O LE eseese ma le tele o gagana i le lalolagi ia pe ā ma le 7,000 i le taimi nei, ua faafaigatā ai femalagaaʻiga, fefaatauaʻiga, aʻoaʻoga, ma faigāmalo. Na iai lenei tulaga mai lava i aso anamua. O se faaaʻoaʻoga, pe tusa o le 2,500 tausaga ua mavae, i le pulega a le tupu o Asueru (atonu o Kesese 1), na auina atu ai e le malo o Peresia ni poloaʻiga i malo na ia pulea mai i “Initia e oo atu i Aitiope, e selau lua sefulu fitu itumalo, e avatu i itumalo taʻitasi i lana lava tusilima ma le gagana a ona lava tagata.” *

I aso nei, e lē o taumafai le tele o faalapotopotoga faapea foʻi malo e foʻia lea tulaga faigatā. Peitaʻi, e tasi lava le faalapotopotoga ua taulau manuia i lea tulaga. Ua saunia e Molimau a Ieova mekasini, tala faalogologo, ata vitiō, ma le tele o isi tusi e aofia ai le Tusi Paia, i gagana e silia i le 750. E aofia ai gagana fai taga e 80. E lomia foʻi e Molimau a Ieova faaliliuga eseese i le gagana patupatu mo ē e pō le vaai.

E lē gata i lea, e lē maua e Molimau a Ieova ni tupe mai i a latou taumafaiga. O le mea moni, o a latou tagata faaliliu ma isi e galulue e leai ni totogi. Aiseā ua latou faia ai nei taumafaiga fitā ina ia faaliliu i le tele o gagana? E faapefea ona latou faia lenā mea?