Se Vaifofō Tumau
E faitau miliona tagata ua faatatauina mataupu silisili na taʻua i mataupu ua mavae. Na latou faia ni taumafaiga e liaʻiese ai le faailoga tagata. Ae o le mea moni, e lē mafai ona tatou aveesea atoatoa le faailoga tagata i so tatou malosi. Po o lona uiga la e lē mafai ona aveesea atoatoa le faailoga tagata?
Se Faigāmalo Lelei Atoatoa
E lē o mafai e faigāmalo faaletagata ona aveesea le faailoga tagata. Po o lona uiga la, e leai se faigāmalo e mafai ona aveesea?
Ina ia aveesea e se faigāmalo le faailoga tagata, e manaʻomia ona
-
1. Uunaʻia tagata e suia le auala e mafaufau ai ma feutagaʻi ma isi.
-
2. Foʻia faafitauli na māfua mai le faailoga tagata.
-
3. Iai ni taʻitaʻi e lē faailoga tagata.
-
4. Autasia tagata o atunuu uma.
Ua faamautinoa mai e le Tusi Paia, ua saunia e le Atua lenā faigāmalo. Ua taʻua “o le Malo o le Atua.”—Luka 4:43.
Mātau mea o le a faia e lenā faigāmalo.
1. Aʻoaʻoga Sili Ona Lelei
“O le a aʻoaʻoina le amiotonu e ē o loo nonofo i le laueleele.”—ISAIA 26:9.
“O le a tupu le filemu mai i le galuega a le amiotonu moni, e tupu foʻi le toʻafilemu ma le saogalemu mai i le auaunaga a le amiotonu moni, e oo i le faavavau.”—ISAIA 32:17.
O le ā le uiga? O le a aʻoaʻoina e le Malo o le Atua tagata i le mea tonu. Pe a aʻoaʻoina e tagata le mea saʻo mai le mea sesē, le mea tonu mai le mea lē tonu, o le a suia ai la latou vaaiga i isi. O le a iloa ai foʻi e tagata uma o le mea tonu e tatau ona fai, ia alolofa i ituaiga uma o tagata.
2. Aveese le Faailoga Tagata
ʻE soloiesea e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’—FAAALIGA 21:4.
O le ā le uiga? O le a aveesea e le Malo o le Atua tigā uma na māfua ona o le faailoga tagata. O le a lē toe iai se māfuaaga e feita ai i latou na aafia i le faailoga tagata.
3. Se Taʻitaʻi Lelei
“O le a lē faamasino e ia e tusa ma mea e vaai i ai ona mata, e lē aʻoaʻi atu foʻi e tusa ma mea e faalogo i ai ona taliga. E faamasino e ia ma le amiotonu ē ua faatauvaa, e aʻoaʻi atu foʻi e ia ma le amio saʻo ina ia maua aogā e tagata agamalu o i le lalolagi.”—ISAIA 11:3, 4.
O le ā le uiga? O le a pule ma le tonu ma le lē faailoga tagata i le lalolagi Iesu Keriso, le tupu faalelagi o le Malo o le Atua. E tutusa atunuu uma i le silafaga a Iesu, ma e na te faamautinoa ua usitaʻia e tagata uma ana tulafono amiotonu.
4. Autasi
O loo a‘oa‘oina e le Malo o le Atua tagata, ia “tutusa o [latou] mafaufauga, ma tutusa lo [latou] alofa, ma ia lotogatasi, ma ia manatunatu i le mea e tasi.”—FILIPI 2:2.
O le ā le uiga? E lē tau ina foliga mai e autasi tagatānuu o le Malo o le Atua. E latou te “lotogatasi” ona e alofa le tasi i le isi.
E te Ono Fiafia Foʻi
LE OLOMATAMATA
Lalolagi e Aunoa ma le Faailogatagata—O Afea?
Ua faaalia i mea moni na tutupu, le fesoasoani a le Tusi Paia i tagata e aveesea lenei uiga o le faailogatagata. O afea o le a aveesea atoatoa ai?
