E MAFAI e se lagomeli ona tū e aunoa ma le paʻū, e tusa lava po o fea le pito e lele mai ai. E faapefea ona tupu lenā mea?

Ia Mātau: Ina ia tū le lagomeli e aunoa ma le paʻū, e manaʻomia ona faalēmū le saosaoa e lele ai lea e toetoe lava lē lele. O le auala e faia ai e le lagomeli lenei tulaga e ala i le fuaina o ni vala se lua, o le saosaoa e lele ai ma le mamao o le mea e agaʻi i ai, ona faaitiitia lea o le saosaoa talafeagai e lele ai. Peitaʻi e faigatā ona faia e le tele o iniseti lenā mea, ona e lē mafai e o latou mata ona fuaina le mamao o le mea o loo agaʻi i ai.

O le vaai a le tagata, e mafai ona ia fuaina le mamao o se mea. Ae e ese ai le vaai a le lagomeli. E foliga mai a o latalata atu le lagomeli i se mea, e faasolo ina lapoʻa lenā mea. O le latalata lava o le lagomeli i lenā mea, o le vave foʻi lenā ona foliga mai ua lapoʻa lenā mea. Na iloa mai i se suʻesuʻega na faia i le Australian National University, e faaitiitia le saosaoa o le lagomeli e lele ai, ae e lē suia ai le vave e na te faalapoʻa ai se mea o loo agaʻi i ai. Pe a oo le lagomeli i le mea lea e lele i ai, e faaitiitia le saoasaoa e lele ai i le toetoe lava a lē lele, ma mafai ai loa ona tū e aunoa ma le paʻū.

Na taʻua i le tusi o le Proceedings of the National Academy of Sciences: ʻO le faigofie o lenei auala, ua avea ai o se auala lelei e faataʻitaʻi ai le faatonutonuina o masini e felelei.’

O le ā sou manatu? Pe na teʻi lava ua iloa e le lagomeli le auala e tū ai? Pe na foafoaina?