Ia Tausia se Vaaiga Paleni o Mūsika

O LE faatauina atu o mūsika i aso nei o se pisinisi e faitau piliona tālā o loo maua ai. E anoanoaʻi tupe o loo maua e le au faimūsika lauiloa atoa ma ē o loo faaauilumaina i latou. Peitaʻi, ua mautinoa o nisi o ē faimūsika o loo matuā taulau manuia, latou te lē o maua le fiafia, e vave ona maliliu, atoa ma le pule i le ola. Ua matuā faaalia mai ai ma le mautinoa e faapea o nisi mūsika e faaleagaina ai tau amio, tau i faalogona, ma le faaleagaga ma e mafai ona taʻitaʻia atu ai i faiga sauā ma amioga e inosia e le toʻatele.

Peitaʻi, o se mea lelei le iai o se vaaiga paleni i mūsika. A o anoanoaʻi mea sesē ma mea leaga i le itu o mūsika, ae o nisi mūsika e mafai ona faatamaoaigaina ai le olaga o se tasi ma aumaia ai sina olioli ma le loto malie. E mafai ona faagaeetia ai i tatou faaleagaga ma le tulaga tau faalogona. Manatu i nai faaaʻoaʻoga nei.

O salamo e 150 o le Tusi Paia o ni tusitusiga mataʻina—o ni solo e usuina, o pese paia, ma tatalo. O loo faitauina ma le fiafia i le faitau selau o gagana i aso nei. Peitaʻi, o tagata Eperu anamua latou te leʻi na ona faitauina na salamo; sa latou usuina foʻi. E masani lava ona latou faia faapea faatasi ai ma ni meafaifaaili leo mālie—o se auala malosi e fesootaʻi atu ai i le atamai o lo latou Atua, o Ieova, a o faamatala i upu o salamo, faatasi ai ma faalogona ia e mafai ona faaalia e tagata pepese ua aʻoaʻoina lelei, i ē o loo faalogologo. Na i lo le pei o fātuga e matuā faigofie po o  fātuga foʻi faaanamua, e foliga mai sa maualuga le tulaga atoa ma le auala sa faia ai mūsika Eperu na i lo nuu sa siʻomia ai i latou i lena taimi.

Mulimuli ane, sa usuina e Kerisiano i le uluaʻi senituri salamo ma isi pese paia e vivii ai i le Atua ma aumaia ai le mapusaga i faalogona ootia. Sa faatamaoaigaina o latou olaga e mūsika. Ma e ala i lo latou usuina o pese e faavae mai le Tusi Paia, na latou matuā faamautūina i o latou loto le poto e uiga i le Atua, lea sa latou manaʻomia e taʻitaʻia ai o latou olaga.—Mataio 26:30; Galuega 16:25.

Sa talitonu tagata Eleni anamua e faapea e atiina aʻe e mūsika uiga o le tagata ma e faaatoatoaina ai se tamāloa po o se fafine. I le lalolagi i lenei 20 senituri, lea o loo faamamafa ai aʻoaʻoga faasaienisi, le tamaoaiga, ma le tomai e fefulisaʻi ai, e masani ona faagaloina le ati aʻe o le itu tau faalogona e ala i mūsika, tusiāta, ma mea e vaneina.

Ia Tausisia le Paleni

O le faalogologo atu i se mūsika manaia e mafai ona aogā ma maua ai le fiafia. Peitaʻi, e mafai ona sili atu le fiafia o se tasi i le faaaogāina o se mea faimūsika po o le pepese faatasi foʻi ma se vaega o ni uō. O le iai o se tomai tau mūsika e ono tatala ai se avanoa i se fiafiaga tele.

O le mea moni lava ia, i le pei o le tele o isi mea lelei i le olaga, o loo iai se manaʻoga ina ia fai fuafua lelei, ia logolelei ma ia lelei ona filifili pe a oo mai i lenei vaega o faafiafiaga. E fetaui lenei tulaga e lē gata o ituaiga o mūsika e filifili ai ae o le tele foʻi o le taimi e faaalu e faalogologo ai atoa ma le tāina o mūsika.

Afai e amata ona lē lelei aafiaga o se ituaiga mūsika i ou faalogona, o au gaoioiga, atoa ma lau faiā ma isi, e lelei la ona filifili se isi ituaiga mūsika. Ia leoleoina ou taliga ina ia leoleoina ai ou faalogona ina ia leoleoina ai lou mafaufau ma lou loto!

E faapitoa lava le moni o lenei mea i upu o pese. E ono taaʻina ai oe i manaʻo o i latou o ē e lē tutusa o outou manatu i le olaga atoa ma amioga mamā, ae atonu latou te faaauilumaina ituaiga olaga, e lē faaleatua ma lē mamā. I nisi lava tulaga e oo lava i le igoa o se pese e mafai ona faapogaia ai ni ituaiga faalogona sesē.

O loo fautua mai le Afioga a le Atua, le Tusi Paia, ia i latou o ē e mananaʻo e faafiafia ia te ia ina ia “tuuina atu o [latou] tino i le Atua, o le taulaga ola, ma le paia, ma le mālie, o le mea lea e tatau ai ona [latou] faia.” (Roma 12:1) E manino lava, o o tatou faalogona o se vaega o lena “taulaga ola.” O lea la, afai tatou te iloa o taaʻiga a mūsika ua pogai ai ona faaaafia e o tatou lagona ootia a tatou faaiʻuga ma mafaufauga tāua, ma ua taʻitaʻisesēina ai foʻi a tatou gaoioiga, o le taimi loa lena e suia ai mūsika tatou te faalogologo i ai. Manatua: E mafai ona aafia ai lou mafaufau ma lou loto i taaʻiga a mūsika—a lē mo le lelei pe mo le leaga!

[Pusa/Ata i le itulau 10]

Ia Faaleleia le Tomai e Aʻoaʻo Ai

“Ua faaalia i se suʻesuʻega e faapea o le faalogologo pea lava pea i mūsika logomālie e mafai ona faaleleia ai le tomai o se pepe e na te aʻoaʻoina ai mea. Ae i le tele o aiga, e lē taitai faalogologo pepe i na mūsika.”—Audio, Mati 1999.