Ua toeitiiti ona muta lea o le onosaʻi o Ieova ma faaoo mai le iʻuga o lenei lalolagi. O le a faaumatia lotu sesē, o le a osofaʻia e se tuufaatasiga o malo tagata o le Atua, ma o le a faaumatia e Ieova tagata amioleaga iā Amaketo. E tulimataʻi e Kerisiano na mea mataʻina o le a tutupu.

O le mea moni, e tatou te lē iloa faamatalaga uma e faatatau i le puapuaga tele. Mo se faataʻitaʻiga, e tatou te lē iloa le taimi tonu o le a amata ai. E tatou te lē iloa po o ā māfuaaga o le a faaaogā e pulega faapolotiki e osofaʻia ai lotu. E tatou te lē iloa po o le ā le umi o le a osofaʻia ai e malo tagata o le Atua, ma po o ā mea e aofia ai. E tatou te lē iloa foʻi po o le ā tonu le auala o le a faaaogā e Ieova e faaumatia ai tagata amioleaga iā Amaketo.

Peitaʻi, ua aumaia e le Tusi Paia faamatalaga tatou te manaʻomia ina ia maua ai le mautinoa ma le lototele i mea o le a tutupu i le lumanaʻi. Mo se faataʻitaʻiga, ua tatou iloa ua tatou ola i le iʻuga “o aso e gata ai.” (2Ti 3:1) Ua tatou iloa o le a “faapuupuuina” le osofaʻiga o lotu ina ia faasaoina ai le tapuaʻiga moni. (Mat 24:22) Ua tatou iloa o le a faasaoina e Ieova ona tagata. (2Pe 2:9) Ua tatou iloa foʻi, e amiotonu ma malosi Lē ua filifilia e Ieova e tafiesea tagata amioleaga, ma faasaoina le motu o tagata e toʻatele mai iā Amaketo.—Fal 19:11, 15, 16.

O mea o le a tutupu i le lumanaʻi o le a ʻmatapogia ai tagata ona o le fefefe.’ Peitaʻi, o le faitau ma manatunatu loloto i auala na faasaoina ai e Ieova ona tagata i le taimi ua teʻa, ma mea ua ia faailoa mai e faatatau i le lumanaʻi, e mafai ai ona tatou ʻtutū i luga ma ea i luga o [tatou] ulu,’ ma mautinoa ua lata ona laveaʻiina i tatou.—Lu 21:26, 28.