Pe e Tāua le Faaaloalo i Isi?

PLAY

AISEĀ E TĀUA AI LE FAAALOALO I ISI?

Pe a tatou faaaloalo i isi, o le a lē faateteleina ai se faafitauli.

Ua faapea mai le Tusi Paia: “O le tali filemu e liliueseina ai le lotoa, a o le upu faatigā e tupu ai le ita.” (Faataoto 15:1) O faamatalaga ma gaoioiga lē faaaloalo, e faateteleina ai se faafitauli ma e masani e leaga iʻuga e oo i ai.
Na fetalai Iesu: “O le tele o mea i le loto e tautala mai ai le gutu.” (Mataio 12:34) O faamatalaga lē faaaloalo e atagia atu ai o tatou faalogona moni e faatatau i tagata e ese o latou talaaga, atunuu, tulaga tauaʻoaʻoga, ma le tulaga tau tamaoaiga mai iā i tatou.

I se suʻesuʻega na faia talu ai nei i le silia ma le 32,000 tagata mai i atunuu e 28, e silia ma le ʻafa o i latou na faapea mai, ua matuā faateteleina le lē faaaloalo o tagata i aso nei.

MEA E MAFAI ONA E FAIA

Ia faaaloalo i so o se tagata e te talanoa i ai e tusa pe e eseese o outou manatu. Ia iloa mea e tou te ioe faatasi ai. O le a fesoasoani lenā iā te oe e ʻalofia ai le faitio po o le faamasinosino.

“Aua tou te toe faamasino atu ina neʻi faamasinoina outou.”—Mataio 7:1.

Ia feutagaʻi ma isi i le auala e te manaʻo e latou te feutagaʻi ai ma oe. Pe a agalelei ma tonu le auala e te feutagaʻi ai ma isi, o le a latou faia foʻi faapena iā te oe.

“E pei ona outou mananaʻo e faia mai e tagata iā te outou, ia faapea lava ona outou faia iā i latou.”—Luka 6:31.

Ia faamagalo atu. Ia vaai e lelei le uunaʻiga na faia ai e se tasi se mea, e ala i le lē amanaʻia o ana upu ma gaoioiga lē faaaloalo.

“O le tofā mamao o le tagata, e faagesegese ai lona ita, ma e matagofie foʻi lona lē amanaʻia o se mea sesē.”—Faataoto 19:11.

MEA O LOO FAIA E MOLIMAU A IEOVA

E faaalia e Molimau a Ieova le faaaloalo i isi i vaipanoa o loo latou nonofo ma galulue ai.

E matou te ofoina atu polokalame tauaʻoaʻoga faale-Tusi Paia e aunoa ma se totogi i tagata uma, ae e matou te lē faamalosia o matou talitonuga i isi. Nai lo o lea, e matou te taumafai e faatatau fautuaga o loo i le Tusi Paia, e ala i le faailoa atu o la matou feʻau i se auala “agamalu ma le matuā faaaloalo lava.”—1 Peteru 3:15; 2 Timoteo 2:24.

E matou te teena le faailoga tagata, ma e talia i a matou sauniga so o se tasi e manaʻo e aʻoaʻo e faatatau i le Tusi Paia. E matou te taumafai malosi e faaalia le onosaʻi ma “faaalia le faaaloalo tatau i tagata uma.”—1 Peteru 2:17, New International Version.

E matou te faaaloalo i pulega a faigāmalo. (Roma 13:1) E matou te usitaʻia tulafono ma totogi lafoga. E ui e leai sa matou vaega i faiga faapolotiki, ae e matou te faaaloalo i aiā a isi pe a fai a latou filifiliga i mataupu faapolotiki.

ALA MAI!