepe lau faaipoipoga, nai lo o le mafaufau ʻPo ua tatau ona tatala?,’ o ā fesili e tatau ona e manatunatu i ai?

• E faapefea ona avea oe o se tane po o se avā lelei e ala i le faatatauina o le Mataio 7:12?