E UI lava o le Tusi Paia e lē o se tusi o faamatalaga faasaienisi, ae e saʻo aʻiaʻi faamatalaga o loo iai e faatatau i le lalolagi paneta. Seʻi iloilo faaaʻoaʻoga e uiga i le tau ma le sela faafanautama.

TAU—LE AUALA E MAUA AI LE TIMU

Ua faapea mai le Tusi Paia, ua “ave aʻe [e le Atua] matāua o vai; ua avea ma timu ma puao, ua mauluulu mai ao.”—Iopu 36:27, 28.

O loo faamatalaina i le Tusi Paia auala autū e tolu o le faataamilosaga o le vai i le lalolagi. E ave aʻe e le Atua o le Puna o le vevela mai i le lā, matāua o vai e ala i le (1) faaliu ausa. Ona (2) liua lea o le ausa e avea ma ao, ma toe paʻū mai i le eleele e ala i (3) timuga po o se isi foʻi auala. E oo lava i le taimi lenei, e lē o malamalama atoatoa tagata e suʻesuʻeina le tau i faamatalaga uma i le auala ofoofogia e maua ai le timu. Ua taʻua i le Tusi Paia: “O ai ea e mafai ona malamalama i faaputuga o ao?” (Iopu 36:29) Peitaʻi e na o Lē na foafoaina mea uma e malamalama i le faataamilosaga o le timu, ma na ia faamautinoa e faamauina e se tusitala i le Tusi Paia na faamatalaga saʻo aʻiaʻi. O le mea lenā na faia e le Atua, a o leʻi taitai mafai ona faamatalaina e tagata le faataamilosaga o le timu.

SELA FAAFANAUTAMA—SE PEPE FAATOʻĀ AFUAFUA

Na faapea atu le tupu o Tavita o se tusitala o le Tusi Paia i le Atua: “Na silasila mai lava ou fofoga ina o afuafua aʻu, na tusia foʻi i lau tusi ona vaega uma.” (Salamo 139:16) I se gagana faafatusolo, na faamatalaina ai e Tavita se pepe faatoʻā afuafua e fua i faamatalaga na tusia i se “tusi” po o se fuafuaga ua leva ona iai. O le mea e mataʻina ai, na tusia na faamatalaga i le pe ā ma le 3,000 tausaga ua mavae.

Peitaʻi na faatoʻā malamalama Gregor Mendel, o sē e suʻesuʻeina laau mai i Oseteria, e faatatau i sela faafanautama i se vaitaimi o le 1860. Na faatoʻā māeʻa foʻi iā Aperila 2003 saʻiliʻiliga a tagata suʻesuʻe i le sela e pulea amioga ma le tuputupu aʻe o le tagata, lea e iai uma faamatalaga e manaʻomia ina ia faia aʻe ai le tino o le tagata. Ua faamatalaina e saienitisi lenā sela e tai pei o se lomifefiloi e tumu i upu e faia aʻe i mataʻitusi o le alafapeta. O na upu e faatonutonuina sela faafanautama. E fua i nei faatonuga le faasologa ma le taimi e tatau ona tuputupu aʻe ai vaega eseese o le tino o se pepe faatoʻā afuafua, e pei o le faiʻai, fatu, māmā, lima ma vae. Ua faamatalaina e saienitisi le sela lea e pulea amioga ma le tuputupu aʻe o le tagata, o “le tusi o le ola.” Na faapefea ona saʻo aʻiaʻi faamatalaga na tusia e le tupu o Tavita? Na ia taʻutino mai ma le lotomaulalo: “O aʻu na fai mai ai le agaga o Ieova, * o lana afioga foʻi sa i loʻu laulaufaiva.”—2 Samuelu 23:2.

E MATUĀ faigatā pe e lē mafai ona iloa po o afea, e faapefea ma po o le ā le umi e tulaʻi mai ai pe paʻuʻū ai ni malo ma ni aai. Peitaʻi, ua faamatala auʻiliʻili mai i valoaga o le Tusi Paia le faaumatiaga o malo ma aai malolosi. Seʻi iloilo ni faaaʻoaʻoga se lua.

LE PAʻŪ MA LE FAATAFUNAINA O PAPELONIA

Sa avea Papelonia anamua ma taulaʻiga autū o se emepaea malosi, ma na telē se aafiaga o lana pulega i Asia i sisifo mo le tele o senituri. I se tasi taimi sa avea ai ma aai e sili ona telē i le lalolagi. Peitaʻi, na faagaeeina e le Atua le tusitala o le Tusi Paia o Isaia e valoia le faatoʻilaloina o Papelonia e se tasi e igoa iā Kuresa, ma e lē toe ʻainā e faavavau, i le pe tusa ma le 200 tausaga a o lumanaʻi lona faataunuuina. (Isaia 13:17-20; 44:27, 28; 45:1, 2) Po o le mea moni lenā na tupu?

I le pō e tasi iā Oketopa 539 T.L.M., na faatoʻilaloina ai Papelonia e Kuresa le Sili. E leʻi umi ae poloka alāvai sa fesoasoani e faasūsū laufanua lafulemu sa siʻomia ai Papelonia. E oo ane i le 200 T.A., ua lē toe ʻainā lenā vaipanoa. I aso nei, e na o toega o le aai o Papelonia o loo iai. E pei lava ona valoia i le Tusi Paia, e avea Papelonia ma “mea ua faatafunaina atoa.”—Ieremia 50:13.

O fea na maua mai ai e le tusitala o le Tusi Paia na faamatalaga saʻo? Ua faailoa mai i le Tusi Paia, ʻo le feʻau lea faasaga iā Papelonia na vaaia e Isaia le atalii o Amota i se faaaliga.’—Isaia 13:1.

NINEVA—“O SE VAIPANOA E LEAI SE VAI E PEI O LE TOAFA”

Sa manatu iā Nineva le laumua o le emepaea o Asuria, o se tasi o aai matagofie i le lalolagi ona o le auala na fausia ai. Na lauiloa i ona auala tetele, togālaau, malumalu tapuaʻi ma maota tetelē. E ui i lea, na valoia e le perofeta o Sefanaia o le a avea lea aai matagofie “ma mea e faatafunaina, o se vaipanoa e leai se vai e pei o le toafa.”—Sefanaia 2:13-15.

Na faaumatia atoatoa Nineva e ʻautau tuufaatasi a Papelonia ma Metai i se vaitaimi o le 630 T.L.M. Na faamatalaina i se tasi tusi, “e 2,500 tausaga na mou atu ai” lenā aai na faatoʻilaloina. E mo sina taimi na masalosalo ai tagata pe na iai moni lava Nineva. Na faatoʻā maua i se vaitaimi o le 1850 e tagata e eliina palapala toega o le aai o Nineva. I aso nei, o loo faasolosolo ina pala ma faaleagaina na toega o mea, ma ua uunaʻia ai le Global Heritage Fund e faailoa mai: “E ono toe mou atu foʻi toega o le aai o Nineva.”

O fea na muaʻi maua mai ai e Sefanaia ana faamatalaga? Na ia faapea mai “o le afioga a Ieova na oo mai iā [te ia].”—Sefanaia 1:1.

O LOO iai i le Tusi Paia tali faamalieloto i fesili tāua i le olaga. Seʻi mātau faaaʻoaʻoga o loo mulimuli mai.

AISEĀ UA MATUĀ TELE AI LE LEAGA MA MAFATIAGA I LE LALOLAGI?

O loo faamatalaina auʻiliʻili i le Tusi Paia le mataupu e faatatau i le leaga ma mafatiaga. Ua faapea mai le Tusi Paia:

1. ʻUa pule le tagata i le isi tagata ma ua matuā afāina ai o ia.’—Failauga 8:9.

   O le leai o se tomai ma le piʻopiʻo o pulega faaletagata ua iʻu ai i le tele o mafatiaga.

2. “E tutupu faafuaseʻi mea iā i latou uma i le taimi e leʻi faatalitalia.”—Failauga 9:11.

   O mea e tutupu faafuaseʻi e pei o maʻi tugā, faalavelave faafuaseʻi po o mala, e mafai ona aafia ai so o se tasi, i so o se mea ma i so o se taimi.

3. “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala.”—Roma 5:12.

   Ina ua foafoaina le uluaʻi tamāloa ma le uluaʻi fafine i le amataga, e leʻi iai le tulaga lē lelei atoatoa ma le oti. Na ʻoo mai le agasala i le lalolagi’ ina ua la lē usiusitaʻi ma le loto iai i Lē na foafoaina i laʻua.

E sili atu mea ua faamatalaina mai i le Tusi Paia, nai lo o le na ona faailoa mai pe aiseā ua mafatia ai tagata. Ua folafola mai foʻi o le a tafiesea atoatoa e le Atua le leaga ma “soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”—Faaaliga 21:3, 4.

O LE Ā E TUPU IĀ I TATOU PE A TATOU FEOTI?

Ua faamatalaina i le Tusi Paia pe a maliu se tasi, e na te lē toe iloa se mea ma e lē mafai ona toe faia se gaoioiga. O loo taʻua i le Failauga 9:5: “Auā o ē ua ola ua latou iloa e oti i latou; a o ē ua oti, latou te lē iloa se mea.” Pe a tatou feoti e ʻfaaumatia ai ma o tatou manatunatuga.’ (Salamo 146:4) O lea, e lē toe gaoioi o tatou faiʻai e aofia ai ma o tatou lagona. O lona uiga, pe a tatou feoti e lē mafai ona tatou toe gaoioi, lagona pe manatunatu.

Peitaʻi, e lē na o le tulaga o ē ua maliliu o loo faamatalaina i le Tusi Paia. O loo aumaia ai foʻi le faamoemoe matagofie o le a fafagu mai ē ua moegase i le oti, e ala i le toetū.—Hosea 13:14; Ioane 11:11-14.

O LE Ā LE FUAFUAGA O LE OLAGA?

O loo faamatalaina i le Tusi Paia, na foafoaina e Ieova le Atua le tamāloa ma le fafine. (Kenese 1:27) Ua taʻua le uluaʻi tagata o Atamu, “o le atalii o le Atua.” (Luka 3:38)  Na foafoaina le tagata ma se fuafuaga ina ia atiaʻe se faiā ma lona Tamā i le lagi, ma ia ola fiafia ma faia galuega i luga o le lalolagi e faavavau. O le māfuaaga lea na tuuina ai i tagata se faanaunauga mo mea faaleagaga, po o se faanaunauga e aʻoaʻoina e faatatau i le Atua. O lea, ua faapea mai le Tusi Paia: “E fiafia o ē e naunau i mea faaleagaga.”—Mataio 5:3.

O loo taʻua foʻi i le Tusi Paia: “Amuia i latou e faalogo i le afioga a le Atua ma tausi i ai!” (Luka 11:28) E lē gata e aʻoaʻoina i tatou e le Tusi Paia e faatatau i le Atua, ae e fesoasoani mai foʻi ina ia tatou ola fiafia ma maua le faamoemoe mo le lumanaʻi.

I LE māeʻa ai ona iloiloina o faamaoniga, ua manatu le faitau miliona o tagata i le lalolagi atoa, o le Tusi Paia e lē na o se tusi mai anamua. E latou te talitonu o le Tusi Paia o le Afioga faagaeeina a le Atua, po o le auala e fesootaʻi mai ai i tagata e aofia ai ma oe. E aofia ai le valaaulia a le Atua mo oe ina ia e iloa o ia ma avea ma ana uō. Ua folafola mai i le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.

O le faia o ni saʻiliʻiliga loloto i le Tusi Paia, e mafai ona e iloa ai se mea matagofie. O le ā lenā mea? E pei lava ona e iloa mea o loo i le mafaufau o se tusitala e ala i le faitau o le tusi, e faapena foʻi ona e iloa manatu ma faalogona o le Tusitala o le Tusi Paia o le Atua, e ala i le faitau i ai. Seʻi mafaufau i le aafiaga o lenā mea iā te oe. E mafai ona e iloa le finagalo ma faalogona o Lē na foafoaina oe. E lē gata i lea, ua faailoa mai foʻi i le Tusi Paia:

• Le suafa o le Atua ma ona uiga matagofie.

• Le finagalo o le Atua mo tagata.

• Le auala e atiaʻe ai sau faiā ma le Atua.

Pe e te fia iloa atili e faatatau i na manatu? E fiafia Molimau a Ieova e fesoasoani atu iā te oe. E mafai ona latou faia se fuafuaga ina ia e suʻesuʻeina le Tusi Paia e aunoa ma se totogi. O le a fesoasoani lea iā te oe e mafuta vavalalata atu ai i le Tusitala o le Tusi Paia, o Ieova le Atua.