Pe e te talitonu e mafai e tagata ona foʻia le tele o faafitauli lea e aveesea ai le filemu ma le saogalemu ma aafia ai lo tatou lumanaʻi? Ina ia mafai ona foʻia moni o tatou faafitauli e tatau ona tatou iloa po o le ā le pogai, ae e lē na o āuga.

Ina ia faataʻitaʻi, na iai se tagata maʻi e igoa iā Tom na taofia i le falemaʻi ma mulimuli ane maliu. Aiseā na maliu ai? Na tusi mai le fomaʻi sa iai i le falemaʻi lea na maliu ai Tom: “Ina ua aliaʻe āuga o le maʻi, e leai se tasi na mafaufau e saʻili le pogai autū o lona maʻi.” E foliga mai na ave iai e i latou na tausia muamua Tom ni fualaau e tau lava ina maua ai lona malosi.

Po o taumafai tagata e foʻia faafitauli o lenei lalolagi i le auala lava lea? Mo se faaaʻoaʻoga o le taumafai e faaitiitia soligatulafono, ua faamalosia ai e faigāmalo tulafono, faaaogāina meapuʻeata ma faatoʻateleina leoleo. E tusa pe e iai sina aogā o nei gaoioiga ae e lē o iloa ai le pogai autū o soligatulafono. O le mea moni ua faailoa mai i le auala e gaoioi ai tagata o latou mafaufauga, faalogona ma mea e mananaʻo ai.

Ua faapea mai Daniel lea e nofo i se atunuu e matuā leaga le tulaga tau tamaoaiga i Amerika i Saute: “Sa matou ola i se olaga sologa lelei. E matou te leʻi popole ina neʻi fāoa faamalosi e tagata a matou meatotino. Ae ua lē o toe iai se aai po o se nuu saogalemu i le taimi lenei. O le paʻū maulalo o le tamaoaiga ua manino mai ai uiga moni o le toʻatele o tagata, o le matapeʻapeʻa ma le leai o se faaaloalo i le ola ma meatotino a isi.”

Na sola ese se tamāloa o le a tatou faaigoa iā Elias mai i se feteenaʻiga lea na tupu i Sasaʻe Tutotonu, ma mulimuli ane suʻesuʻeina le Tusi Paia. Na ia faamatala mai: “E toʻatele tama talavou mai i lo matou nuu sa faamalosia e o latou aiga, faiga faapolotiki ma faalotu e auai i taua ma taʻua ai i latou o ni toa. Na faamalosia foʻi ē sa i le itu tetee e fai lenā lava gaoioiga! Ua fesoasoani nei mea uma iā te aʻu e iloa ai le faanoanoa o le faatuatuaina o taʻitaʻi faaletagata.”

O loo faapea mai se tusi ua leva ona iai ma o loo iai fautuaga atamai:

• “E leaga faanaunauga o le loto o le tagata mai lava i lona laʻitiiti.”—Kenese 8:21.

• “E sili ona faaʻoleʻole le loto nai lo o mea uma, ma e matuā leaga lava. O ai sē e mafai ona iloa?”—Ieremia 17:9.

• “Auā e sau mai i le loto o mafaufauga leaga: o le fasioti tagata, . . . amioga lē mamā taufeusuaʻiga, gaoi, molimau pepelo.”—Mataio 15:19.

Ua lē mafai e tagata ona maua se vaifofō o faanaunauga leaga i totonu o i tatou. O le mea moni o nei faanaunauga e foliga mai o loo faasolo ina leaga, e pei ona atagia mai i faafitauli sa taʻua i le mataupu ua mavae. (2 Timoteo 3:1-5) O le tulaga lava lea e ui e tele atu le poto o tagata ua maua i aso nei ma tomai e fesootaʻi ai! Aiseā la e lē mafai ai ona tatou maua le filemu ma le saogalemu i le lalolagi? Po o le a iai se taimi e filemu ma saogalemu ai le lalolagi? Po o tatou taumafai e faia se mea e lē oo i ai lo tatou malosi?

E tusa lava pe e iai se auala e suia ai faanaunauga leaga o tagata, ae e lē mafai lava ona tatou maua se filemu ma le saogalemu i le lalolagi. Aiseā? Auā e iai le mea e gata ai le malosi o le tagata.

 O le upu moni faigofie lenei: “E lē o i le tagata . . . ona faatonuina le mea e ui ai o ia.” (Ieremia 10:23) O le mea moni e leʻi foafoaina i tatou ina ia faatonuina i tatou lava. E leʻi foafoaina i tatou e pulea o tatou uso a tagata, e pei lava foʻi ona lē foafoaina i tatou ia ola i lalo o le vai po o le vateatea.

Seʻi mātau: Pe e fiafia le toʻatele o tagata pe a taʻu atu e isi iā i latou tapulaa tau amio ma le auala e tatau ona ola ai? Ae ā pe a taʻu atu e isi iā i latou le auala e tatau ona manatu ai i mea e pei o le faapaʻū tama po o le auala e tatau ona aʻoaʻi ai a latou fanau? O nisi nei o mataupu e fevaevaeaʻi ai tagata. E ui lava e faigatā ona talia, ae e saʻo lelei faamatalaga a le Tusi Paia. E lē o iā i tatou le tomai po o le aiā e pulea ai o tatou uso a tagata. O fea la e maua ai le fesoasoani?

O le tali talafeagai lelei mo i tatou o le saʻili atu i Lē na foafoaina mea auā na ia foafoaina i tatou. I se faaeseesega mai i mea e ono manatu iai isi, e na te lē faagaloina i tatou. O le mea moni, o lona manatu mamafa mo i tatou ua faaalia manino mai i le atamai o loo i le Tusi Paia. Pe a tatou malamalama i lenā tusi tutasi, o le a sili atu foʻi la ona iloa le mea e gata ai lo tatou malosi ma mafai ai ona iloa le māfuaaga ua pagatia ai le talafaasolopito o tagata. Ua tatou iloa le pogai e pei ona tusia e se faifilosofia Siamani, “e lē o aʻoaʻoina e tagata ma malo se mea mai i le talafaasolopito, pe gaoioi e tusa ma mataupu silisili ua maua mai ai.”

Na faapea mai Iesu, “e taʻuamiotonuina le atamai i ana tama uma,” po o iʻuga o ana galuega. (Luka 7:35) O se faaaʻoaʻoga o lenā atamai o loo maua i le Isaia 2:22, lea e faapea mai: “A o outou, aua tou te faatuatua i le tagata.” O lenā fautuaga atamai e fesoasoani iā i tatou e ʻalofia ai le faamoemoe i se mea e lē mafai ona taunuu. Na faapea mai Kenneth e nofo i se aai i Amerika i Mātū e faatumulia i faiga sauā: “E folafola mai e le ʻaufaipolotiki o le a latou faaleleia le tulaga o mea, ae e lē mafai ona latou faia faapea. O lo latou lē taulau ua faamanatu mai ai pea le atamai o loo i le Tusi Paia.”

Na tusi Daniel lea na taʻua muamua: “E manino mai iā te aʻu i aso uma le lē taulau o le tagata ona taʻitaʻia ma le tonu o ia lava. . . . E tusa lava pe e iai sau tupe i lau tusi tupe pe e iai foʻi sau teugātupe, e lē uiga ai o le a iai sou lumanaʻi saogalemu. Ua ou vaaia le toʻatele o tagata ua matuā mafatia ona o lenei tulaga.”

Ua taʻua i le Tusi Paia nisi mea e sili atu, nai lo o le tau ina fesoasoani iā i tatou e ʻalofia le faamoemoe i se mea e lē mafai ona taunuu. Ua aumaia foʻi iā i tatou le faamoemoe lea o le a tatou talanoaina.