O le malosi o aʻoaʻoga e faavae mai i le Tusi Paia e mafai ona faaleleia ai olaga. Seʻi iloilo faaaʻoaʻoga nei e lua: Ricardo ma Andres.

RICARDO: I le 15 o oʻu tausaga na ou auai ai i se kegi. Na telē se aafiaga o aʻu uō iā te aʻu. Na fai ma oʻu sini le faaaluina o le sefulu tausaga i le falepuipui. Atonu e lē o se mea lenā e te faatalitalia. Ae i loʻu vaipanoa, o i latou e faaaluina le taimi i le falepuipui e fiafia iai ma faaaloalogia e isi, ma na ou manaʻo e pei o i latou na.

Na ou faia mea uma sa aofia ai i le olaga o se tasi e auai i se kegi, e pei o le faaaogāina o fualaau faasāina, feusuaʻiga ma faiga sauā. O se tasi o pō na ou auai ai i se taugāfana. Na ou manatu o le a ou oti ai, ae na ou sola ese ou te leʻi lavea. Na amata mai i inā ona ou mafaufau mamafa e uiga i loʻu olaga ma oʻu sini, ma na ou filifili ai loa e fai ni suiga. Ae o le a faapefea ona ou faia ni suiga? O fea o le a ou maua ai se fesoasoani?

O le toʻatele o oʻu tauaiga e leʻi maua se fiafia. Sa tele faafitauli i o latou olaga. Ae e lē o le tulaga lenā na iai i le aiga o le tuagane laʻitiiti o loʻu tinā. Na ou iloa o i latou o ni tagata lelei ma sa ola e tusa ai o mataupu silisili o le Tusi Paia. Sa iai le taimi na ou aʻoaʻoina mai ai iā i latou, o le suafa o le Atua o Ieova. E leʻi leva atu ona uma le taugāfana ae ou tatalo loa iā Ieova, taʻua lona suafa ma talosaga atu e fesoasoani mai iā te aʻu. Na faateʻia aʻu i le aso lava na sosoo ai ae tuʻituʻi mai loa se tasi o Molimau a Ieova! Na avea o ia ma oʻu faiaʻoga faale-Tusi Paia.

E leʻi leva ae ou fesagaʻia se luʻi faigatā. Sa masani ona vili mai aʻu uō ma talosaga mai e matou te toe tafafao ma eva. E ui e leʻi faigofie ae na ou fai atu leai. Sa ou maumauaʻi e faaauau laʻu suʻesuʻega faale-Tusi Paia, ma na ou fiafia ona sa mafai ona ou faia faapea! Sa matuā faaleleia loʻu olaga ma na ou maua le fiafia moni.

Ou te manatua na ou tatalo atu i le Atua sa ou lotomalie e faafalepuipui mo le sefulu tausaga ina ia maua le faaaloalogia o se sui o le kegi. O lea, na ou tatalo ai ia faataga aʻu e auauna atu iā te ia mo le sefulu tausaga o se faifeʻau faataimi atoa e fesoasoani ai i isi e pei lava ona ou maua le fesoasoani. Na tali mai le Atua i laʻu tatalo ma ua ou faaaluina le 17 tausaga o se faifeʻau faataimi atoa, ma e leʻi lokaina lava aʻu i le falepuipui.

O le toʻatele o aʻu uō sa iai o loo falepuipui mo le tele o tausaga ae o nisi ua feoti. Pe a toe tepa i tua ou te lotofaafetai i oʻu tauaiga molimau. Sa latou lotomalilie e tū ese mai e ala i le ola e tusa ai ma le Tusi Paia. Na ou atiaʻe le faaaloalo loloto mo i latou e sili atu i lo o le faaaloalo i se tasi sa iai i le kegi. Ae e sili i nei mea uma, ou te lotofaafetai i le Atua i le aʻoaʻoina o aʻu i le auala sili ou te ola ai.

 ANDRES: Na ou fanau ma ola aʻe i se vaipanoa mativa lea e taatele ai le faaaogāina o fualaau faasāina, taufaavalea, fasioti tagata ma faiga faatalitane. Sa pulea loʻu tamā e le ʻava malosi ma le fualaau faasāina o le cocaine. E masani ona misa loʻu tamā ma loʻu tinā, e tauupu ma tauaʻifusu.

Sa amata ona ou faaaogāina le ʻava malosi ma fualaau faasāina mai lava i loʻu laʻitiiti. O le tele o taimi ou te fealuaʻi i auala tetele e gaoi ma toe faatau atu mea na ou gaoia. Ina ua ou matua, na taumafai loʻu tamā ina ia māfana le ma faiā, e ala i le aʻoaʻoina o aʻu i le auala e aumai faananā ai fualaau faasāina ma isi oloa faasāina i totonu o le atunuu ma toe faatau atu. Sa vave ona tele aʻu tupe na maua ai. Ae i se tasi aso na ō mai ai leoleo i loʻu fale. Na latou molia ma lokaina aʻu mo le lima tausaga i le taumafai e fasiotia se tasi.

I se tasi taeao na iai se faasilasilaga i le mea faaleotele leo o le falepuipui, e valaaulia ai pagota uma i se talanoaga faale-Tusi Paia e faia e Molimau a Ieova. Na ou filifili ou te auai. Sa logolelei mea na ou faalogo i ai, ma amata ai loa laʻu suʻesuʻega faale-Tusi Paia. Latou te leʻi faamatala mai na o vaega e fiafia i ai tagata, ae sa faailoa mai foʻi tapulaa tauamio maualuluga a le Atua.

Na vave ona ou iloa e lē mafai ona ou faia suiga e aunoa ma se fesoasoani, aemaise lava ina ua faamataʻu mai isi pagota o ē e leʻi fiafia i suiga na ou faia. Na ou tatalo iā Ieova e fesoasoani mai e ala i le foaʻi mai o le malosi ma le atamai. O le mea moni sa mafai ona ou gaoioi e teena na faamataʻuga, ma maua le lototele e talanoa ai i isi pagota e uiga i le Tusi Paia.

Ina ua oo mai le taimi e faasaʻoloto ai aʻu, sa ou popole auā sa iai loʻu faanaunauga ia umi se taimi ou te nofo ai i le falepuipui! A o oʻu alu ese, na faatofā mai le toʻatele o pagota. Na oo lava ina latou fai mai ma le alofa, “Alu loa, tamaʻi faifeʻau.”

E faapopoleina aʻu pe a ou mafaufau i le mea semanū e oo iai loʻu olaga pe ana ou lē faatagaina le Atua e aʻoaʻoina aʻu. Ua ou matuā faafetai ona e leʻi fiu le Atua iā te aʻu ae na alofa mai pea. a