• Ua manaʻomia ona siitia le tou aiga ona o le galuega a lou tamā.

• E mamao le mea ua siitia i ai lau uō mamae.

• Ua alu ese lou tei matua mai i le tou aiga ina ia faaipoipo.

E faapefea ona e feagai ma nei suiga?

O se laau e falala i le itu e agi agaʻi i ai le matagi, e tele lava ina tū pea pe a uma se afā. I le pei o lenā laau, e mafai foʻi ona e fetuunaʻi pe a tulaʻi mai suiga e itiiti se mea e mafai ona e faia i ai, pe e lē mafai foʻi ona e pulea. Ae a o leʻi talanoaina auala e te faia ai faapea, seʻi iloilo muamua nisi o mea e tatau ona e iloa e faatatau i suiga.

E lē mafai ona ʻalofia suiga. Ua taʻua i le Tusi Paia se mea moni e faatatau i tagata: “E tutupu faafuaseʻi mea iā i latou uma i le taimi e leʻi faatalitalia.” (Failauga 9:11) E iai le taimi o le a e iloa ai le moni o nei upu. Peitaʻi e lē o mea uma e tutupu faafuaseʻi e leaga. O nisi suiga e foliga mai i le taimi muamua e leaga, ae atonu e uma ane e aogā. E ui i lea, o le toʻatele o tagata e fiafia i se faasologa masani, ae e tulaʻi mai loa suiga e tusa pe lelei pe leaga, e faigatā tele ona latou fesagaʻia.

E sili ona faigatā i talavou pe a tutupu mai suiga. Aiseā? Ua faamatala e se alii talavou e igoa iā Aleki *: “O lea ua e tofo i āuga o suiga ua tutupu iā te oe lava, ae ua atili ai ona faigatā pe a tutupu nisi suiga i lou siʻomaga.”

O le isi māfuaaga lenei: Pe a feagai tagata matutua ma se suiga, e mafai ona latou toe manatunatu i mea na tutupu iā i latou, ina ia iloa ai le auala na feagai ai ma ni suiga faapena i taimi ua mavae. Peitaʻi, e lē lava se poto masani o talavou i suiga i le olaga.

E mafai ona e fetuutuunaʻi. O nisi talavou ua latou atiaʻe le tomai ia toe lelei o latou faalogona mai i se tulaga lē lelei na tupu, pe fetuunaʻi e tusa ai ma suiga. E lē gata e mafai ona latou onosaʻia se tulaga fou e tupu, ae a tulaʻi mai foʻi se tulaga e foliga mai e faigatā, e latou te vāai i itu lelei o lenā tulaga. O talavou e iai lenei tomai, e ono lē lolo atu i fualaau faasāina po o le ʻava malosi pe a lagona le lofitūina i suiga.

Talia le tulaga moni. E mautinoa e te manaʻo ia sologa lelei lou olaga, peitaʻi e lē mafai ona tupu lenā tulaga. O le a siitia ese pe faaipoipo au uō; o le a faasolo ina matutua ou tei ma tuua le aiga; o tulaga e tutupu mai e ono manaʻomia ai ona siitia le tou aiga, ma tuua ai uō ma mea uma na masani ai. E sili pe a talia le tulaga moni o mea nai lo o le lofitūina i mafaufauga lē saʻo.—Mataupu silisili o le Tusi Paia: Failauga 7:10.

Taulaʻi i le lumanaʻi. O le taulaʻi i le taimi ua teʻa ua pei o le aveina o se taavale ae o loo e pulatoʻa i le faata e iloa atu ai mea i tua. E aogā le fai ma tepa i le faata e iloa atu ai tua, ae e matuā manaʻomia ona e taulaʻi i luma i le auala. E faapena foʻi pe a e feagai ma se suiga. Ia taumafai e taulaʻi i le lumanaʻi. (Faataoto 4:25) O se faataʻitaʻiga, o le ā sou sini e mafai ona faataatia mo le masina fou po o le ono masina o i luma?

Taulaʻi i mea lelei. Ua faapea mai se tamaʻitaʻi talavou e igoa iā Laura: “O le fetuutuunaʻi e faalagolago i lau vaaiga. Ia vaai po o ā itu lelei o le mea ua tupu iā te oe.” Pe e mafai ona e mafaufau i se itu lelei o le suiga fou ua e oo iai? —Mataupu silisili o le Tusi Paia: Failauga 6:9.

E manatua e se tamaʻitaʻi talavou e igoa iā Victoria le taimi a o aʻoga, na siitia ese uma ai ana uō mamae. Ua faapea mai o ia: “Sa ou lagona le matuā tuuatoʻatasi, ma na ou moomoo maʻimau pe ana tumau pea mea i le tulaga na iai. Ae pe a toe mafaufau i tua, o le taimi tonu lava lenā na amata ai ona ou faatagata matua. Na ou iloa ai i inā e manaʻomia suiga ina ia tuputupu aʻe ai faatagata matua. O le taimi foʻi lenā na ou iloa ai o loo iai isi e mafai ona ou faauō i ai.”—Mataupu silisili o le Tusi Paia: Faataoto 27:10.

Ia fai mea mo isi. Ua taʻua i le Filipi 2:4: “Ia vaavaai ma le naunau e lē gata i au lava mea, ae i mea foʻi e lelei ai isi.” O se vaifofō lelei lava e te feagai ai ma luʻi, o le fesoasoani lea i isi i o latou faafitauli. Ua faapea mai Ana e 17 tausaga: “A o faasolo ina ou matua, na ou iloa ai e maʻeu le faamalieina pe a ou fesoasoani i se tasi atonu e tutusa tulaga o loo ma fesagaʻia, pe e sili atu foʻi ona faigatā!”