O amioga tatau o tapulaa ia ua filifili le tagata lava ia e ola ai. O se faataʻitaʻiga pe e te maumauaʻi e faaalia le faamaoni i mea uma lava? Afai o lea, e mautinoa e te manaʻo e atiaʻe lenā uiga i lau fanau.

E tāua foʻi le aʻoaʻo o fanau i uiga e pei o le galue mamafa, faamaoni, ma le manatu mamafa i isi. E lelei ona atiaʻe na uiga mai lava a o lāiti.

MATAUPU SILISILI FAALE-TUSI PAIA: “Ia aʻoaʻo le tama e tusa ma le ala saʻo; a oo ina toeaina lava e lē liliuese ai o ia.”​—Faataoto 22:6.

I lenei vaitaimi o faiga faatekinolosi, e tāua tele le iai o amioga tatau. Ua faapea mai se tinā e igoa iā Karyn, “O loo maua i so o se taimi taaʻiga leaga i masini faaonapōnei. E mafai lava ona saofafaʻi le fanau i o tatou autafa ma matamata i se ata e lē talafeagai.”

MATAUPU SILISILI FAALE-TUSI PAIA: “Ua faaaogā o latou [tagata matutua] mafaufau e iloa le mea saʻo ma le mea sesē ina ua aʻoaʻoina.”​—Eperu 5:14.

E tāua foʻi le iai o tapulaa tau amio, lea e aofia ai le iai o ni amioga lelei. O se faataʻitaʻiga o le fai atu o upu e pei o le “faamolemole” ma le “faafetai” ma faaalia le manatu mamafa i isi, o se uiga ua seāseā ona toe faaalia ona ua sili atu le ano o tagata i a latou masini faaonapōnei nai lo o isi.

MATAUPU SILISILI FAALE-TUSI PAIA: “E pei ona outou mananaʻo e faia mai e tagata iā te outou, ia faapea lava ona outou faia iā i latou.”​—Luka 6:31.

Faailoa atu au tapulaa tau amio. O se faataʻitaʻiga, ua faailoa mai e tagata suʻesuʻe e faapea e ʻalofia e talavou feusuaʻiga a o leʻi faaipoipo pe afai na aʻoaʻoina lelei i latou o nei amioga e leaga.

FESOASOANI: Ia faaaogā se mea na tupu talu ai nei e amata ai se talanoaga e faatatau i amioga tatau. O se faataʻitaʻiga, pe afai ua lipotia mai e le tala fou se solitulafono na māfua ona o le ita i se isi ituaiga o tagata, e te ono faapea atu: “Ese le leaga o le auala e faaalia ai e tagata le feita i isi. O le ā sou manatu e faapefea ona oo tagata i lenā tulaga?”

“E sili atu ona faigatā i fanau ona filifili le mea saʻo ma le mea sesē pe afai e latou te lē iloa le mea saʻo ma le mea sesē.”​—Brandon.

Ia aʻoaʻo fanau i amioga tatau. E oo lava i fanau e mafai ona aʻoaʻoina i latou e fai atu upu faaaloalo e pei o le “faamolemole” ma le “faafetai” ma faaalia le manatu mamafa i isi. Na faapea mai le tusi Parenting Without Borders, “Pe a iloa e tamaiti e iai lo latou vaega fai i totonu o le aiga, aʻoga, po o le vaipanoa e nonofo ai, o le a atili ai ona nofosauni e faaalia le agalelei lea e maua ai e tagata uma aogā, ae e lē na o i latou.”

FESOASOANI: Ia tuu atu ni feʻau i lau fanau e fai e fesoasoani iā i latou ina ia iloa le tāua o le auauna atu i isi.

“Pe a faamasani fanau e faia feʻau i le taimi nei, o le a latou iloa fai feʻau pe a nonofo na o i latou. O le a avea le faia o tiute tauave ma vaega o o latou olaga.”​—Tara.