A O LEʻI amata se faaliliuga, e fuafuaina lelei, faia saʻiliʻiliga ma tusia lomiga a Molimau a Ieova. O le taimi lenā e siaki lelei ai e le Matagaluega o Tusitusiga i lo latou ofisa ulu i Niu Ioka, faamatalaga uma pe moni ma saʻo le faaaogāina o le gagana e tusa ai ma aso nei. *

A māeʻa ona tusia ona lafo atu lea e le Matagaluega o Tusitusiga faamatalaga i le faitau selau o le ʻaufaaliliu i vaega eseese o le lalolagi. O le toʻatele o i latou e nonofo ma galulue i le vaipanoa o loo faaaogā ai le gagana, ma e latou te faaliliuina mataupu i a latou lava gagana. E tatau ona latou malamalama atoatoa i le mataupu lea na tusia i le faa-Peretania, faapea le gagana e faaliliu ai.

E faapefea ona fai le galuega a le ʻaufaaliliu?

Ua faamatala mai e Geraint, o sē e faaliliu e nofo i Peretania: “E matou te galulue ma isi sui o le ʻaufaaliliu ma o le vala autū o le galulue felagolagomaʻi. E matou te taumafai ina ia foʻia ni faafitauli tau faaliliu. A o matou faia faapea e matou te iloiloina e lē gata o upu taʻitasi a o fuaiupu. E matou te mafaufau totoʻa i le uiga moni ma le fuafuaga o le mataupu, ma manatua pea le ʻaufaitau o loo taulaʻi atu i ai mataupu taʻitasi.”

O le ā lou sini o se tagata faaliliu?

“O lo matou sini ia lagona e le tagata faitau e pei lava sa tusia le mataupu i lana gagana. Ia aua neʻi manatu o ia o se faaliliuga.  O lea e matou te taumafai ai e faaaogā le gagana e masani ai tagata. O lenā auala e faatumau ai pea le uaʻi mai a le tagata faitau, ma faaauau lana faitau e pei lava o loo ia taumafaina se meaʻai susua e manaia i le taumafa.”

O ā ni aogā o le nofo i le mea o loo tautatala ai tagata i le gagana?

“O le nofo i le mea o loo tautatala ai tagata i le gagana o se ʻoa tautele. Auā e matou te faalogo ai i le gagana e tautatala ai tagata i aso uma. E mafai foʻi ona matou fesili i ni tagata po o tusa ai a matou faaliliuga ma le gagana masani, pe malamalama ma talafeagai faaupuga o loo faaaogāina. E fesoasoani lea iā i matou e faaliliu ai le uiga moni o le mataupu na aumai i le gagana Peretania.”

E faapefea ona faamaopoopo la outou galuega?

“E galulue se vaega i se poloketi. Muamua, e faitau e sui taʻitasi o le vaega le mataupu lea na aumai i le faa-Peretania, ina ia maua le lagona o le mataupu, iloa le auala o loo tusia ai ma iloilo po o ai le ʻaufaitau e fitoitonu i ai. E matou te fesili ifo: ʻO le ā le fuafuaga o le mataupu? O le ā le manatu autū ma le tāua o le mataupu? O le ā ou te aʻoaʻoina mai ai?’ O nei fesili e fesoasoani iā i matou e mafaufau ai i mea eseese e aogā i la matou galuega faaliliu.“O le vala e sosoo ai o le fefaasoaaʻi o manatu o sui taʻitasi, ma aʻoaʻo e le tasi mea mai i le isi. Po ua matou malamalama lelei i le mataupu? E faapefea ona faaliliu ina ia tutusa ma le auala o loo tusia ai i le faa-Peretania? O lo matou sini ia maua e le ʻaufaitau le manatu e pei ona manaʻo ai le tusitala o le mataupu e maua e lana aofia.”

E faapefea ona galulue faatasi sui o le vaega?

“O lo matou sini ia malamalama le tagata faitau i le taimi muamua lava e faitau ai i le mataupu. O le pogai lea e matou te faitauina leotele ai e silia ma le faatasi palakalafa taʻitasi pe a uma ona faaliliu.

“E tā e le tagata faaliliu i le komepiuta se palakalafa i le gagana o loo faaliliuina ai, a o vaavaai atu i ai isi sui o le vaega. E matou te faamautinoa e lē o faaopoopo pe misi se manatu. E matou te vaai po o sologa lelei manatu, saʻo le sipelaina o upu ma le kalama o loo faaaogāina. A uma ona faitau leotele lea e se sui o le vaega le palakalafa. Afai e tautoʻai le faitau, e matou te iloiloina pe aiseā. A uma ona faaliliu le mataupu atoa, e faitau leotele  e se sui o le vaega le mataupu, a o faamaumau e le isi toʻalua po o fea vaega o le mataupu atonu e manaʻomia ona toe faaleleia.”

E foliga mai e faigatā le galuega!

“Ioe e faigatā! E uma ane le aso ua lagona le vaivai. O lea e matou te toe tilofaʻia ai le mataupu i le aso e sosoo ai auā ua toe faafouina le malosi. I ni vaiaso mulimuli ane, e lafo mai ai e le Matagaluega o Tusitusiga suiga mulimuli i le mataupu i le faa-Peretania. A uma ona tuu i totonu ia suiga, ona toe faitau lea auā ua pei o se mataupu fou ona na taatia mo sina taimi.”

O ā polokalame o le komepiuta tou te faaaogāina?

“E lē mafai e le komepiuta ona faia galuega e faia e le ʻaufaaliliu. Peitaʻi ua iai ni polokalame ua faia e Molimau a Ieova e fesoasoani e faafaigofie ai le galuega. O se tasi o ia polokalame o se ituaiga o lomifefiloi lea e tuu uma i ai upu ma faaupuga e masani ona faaaogā. O le isi polokalame ua mafai ai ona matou saʻiliʻili atili i mataupu ua uma ona faaliliuina, ma iloa ai le auala na foʻia ai nisi faafitauli i a matou faaliliuga muamua.”

O ā ni ou faalogona i la outou galuega?

“E matou te vāai i la matou galuega o se meaalofa i tagata. O le pogai lea e matou te faia ai le mea sili e mafai ina ia fiafia tagata e faitau ma maua ai aogā. E matou te matuā fiafia pe a pāʻia le loto ma suia le olaga o se tagata faitau i se mataupu i se mekasini po o le Upega tafaʻilagi.”

E faitau miliona tagata i le lalolagi aoao ua maua aogā mai i le faitauina o lomiga a Molimau a Ieova i a latou lava gagana. O le atamai aogā o loo i a latou lomiga, vitiō, faapea la latou Upega tafaʻilagi o le jw.org, e faavae mai i le Tusi Paia. O loo taʻu mai ai foʻi iā i tatou i lenā tusi e paia, o le Atua o lona suafa o Ieova, e finagalo e faailoa atu lana feʻau i tagata o “nuu uma, ma ituaiga uma, ma gagana uma.”—Faaaliga 14:6. *