I nisi aiga e faatalitalia fanau e fesoasoani i feʻau i le fale, ma e latou te faia e aunoa ma le tomumumu. Ae i isi aiga, e lāiti mea e faatalitalia e mātua mai i a latou fanau, ma e fiafia fanau pe a lāiti feʻau e latou te faia.

O se masaniga ua mātauina e tagata suʻesuʻe aemaise lava i atunuu i Sisifo le faatalitalia e fanau e auauna atu isi iā i latou, nai lo o le fesoasoani i totonu o le aiga. Ua faapea mai se matua e suafa iā Steven, “I aso nei ua saʻoloto fanau e taaalo i taaloga vitiō, faaaogā le Initaneti, ma matamata i le TV. E itiiti lava mea e faatalitalia mai iā i latou.”

Ae o le ā sou manatu? Pe e lē tāua ea feʻau e lē gata mo le faatumauina o le mamā ma le lelei o le fale, ae mo le tuputupu aʻe foʻi o le tamaitiiti?

O nisi mātua e faatalatū e avatu feʻau, aemaise lava pe afai e pisi le tamaitiiti i le tele o ana meaaʻoga ma mea e fai pe a uma le aʻoga. Peitaʻi, ia mātau aogā o le avatu o feʻau.

O feʻau e fesoasoani i le tamaitiiti ina ia faatagata matua ai i le mafaufau. O tamaiti e faia feʻau i le fale e masani lava ona sili atu ona taulau i le aʻoga, ma e lē o se tulaga e faateʻia ai. Talu ai o le faia o feʻau i le fale e fesoasoani i le tamaitiiti e atiaʻe ai le mautinoa, pulea o ia lava, ma ia maumauaʻi, o uiga ia e tāua mo le aʻoaʻoina o ia.

O feʻau e aʻoaʻoina ai tamaiti e fesoasoani atu i isi. Ua mātauina e isi, o tamaiti e faatalitalia e fesoasoani i o latou aiga, e ono fesoasoani atu foʻi i isi pe a oo ina matutua. E lē o se mea la e faateʻia ai, ona o feʻau ua toleni ai i latou e faamuamua manaʻoga o isi nai lo o o latou lava manaʻoga. Ae i le isi itu, ua faapea mai Steven lea na taʻua i le amataga: “Pe afai e leai se mea e faatalitalia mai iā i latou, e faatalitalia la e fanau isi e auauna atu. E latou te ola aʻe foʻi ma se vaaiga sesē e faatatau i le olaga e uiga i tiute tauave ma galuega mamafa.”

O feʻau e saosaolaumea i le autasi o le aiga. O le faia o feʻau i le aiga, e iloa ai e fanau e lē gata e tāua i latou, ae e iai foʻi lo latou tiute tauave e fesoasoani i le aiga. E ono lē tāmau lenā manatu i le mafaufau o le tamaitiiti, pe a faatāua e mātua mea e fai pe a tuua le aʻoga nai lo o feʻau. Ia fesili ifo iā te oe lava, ʻO le ā e iʻu i ai pe afai e tele atu le taimi e faaalu e loʻu alo i le ʻausoka ae itiiti le taimi e mafuta ai i le aiga?’

Amata a o laʻitiiti. O isi ua faapea mai e tatau i mātua ona tuu atu feʻau i tamaiti pe afai ua atoa le taʻitolu tausaga. Ae e manatu isi e lelei le tuu atu i ai o feʻau pe a lua pe itiiti ifo tausaga o le tamaitiiti. Peitaʻi, o le manatu tāua, e fiafia fanau iti e galulue faatasi ma o latou mātua ma faaaʻoaʻo iā i latou.—Mataupu silisili o le Tusi Paia: Faataoto 22:6.

Tuu atu feʻau e talafeagai ma lo latou matutua. O se faaaʻoaʻoga, atonu e mafai e se tamaitiiti e tolu tausaga ona aoina meataalo, solo mea ua masaa, po o le faavasega foʻi o le tagamea. Ae e mafai e tamaiti matutua ona teu le fale, fufulu le taavale ma kuka se meaʻai. Ia iloa mea e gata ai le mafai o lou alo. Atonu e faateʻia oe i lona naunau e faia feʻau.

Ia faatāua le faia o feʻau. Atonu e faigatā pe afai o loo feagai lou alo ma le tele o meaaʻoga i aso taʻitasi. Peitaʻi ua faapea mai le tusi The Price of Privilege, o le lē tuu atu o feʻau ona o lou manaʻo ia maua e lou alo ni togi maualuluga, “o se faailoga lea o le sesē o mea e ave i ai le faatāua.” E pei ona taʻua muamua atu, e fesoasoani le faia o feʻau i le tamaitiiti ina ia taulau ai i le aʻoga. O le faatāua o le faia o feʻau, o le a sauniunia ai i latou i le taimi e fai ai o latou lava aiga.—Mataupu silisili o le Tusi Paia: Filipi 1:10.

Taulaʻi i aogā o le faia o feʻau. Atonu e tele se taimi e faaalu e lou alo i le faatinoina o se feʻau na tuuina atu iā te ia. Atonu foʻi e te mātauina e mafai ona sili atu le lelei o le faatinoga o le feʻau. Pe afai o le tulaga lenā, ʻalofia lou taumafai e faamāeʻa le faia o feʻau ia e fai e lou alo. O lou sini e lē ina ia faia feʻau i se auala e faia ai e se tagata matua, ae ia fesoasoani i lau fanau e iloa le tāua ma le fiafia e maua mai i le faia o feʻau.—Mataupu silisili o le Tusi Paia: Failauga 3:22.

Taulaʻi i le māfuaaga saʻo. O nisi e faapea mai o le totogiina o se tamaitiiti, o le a ia faatāuaina ai le faia o feʻau. Ae o isi e faapea mai, o le a taulaʻi atu ai tamaiti i na o mea e maua mai i o latou aiga nai lo o mea e mafai ona fesoasoani atu ai. Ua latou lapataʻi mai foʻi, atonu o le a musu lou alo e faia feʻau pe afai ua lava lana tupe, o se faailoga lea ua amata ona mou atu le aogā o le faia o feʻau. O le ā le lesona? Atonu e lelei le faamautinoa i le tamaitiiti, o so o se tupe e tuuina atu iā te ia e lē o se totogi mo le faia o feʻau.