E manaʻomia e tagata suʻesuʻe ona atiaʻe le faatuatua malosi, ina ia faafiafiaina ai le Atua. (Epe 11:6) E mafai ona tatou fesoasoani iā i latou e faia faapea, e ala i le faaaogāina o le tusi Se Olaga Fiafia e Faavavau! O loo aofia i lenei tusi mau autū, fefulifulisaʻiga manino, fesili faatupu manatu, vitiō faagaeeloto, ma ata mananaia. O le fesoasoani i tagata suʻesuʻe e atiaʻe uiga faa-Kerisiano ma se faiā ma le Atua, ua tatou atiaʻe ni mea e lē tineia e le afi.—1Ko 3:12-15.

E faigatā i isi ona faaata le iai o se faauōga ma le Atua o lē latou te lē vāai i ai. E manaʻomia la ona tatou fesoasoani iā i latou e atiaʻe le faatuatua i uiga alofa o Ieova.

MAIMOA I LE VITIŌ FAAAOGĀ LE TUSI “SE OLAGA FIAFIA E FAAVAVAU!” E ATIAʻE AI LE FAATUATUA IĀ IEOVA, ONA TALI LEA O FESILI NEI:

• E faapefea ona tatou iloa na sauniuni lelei le tuafafine mo le suʻesuʻega?

• Na faapefea ona ia faaaogā ma le atamai ni fesili faaopoopo, e faailoa mai ai manatu o lana tagata suʻesuʻe e faatatau i le Isaia 41:10, 13?

• Na faapefea ona fesoasoani le vitiō ma le mau i le tagata suʻesuʻe?

E toʻatele e lē malamalama i le togiola pe e latou te lē vāai i ai o se meaalofa mai i le Atua. (Ka 2:20) E tatau la ona tatou fesoasoani iā i latou e atiaʻe le faatuatua i le taulaga togiola a Iesu.

MAIMOA I LE VITIŌ FAAAOGĀ LE TUSI “SE OLAGA FIAFIA E FAAVAVAU!” E ATIAʻE AI LE FAATUATUA IĀ IESU, ONA TALI LEA O FESILI NEI:

• E faapefea ona tatou iloa na sauniuni lelei le uso mo le suʻesuʻega?

• E faapefea ona ia faaaogā le vaega “Manatu Faaopoopo” e fesoasoani ai i le tagata suʻesuʻe?

• Aiseā e tāua ai ona tatou tatalo mo le tagata suʻesuʻe?