Pe na teʻi lava ua iai le vateatea ma le ola, pe na foafoaina e le Atua? E matuā eseese manatu o saienitisi o loo taʻua i lenei mataupu, ma le manatu o le Tusi Paia e faatatau i lenei fesili. E iai tagata e lagolagoina manatu o nei saienitisi, ae e iai foʻi i latou e lagolagoina le manatu o le Tusi Paia. Peitaʻi o le toʻatele e lē o mautinoa i lenei mataupu. Ua feteenaʻi tagata i lenei mataupu, e ala i tusi ma polokalame o le televise.

Atonu ua aʻoaʻoina ma le mautinoa e au faiaʻoga, na teʻi lava ua iai le vateatea ma le ola ma e leai se tasi na foafoaina. Ae pe na aumai e au faiaʻoga ni faamaoniga e leai Sē na foafoaina mea? Atonu na e faalogo o loo talaʻi e taʻitaʻi lotu e iai Sē na foafoaina mea. Ae pe na latou aumaia ni faamaoniga o latou faamatalaga? Pe na latou faamalosia oe e talitonu i le Atua e aunoa ma ni faamaoniga?

E mautinoa na e mafaufau i lenei fesili. Peitaʻi, atonu e te manatu e leai se isi e iloa moni pe e iai Sē na foafoaina mea. E te ono fesili foʻi: Pe e tāua le iloaina o le tali o lenā fesili?

O le a talanoaina i lenei lomiga o le Ala Mai! faamatalaga moni ua uunaʻia ai le toʻatele e talitonu e iai Sē na foafoaina mea. O le a talanoaina ai foʻi, pe aiseā e tāua ai le tali o le fesili e faatatau i le amataga o le ola.