A o alu se faigāmalaga a le aʻoga, na tuuaʻia ai ni tama talavou i le faileagaina faamalosi o se isi tamaitiiti aʻoga. O i latou uma nei e aʻoʻoga i se aʻoga e lauiloa i Kanata. Ina ua uma le mea na tupu, na tusia ai e Leonard Stern i le nusipepa o le Ottawa Citizen e faapea: “O le iai o le atamai, maua se aʻoaʻoga lelei ma le tele o tupe, e lē taofia ai talavou mai i le faia o mea leaga.”

Na taʻua foʻi e Stern: “E te ono mafaufau o le mea e pito sili ona tāua i mātua o le aʻoaʻoina o a latou fanau ia iloa amioga saʻo ma amioga sesē. Ae e foliga mai ua sili ona faatāua e mātua tulaga lelei o a latou fanau i aʻoga ma maua galuega lelei ina ia maua ai le tele o tupe.”

O le mea moni e tāua aʻoaʻoga faaletino. Ae e lē mafai ona fesoasoani i se tagata na aʻoaʻoga e teena ai faanaunauga leaga. O fea la e tatou te maua ai aʻoaʻoga o loo saunia mai ai taʻiala mo amioga tatau?

O le Tusi Paia e pei o se faata. Pe a tatou faitau i ai e tatou te iloa ai o tatou vaivaiga ma mea e gata ai lo tatou malosi. (Iakopo 1:23-25) Ae e iai isi aogā e sili atu o le Tusi Paia. E fesoasoani iā i tatou e faia ai suiga manaʻomia ma atiaʻe ai uiga e faaauiluma ai le filemu ma le autasi. O na uiga e aofia ai le mataalofa, agalelei, onosaʻi, amio pulea ma le alofa. O loo taʻua le alofa “o le fusi lea e atoatoa ona autasi ai.” (Kolose 3:14) Aiseā e matuā tāua ai le alofa? Seʻi mātau le faamatalaga a le Tusi Paia e faatatau i lenei uiga.

• “E onosaʻi ma e agalelei le alofa. E lē lotoleaga le alofa, e lē gugutu, e lē faafefeteina [i le faamaualuga], e lē amio matagā, e lē saʻili mo lona lava lelei, e lē itaitagofie. E lē faitauina mea leaga e fai atu iā te ia. E lē fiafia i le amiolētonu, ae e fiafia i le mea moni. E onosaʻi i mea uma, . . . e tumau i mea uma. E lē uma le alofa.”—1 Korinito 13:4-8.

• “E lē agaleaga le alofa i lona tuaoi.”—Roma 13:10.

• “Ae e sili i nei mea uma, ia tele le alofa o le tasi i le isi, auā o le alofa e ufiufi ai le anoanoaʻi o agasala.”—1 Peteru 4:8.

Pe e te lagona le saogalemu ma leai se mea e popole ai pe a iai faatasi ma tagata e alolofa iā te oe? O le mea moni e latou te mananaʻo e fai le mea sili mo oe, ma e latou te lē faia ma le loto i ai se mea e te tigā ai.

E uunaʻia foʻi e le alofa tagata ina ia faia ni faataulaga, e oo lava i le suia o le auala e ola ai mo le lelei o isi. Mo se faaaʻoaʻoga, ina ua fanau le pepe a le afafine o se tamāloa o le a tatou faaigoa iā George, na manaʻo o ia e faaalu le tele o le taimi ma le pepe. Ae sa iai le faafitauli. Sa malosi tele le ulaula a George, ma e leʻi manaʻo le tane a lona afafine e ulaula a o iai faatasi ma le pepe. O le ā na ia faia? E ui ua 50 tausaga talu ona ulaula, ae na ia lotomalie e tuua lenā masaniga mo le lelei o le pepe a lona afafine. Ioe, maʻeu le malosi o le alofa!

E lē otometi ona tatou alolofa, ae o se uiga e tatou te aʻoaʻoina. E telē le vaega fai a mātua i le aʻoaʻoina o a latou fanau i le auala e faaalia ai le alofa. E latou te fafaga ma puipuia a latou fanau  ma fesoasoani iā i latou pe a faamanuʻalia pe mamaʻi. O mātua lelei e talatalanoa ma a latou fanau ma aʻoaʻo i latou. E latou te aʻoaʻia foʻi a latou fanau, e aofia ai le faailoaina atu iā i latou o tapulaa o le mea saʻo ma le mea sesē. E lē gata i lea, o mātua lelei e faataatia se faaaʻoaʻoga lelei mo a latou fanau.

Ae e faanoanoa ona o nisi o mātua ua lē taulau ona faataunuu lo latou tiute tauave. Po o lona uiga la e lē mafai ona avea a latou fanau ma tagata lelei? E leai! E oo lava i le toʻatele o tagata matutua, e aofia ai i latou na ola aʻe i ni aiga e lē lelei le siʻomaga, sa faia ni suiga mataʻina i o latou olaga ma avea ma tagatānuu lelei ma maufaatuatuaina. E pei o le a tatou talanoaina i le mataupu o loo sosoo mai, e aofia ai ma ē na manatu le toʻatele e lē mafai ona suia o latou olaga.