Ia Puipuia Lau Tama Mai Faalavelave Faafuaseʻi

TUSIA E LE SUI O LE ALA MAI! I SUETENA

O HANA, ua toetoe lava atoa le tolu o ona tausaga, sa iai faatasi ma ona mātua, o Karl-Erik ma Birgitta, a o latou faamamāina le fale o se tuaoi ua maliu. Ina ua mavae sina taimi, ae sau loa Hana i fafo o se potu ma uu mai se fagu fuālaau. Ua uma ona ia ʻaia nisi o nei fuālaau. I le suʻesuʻeina o lenei fagu, sa matuā faateʻia ai lava Birgitta. O se fagu o fuālaau mo le fatu a le tuaoi.

Sa faavave lava ona auina atu Hana i le falemaʻi, lea sa taofia ai o ia i le po atoa mo vaavaaiga faapitoa faafomaʻi. E ui sa foloina e Hana se vaega o fuālaau lea sa ono faaleagaina tumau ai lona soifua mālōlōina, ae na leai ni aafiaga ia te ia. Aiseā? Auā sa ia ʻaia se polesi a o leʻi ia foloina fuālaau. O se vaega o le oona o fuālaau sa mitiia e le polesi, lea na sau i fafo ina ua faasuati mai.

O le mea na tupu ia Hana e lē o se mea fou. I aso taʻitasi, e faitau afe tamaiti i le lalolagi aoao e aafia i ni faalavelave faafuaseʻi ma oo ai ina avatu e vaai se fomaʻi po o le ave foʻi i le falemaʻi. I tausaga taʻitasi, e tasi mai le toʻavalu o tamaiti i Suetena e faia i ai ni togafitiga faafomaʻi ona o ni faalavelave faafuaseʻi. O lea la, afai o oe o se matua, o loo telē la se avanoa e ono oo ai se faalavelave faafuaseʻi faapena i lou alo.

E lē o se mea fou le lavevea soo o tamaiti i se siʻomaga masani, e pei o le aiga ma mea o loo siʻomia ai. O ituaiga o lavevea e oo ia i latou e suia a o agaʻi ina matutua. E faigofie lava ona paʻū se tamaitiiti laitiiti mai le laulau o loo sui ai lona napekini po o le laoa foʻi i se fasi meaʻai po o sina mea malō laitiiti e mau i lona faaʻī. E masani lava ona paʻūū tamaiti laiti pe a latou feʻaʻei solo po o le oo foʻi ina mu pe onanā pe a latou paʻi atu po o le tofotofoina foʻi o mea e latou te āu atu i ai. O tamaiti ua i le matutua e ō ai i le aʻoga e masani lava ona lavevea i faalavelave tau taavale pe lavevea foʻi a o taaalo i fafo.

O le tele o nei faalavelave faafuaseʻi e mafai lava ona taofia lo latou tutupu mai. O le iai o sina tōfāmamao ma se poto e uiga i le tuputupu aʻe o lau tamaitiiti, e mafai ona e fesoasoani e puipuia mai ai i le lavevea po o le oo i faalavelave faafuaseʻi e  feoti ai. Ua mafai ona faamaonia lenei manatu e se polokalame faamaopoopoina o le saogalemu o tamaiti lea na tauaveina i Suetena talu mai le 1954. A o leʻi oo i lena taimi, e sili atu i le 450 tamaiti e feoti i tausaga taʻitasi i faalavelave faafuaseʻi. I aso nei, ua paʻū ai le fuainumera o tamaiti feoti i le tausaga i le tusa ma le 70.

Totonu o le Fale

“E lē mafai ona e aʻoaʻoina se tamaitiiti e tasi le tausaga, lua tausaga, po o le tolu tausaga e ʻalofia lamatiaga ona e manatu lea o le a latou manatuaina,” o le faamatalaga lea a se tagata e suʻesuʻe i le mafaufau ma amioga a tamaiti o Kerstin Bäckström. O lea la, o le tiute tauave mo le fesoasoani atu i lau tamaitiiti e ʻalofia faalavelave faafuaseʻi e fitoitonu ia te oe o le matua—po o isi tagata matutua o loo nonofo ma tamaiti mai lea taimi i lea taimi.

Ina ia amata, seʻi tagaʻi lelei i lou aiga. Faaaogā le lisi o loo i le pusa o loo sosoo ai. Atonu o nisi o mea faapitoa mo le saogalemu e lē o mauaina i atunuu uma pe e lē o mauaina foʻi i se tau talafeagai. Ae peitaʻi o le iai o sina tomai ma le mafaufau lelei, e ono mafai ai ona e tomānatu i vaifofō o le a aogā i lou lava tulaga patino.

Mo se faataʻitaʻiga, pe afai e iai ni pu i ʻau o kapoti o lau umukuka, e mafai ona e lokaina e ala i le sulu i ai o se laau i ʻau. O le auala lava foʻi e tasi e mafai ona fai e loka ai le faitotoʻa o le ogaumu. O le a itiiti lamatiaga i pepa iila pe a e nonoa ni faapona pe a e teuina na mea.

Atonu e mafai ona e mafaufau i isi auala faigofie e taofia ai le tutupu o faalavelave faafuaseʻi i totonu o lou aiga ma e mafai ona tufa atu nei faamatalaga i uō ma ē tou te masani o loo iai tamaiti laiti.

Fafo Atu o le Fale

Ia siaki le vaipanoa o loo taalo ai lau tamaitiiti. O le tele o faalavelave faafuaseʻi e tutupu i tamaiti e sili atu i le fā tausaga, e tutupu pe a latou taaalo i fafo. E latou te paʻūū ma āfaina ai i latou pe atonu foʻi e paʻūū ia latou uila vilivae. O faalavelave faafuaseʻi taatele o loo feoti ai tamaiti i le va o le tolu ma le fitu tausaga o faalavelave tau taavale ma le malelemo.

Pe a e asiasia malae taalo, ia siaki po o lelei tulaga o mea o loo faaaogāina ina ia lē lavea ai le tamaitiiti pe a faaaogā ia mea. Po o iai ni mea malūlū e pei o oneone i lalo ane o suigi a tamaiti, ma mea e fausia e feʻaʻei ai tamaiti, ma isi mea taalo faapena, ina ia lē manuʻa le tamaitiiti pe a paʻū i lalo?

Po o iai ni vaitāʻele po o ni vaitafe i tafatafa ane o lou fale? E na o ni nai inisi lava o le vai e mafai ona malemo ai se tamaitiiti e tasi pe lua tausaga. Ua faapea mai se tagata e suʻesuʻe i mafaufau ma amioga a tamaiti o Bäckström: “Pe a paʻū faō se tamaitiiti laitiiti i le vaitāʻele, e lē toe iloa e ia po o  fea luga a o fea lalo. E lē mafai e le tamaitiiti ona toe foʻi mai i luga.”

O lea la, o le tulafono autū sili lenei: Ia aua lava neʻi tuua se tamaitiiti i le va o le tasi ma le tolu tausaga e taalo na o ia i fafo e aunoa ma le vaavaaia lelei e se tagata matua. Afai e tele ni vai e latalata ane i lou aiga, faatali seʻiloga ua lava le matua lelei o le tamaitiiti ona faatoʻā faatagaina lea o ia e taalo i fafo e aunoa ma le tau vaavaaia.

I le Feoaʻiga o Taavale

O le tulaga lava foʻi lena e tasi pe afai e feoaʻi taavale i autafa o lou fale. “O se tamaitiiti e leʻi aʻoga e malamalama lava na o feʻau e manino ma tuusaʻo, ma e taulaʻi atu i le mea e tasi i le taimi e tasi,” ua mātauina ai faapena e Bäckström. “Ae o taavale, e tele faailoilo e fai mai e faigatā ona malamalama i ai, atoa ai ma feʻau e uiga lua.” Ia aua lava neʻi tuuina atu lau tamaitiiti e sopoʻia le auala na o ia a o leʻi oo i le matua e alu ai i le aʻoga. E iai le manatu faapea o tamaiti e leʻi lava le matutua e ō ai na o i latou i uila vilivae i le pisi o taavale, a laitiiti mai o le 12 tausaga, e tusa ai ma tagata popoto faapitoa.

Aʻoaʻo lau tama e faaaogā se pulou malō a o alu i le uila, pe tietie foʻi i se manu, pei o le solofanua, faasee i lola, po o laupapa faasee. E faigatā ona togafitia manuʻa i le ulu ma e mafai ona faapogaia ai se manuʻa tumau—po o le oo foʻi ina oti ai! I se tasi o falemaʻi o tamaiti, o le 60 pasene o tamaiti na togafitia i manuʻa i faalavelave tau uila na mafatia i manuʻa o le ulu ma foliga, ae o i latou na faaaogāina pulou malō sa leʻi mafatia i ni manuʻa matuiā i ulu.

Ia faamautinoa foʻi, o loo saogalemu lau tamaitiiti pe a malaga atu i se taavale. O le tele o atunuu e iai a latou tulafono lea e manaʻomia ai ona faamau lelei le tamaitiiti i le nofoa o tamaiti ua fausia faapitoa mo le saogalemu. Ua matuā faaitiitia ai lava le aofaʻiga o tamaiti manunuʻa ma tamaiti feoti na aafia i faalavelave tau taavale. Afai o loo mauaina nofoa mo le saogalemu o tamaiti i taavale i le mea o loo e mau ai, o le faaaogāina o lea nofoa e mafai ona faamautinoa ai le saogalemu o le ola. Ae ia faamautinoa o se nofoa o loo faamaoniaina lona lelei. Ia mātau o nofoa mo tamaiti pepe, e ese mai nofoa mo tamaiti e faasolo mai le tolu tausaga le matutua.

O a tatou fanau o meaalofa tāua mai ia Ieova, ma e tatou te mananaʻo e tausia lelei i latou i mea uma. (Salamo 127:4) Ona o i laʻua o ni mātua lelei, e masani ai lava ona manatu mamafa Karl-Erik ma Birgitta i le puipuia o le la fanau—a o leʻi tupu ma ina ua uma foʻi ona tupu le faalavelave faafuaseʻi na aafia ai Hana. Na ioeina e Karl-Erik i lona faapea mai: “Ae peitaʻi na sili atu lo ma faaeteete ina ua uma ona tupu lena faalavelave faafuaseʻi.” Na faaiʻu mai faapea Birgitta: “O lenei la ua fai fanau a ma fanau, ma e ma te faamautinoaina pea o loo lokaina a ma vailaau mai le falemaʻi.”

 [Pusa i le itulau 18]

Le Saogalemu i Lou Aiga

• Vailaau: Ia teuina ia vailaau i se kapoti e lokaina i se mea e lē āu i ai le tamaitiiti. E faapena foʻi i vailaau e lē o otaina mai i se fomaʻi ma vailaau faalenatura. E lē gata i lea, taʻu atu i mālō o loo momoe i lou fale mo se po, ia teuina a latou vailaau i se tulaga e malu puipuia mai tamaiti.

• Vailaau malolosi: Ia teuina ia mea i se kapoti e mafai ona loka ia aua neʻi āu i ai le tamaitiiti. Ia tuu pea i totonu o mea na muaʻi aumai ai ina ia manino ona mātauliaina ia mea. Ia matuā mataalia i vailaau a o e faaaogāina, ma ia teuina, e tusa lava pe na o sina taimi e te alu ese ai. Aua lava neʻi tuua vailaau na totoe i totonu o lau masini fuluipu.

• Ogaumu: Ia faaū ʻau o ulo e faapito i totonu o le ogaumu. Ia faapipii se mea e avea o se puipui pe afai o iai, ina ia taofi ai le faigofie ona see mai i lalo se ulo o i luga o le ogaumu. Ia faapipii i le ogaumu se mea e faapaleni ai neʻi paʻū i lalo pe a teʻi ua aʻe i ai se tamaitiiti i le tapuni o le ogaumu o loo matala. E tatau lava ona iai se mea e loka ai le tapuni o le ogaumu lava latou. Pe faamata e mu le tamaitiiti pe a paʻi atu i le tapuni o le ogaumu? Afai o le tulaga lena, ona faapipii lea o se mea e puipui ai le tapuni o le ogaumu po o se laupapa ina ia lē mafai e le tamaitiiti ona paʻi atu i le tapuni vevela.

• Lamatiaga i mea faigaluega a le aiga: Naifi, seleulu, ma meafaigaluega mataʻutia e ao ona teuina i kapoti po o pusatoso e iai loka po o mea e faamau ai po o le teuina i le mea e lē āu i ai le tamaitiiti. Pe a e faaaogāina na mea faigaluega ma tuu ese mo sina taimi, ia tuu mamao ese mai le pito o le laulau po o le fata, ia lē āu i ai le tamaitiiti. O afitusi ma tagapepa iila e mafai foʻi ona mataʻutia mo tamaiti laiti.

• Faasitepu: Ia faia ni puipui, a itiiti mai e 30 inisi [70-75 senitimita] le maualuga, i itu uma e lua o faasitepu.

• Faamalama ma faitotoʻa o poletito i se fogafale i luga: Ia faaaogā faamau e lē mafai ona tatalaina e tamaiti ma ia faamaualuga filifili po o nisi o faiga e saogalemu lea e puipuia ai le tamaitiiti mai le tatalaina o ia mea po o le taumafai foʻi o le tamaitiiti e faaofiofi i le vā pe a tatala e faasavili le potu.

• Fatatusi: Afai e fiafia le tamaitiiti e aʻeaʻe ma tāupe i mea, ia faamau lelei fata tusi ma isi meafale maualuluga i le puipui o le fale, ina ia taofia ai mai le paʻūū i lalo.

• Palaka eletise ma uaea eletise: O palaka e lē o faaaogāina e tatau ona iai se ituaiga o loka e loka ai. O uaea o molī o le laulau po o mea faapena e tatau ona faamau i le puipui po o le meafale ina ia lē mafai e le tamaitiiti ona toso i lalo le molī ma lavea ai. A lē o lena, ia aveesea na molī. Ia aua lava neʻi tuua le auli uila i luga o le laupapa auli, ma ia aua neʻi faatautauina i lalo le uaea.

• Vaivevela: Afai e mafai ona fetuunaʻi le vevela o lau vaivevela, e tatau ona e tuu i le pe tusa o le 120 tikerī Fahrenheit [e tusa ma le 50 tikerī Celsius] ina ia lē mu ai le tamaitiiti pe a ki e ia le paipa.

• Meataalo: Ia lafoaʻia meataalo e maamaai ona pito po o tulimanu. Ia lafoaʻia meataalo laiti po o meataalo e mafai ona faataʻape i tamaʻi fasi mea laiti, ona e mafai ona laoa ai le tamaitiiti pe a tuu i le gutu. E tatau ona faamau lelei mata ma isu o pea meataalo a le tamaitiiti. Ia aʻoaʻoina tamaiti matutua e aveese a latou tamaʻi meataalo pe afai o loo iai le pepe i le fola o le fale.

• Lole ma meaʻai māmā: Ia aua neʻi tuua lole ma meaʻai māmā e pei o pinati po o lole malō, i se mea e āu atu i ai. E mafai ona mau i le faaʻī o le tamaitiiti.

[Ē Ana le Ata]

Faamatalaga mai: The Office of the Childrenʻs Ombudsman

[Pusa i le itulau 18]

Pe a Tupu se Faalavelave Faafuaseʻi

• Onā: Pe afai ua folo e le tamaitiiti se vai oona, ia fufulu mamā lona gutu i se vai ma faainu ni ipuvai se tasi po o le lua po o le susu foʻi. A uma lena, ia telefoni se fomaʻi po o se ofisa e maua ai faamatalaga pe a inumia mea oona. Pe afai o loo iai se mea faasuavaia e aati i le mata o le tamaitiiti ia tele ni vai e fufulu faavave ai ia lē itiiti mai i le sefulu minute.

• Mu: Mo nai mu laiti, ia tuu iai se vaimālūlū (ia lē mālūlū tele) i le mea o loo mu ia lē itiiti mai i le 20 minute. Afai e telē atu le manuʻa na i lo le alofilima o le tamaitiiti po o le mu foʻi o foliga, se sooga o le tino, po o le vaega pito i lalo o le manava po o totoga sa, e tatau ona ave loa le tamaitiiti i le falemaʻi mo togafitiga o faalavelave faafuaseʻi. O mu e tugā e tatau lava ona togafitia e se fomaʻi.

• Laoa: Pe a mau se mea i le alāea o le tamaitiiti, e matuā tāua tele le taumafai e aveesea vave le mea mai le alāea. O se tasi auala lelei e te ono togafitia ai o le opoina lea o ia mai tua ma tuu ou alofilima e lua i lalo tonu o lona moa ma pei e faafuaseʻi ona oomi agaʻi i luga. Afai e te lē masani i le faiga, ia faafesootaʻi lau fomaʻi ina ia maua ai ni faamatalaga i lenei togafitiga, po o le auai i le polokalame o faalavelave faafuaseʻi i tamaiti po o le aʻoaʻoina o le fesoasoani muamua lea o loo aʻoaʻoina ai lea auala.

[Ē Ana le Ata]

Faamatalaga mai: The Swedish Red Cross

[Ata i le itulau 19]

Faaaogāina o pulou malō tietie uila

[Ata i le itulau 19]

Saogalemu i le nofoa o le taavale