AUALA E OLA AI O SE KERISIANO
Pe a E Tau i se Tamaitiiti i le Talaʻiga
Pe a ō atu i se fale i le talaʻiga ae tatala mai e le tamaitiiti le faitotoʻa, e tatau ona fesili i ai pe mafai ona tatou talanoa i ona mātua. O le faia faapea, e faaalia ai lo tatou faaaloalo i mātua. (Fat 6:20) E lē tatau ona ō i totonu o le fale pe a valaaulia mai i tatou e le tamaitiiti. Afai e lē o avanoa mātua, e ao ona tatou toe asiasi atu i se isi taimi.
Pe afai o se tamaitiiti e pe ā ma le 15 i le 19 tausaga, e talafeagai pea ona fesili atu mo ona mātua. Afai e lē o avanoa mātua, ia fesili i le talavou pe faataga e ona mātua ona ia tuuina ni ana tusi faitau. Afai e faataga, ia tuu atu iā te ia ni lomiga pe faaali atu foʻi i ai la tatou Upega tafaʻilagi.
Pe a toe asia se talavou na faaalia le fiafia, e ao ona fesili i ai pe mafai ona tatou talanoa i ona mātua. O le faia faapea, e mafai ona faamatala atu ai i mātua le fuafuaga o la tatou asiasiga, ma faaali i ai fautuaga aogā ma maufaatuatuaina o loo i le Tusi Paia mo aiga. (Sl 119:86, 138) O le faaalia o le faaaloalo ma le manatu mamafa i mātua, o le a avea ma molimau lelei ma e ono maua ai isi avanoa e faasoa atu ai le tala lelei i le aiga.—1Pe 2:12.