Kofe e Sili Ona Lelei—Mai le Laau Seʻia Oo Mai i Lau Iputi

TUSIA E LE SUI O LE ALA MAI! I PASILI

E TAʻUA e tagata Finilani o le meainu a lo latou atunuu atoa. Mo le toʻatele o tagata Italia, o lona sauniunia o se sauniga e matuā tapena lelei. I Falani, Siamani, Mekisikō, le Iunaite Setete, ma isi atunuu, o se vaega e sili ona tāua i le mālū o le taeao. E pito atu i le ti, i le avea ma meainu e sili ona fiafia i ai le lalolagi. O le ā lea meainu? Pe tusa o le tasi vae tolu o le faitau aofaʻi o le lalolagi, e tasi lava le tali—o le kofe!

E tusa lava po o ā ou lagona totino i ai, ae lē mafai ona faafitia le lauiloa o le kofe. O le ā e aofia ai i taumafaiga ina ia maua se kofe e sili ona lelei? O fea e ola ai? E faapefea ona gaosia? Pe e iai ea se eseesega tele i ituaiga eseese o kofe? O ā vala e ono aafia ai lona tulaga lelei, lona tofo, atoa ma lona tau?

O Fea e Aumai Ai?

E gaosia le kofe mai ni fatu ua uma ona faavelaina o le laau o le kofe, o se laau e iila lanumeamata ona lau ma e ola i atunuu teropika. Pe a oo ina fuga mai, e lilofia le laau i fugālaau papaʻe mananaia lea latou te puaʻina mai se manogi matagofie. Pe a mavae ni nai aso, ona suia lea o fugālaau i ni taufuifui lanumeamata pei ni vine, ona faasolosolo ai lava lea ona lapopoa ma fesuisuiaʻi ona lanu mai le lanumeamata agaʻi i le enaena faalanu auro ona lanu samasama ai lea pe mūmū pe a oo ina pula lelei.

E ui lava o loo iai pe tusa e 70 ituaiga eseese o le laau o le kofe, mai lava i laau pupuu seʻi oo i laau e taʻi 40 futu [12 mita] le maualuluga, ae na o le lua lava ituaiga, o le Coffea arabica, a faafaigofie o le Arabica, ia ma le Coffea canephora, e lauiloa foʻi o le Robusta, o kofe ia o loo gaosia mai ai le 98 pasene o kofe a le lalolagi. O le kofe aupito sili ona lelei e maua mai le ituaiga o le Arabica, ae maise lava le ituaiga e ola i nofoaga maualuluga. O nei laau e oo atu i le 14 i le 20 futu [4 i le 6 mita] le maualuluga, e ui lava e masani ona faagata ina ia gata mai i le pe a o le 12 futu [4 mita] le maualuluga. O le Robusta, lea e tele lava ina faaaogā mo le kofe lea e vave ona liusuavai, e tele le caffeine e maua ai ma e lē malosi tele lona manogi.

Atinaʻeina o le Kofe Sili Ona Lelei

O le ā e aofia ai i le gaosia o le kofe sili ona lelei? O le matuā tele lava o galuega! E amata  mai lava i le totōina o fatu kofe ua uma ona saunia faapitoa i le fale e faamili ai laau lea ua faatulaga ina ia maua le vevela o le la ma le paolo talafeagai. A maeʻa le ono masina, ona tasii loa lea o tamaʻi laau i le fanua, i le palapala ua uma ona saunia o loo iai le fetalaisa ma minerale. E faalaina lelei le totōina o tamaʻi laau o le kofe e fua i le itu o loo agaʻi ai le malifa. E faavāvā auā le tupu aʻe atoa ma le teuina o laau ma le palapala ma ia faigofie foʻi ona tau pe a oo ina pula.

Ina ia fua tele mai, e ao lava ona vaavaai faalelei laau i le tausaga atoa. E aofia ai le veleina o vao ia latou te faaaogāina mea faalelei eleele atoa ma le fanaina e lē aunoa i vailaau e tapē ai iniseti faalafuā ma faamaʻi, e pei o le borer ma le coffee rust.

Pe tusa ma le lua tausaga ona amata loa lea ona fua mai se laau ua totō. A oo mai le taimi e tau ai, e faaopoopoina le tele o galuega. O le faiga lelei lava o le tau lima lea taʻitasi o fua ua pula, e pei ona faia ai i atunuu e pei o Kolomepia ma Costa Rica.

O fua e tau mai i le faiga lea e masani lava ona faagasolo e faaaogā ai le faiga e taʻua o le faapala. O le faiga lenei e tuu ai fua i se masini lea na te aveeseina toetoe lava o aano uma mai fatu. Ona tuu lea o fatu i totonu o ni tane i le umi pe tasi i le tolu aso, o le sua vavale lea e maua i le taimi lea o le a na faapalaina ni aano o totoe e ala i le faafefeteina. Ona fufulu loa lea o fatu ina ia ave ese uma ai so o se aano o loo iai. O nisi e faamamago e ala i le faalā i luga o ni fola simā po o ni laulau e faamamago ai, ae o nisi e faamamago i ni masini o loo feula mai ai le ea vevela. O paʻu mamago o loo ufiufi ai le fatu, o le paʻu māfiafia ma le paʻu mānifinifi faalanu siliva, e faaaogā ai masini e aveesea ai. O le faapalaina lea e fefete ai, faatasi ai ma le faaaogāina na o fatu ua pula lelei, e maua mai ai le kofe sili ona lelei.

I Pasili, lea o loo pito sili ona tele le kofe o loo saunia mai ai i le lalolagi, e faaaogā ai e le toʻatele o tagata fai togā kofe le faiga e taʻu o le derriça, pe a oo i le taimi e tau ai. E tauina i lima ma e ave ese uma lava fua mai se lālā i le taimi lava e tasi, e tusa lava po o le ā le ituaiga pula ua iai. Talu ai nei lava, ua faaaogāina ai e nisi faifaatoʻaga nisi faiga tau masini po o masini ma lima mo le tauina o le kofe ina ia faaleleia ai le gaosia ma le tulaga o le kofe. O le tasi faiga e faaaogā ai se masini e alu i le ea e fai lona lima e iai  “tamatamaʻi lima” i le faatausiʻusiʻuga e lūlūina le lālā, ona toʻulu lea i lalo na o fua ua pula.

E ao mai faatasi fua ia ua toʻulu ma vaimamā, e fai i lima po o se masini, ina ia ave ese ai lau, le palapala, ma fasi laau. Ona tuuina lea o fua i totonu o ni ato e taʻi 15 kalone [60 lita] le tetelē. O fua ua uma ona vaimamā e fufulu ia mamā, i se tanoa simā ia po o se masini ua fai fuafua mo lea fuafuaga. O le fufuluina lea e tuu eseese ai fua ua pula mai fua ua amata ona pala.

A uma ona faamamā, ona fola lea o kofe i luga o se simā tele ina ia faamago ai i le la i le va o le 15 ma le 20 aso. I le taimi lea e tatau ona feliuliuaʻi fatu kofe pe ā o le taʻi 20 minute ma liliu, ina ia faamautinoa ua mamago lelei. E faaaogā masini i nisi taimi e faamamago ai ina faavave ai. E manaʻomia ona vaavaai faalelei le susū talafeagai o le kofe ina ia aua neʻi ova le mago, lea e māfua ai ona nuti ma gaugau gofie fatu kofe, ma faaitiitia ai lona tau. O le taimi lava e maua ai le susū talafeagai i le va o le 11 ma le 12 pasene, ona faaaogā loa lea o le masini e āuāu ese ai le fatu mai le paʻu. Ona tuu loa lea o fatu i totonu o taga e taʻi 130 pauna [60 kilokalama] le mamafa. O le taimi lea e masani lava ona avatu ai loa le kofe i kamupani e faavasega ma sauniunia atili ai.

Faavasegaina

I le nofoaga o le sosaiete a tagata faifaatoʻaga, e auauaʻi taʻitasi ona laʻu ese mai i loli taga kofe. A o leʻi teuina a latou uta i le mea e teu ai, e faasolo mai le aufaigaluega i se tagata o lē na te tuiina se meafaigaluega umi, i totonu o taga taʻitasi ma aumai ai i fafo sina vaega itiiti o kofe o loo i totonu e siaki ai le tulaga o iai. O vaega ia e aumai i fafo mai i taga uma o le uta lea e tasi e tuufaatasi i se mea e tasi, lea o le a faailoga lelei ma faavasega.

Afai loa ua uma ona ave ese mai vaega itiiti ia e siaki ai le tulaga o iai le kofe o loo i totonu o taga, ona tuufaatasi loa lea o kofe mai uta a loli eseese ma toe faagasolo foʻi le isi faasologa ina ia faaleleia atili. E faaalu muamua i se masini ina ia ave ese ai so o se mea lava e ono faaleagaina ai, ona toe faaalu foʻi lea i le isi masini e faamamā ai ina ia tuueseesea fatu e tusa o lo latou lapopoa, ona tuu lea i se laulau e feliuliuaʻi ina ia tuu eseese ai e tusa o lo latou mamafa. A uma lena, ona tuu lea i se masini e tuu eseese ai, lea o le a aveeseina so o se fatu uliuli lava pe lanumeamata foʻi lea e ono faaleagaina ai le tofo pe a fai le kofe. O isi fatu uma e totoe mai ai e faaalu atu i se mea e faaputu ai, ma mulimuli ane, sasaa i ni taga. O taga ua iai fatu e tutusa le lapopoa ma lelei ua sauni nei e faatau atu ia i latou o ē faatauina atu i fafo, po o i latou foʻi e faatauina i le vaipanoa lava lena.

E faapefea ona faaaogā nisi o fatu ia na ave ese muamua mai taga ina ia suʻesuʻeina? E faavasega ina ia iloa ai le tau e avatu i faifaatoʻaga taʻitoʻatasi  mo lana kofe. Muamua, e faavasega i ituaiga, lea e fuafua i le aofaʻi o mea leaga e maua i le taʻi sefulu aunese [300 kalama] mai fatu ia na suʻesuʻeina. O mea leaga e aofia ai fatu uliuli, lanumeamata, po o fatu pāpā ma ni otaota, e pei o paʻu, fasi laau, ma fasi maamaa. Ona sosoo ai lea ma le faaalu o fatu i se mea e vaimamā ai ma tuu eseese ai e tusa o le lapopoa.

O le mea mulimuli lava o le tofoina o le tofo. O fatu ia na ave ese mai e suʻesuʻeina e faapaʻu ma le faaeteete ona olo lea, ona tuu lea o sina vaega i ni ipu malamalama. Ona avatu lea i ai ma le vaivevela, ona saʻeu lea o le kofe o loo i totonu, ona sau lea o se tasi ua iai le poto masani i le tofoina na te sogisogi i le manogi o kofe taʻitasi ia o loo suʻesuʻeina. Pe a uma ona faatali seʻi maalili le kofe ma seʻi toʻa lelei le penu kofe, na te faaaogāina se tamaʻi sipuni ʻau umī e asu mai ai se mea e tofo ai, lea na te tuuina i lona gutu ma toe vave ona ia luai mai i fafo, e vave ona ia faasolosolo atu i le isi ipu malamalama, ma faaauau le faiga lava lea e tasi. A maeʻa ona ia tofoina kofe ia o loo suʻesuʻeina, ona ia faavasegaina lea o kofe mai lava i le manaia (lelei, fologofie, toetoe lava a suamalie) i le matuā oona (fologata ma ese lava lona manogi).

E tatau lava i le tagata lea e tofoina ona matuā lelei lana tofo ma ia lava lona atamai ma le poto masani ina ia saʻo ona ia faavasega ia vaega eseese e tele ma tofo lelei o kofe. E lē gata e faalagolago i ai le tau o le kofe, e tāua foʻi le tofo mo le laasaga lea o le a sosoo ai e aofia ai i le saunia o le kofe lelei.

Tuufaatasia ma le Faavelaina

O le tuufaatasia, lea e masani lava ona fai e faaaogā ai fatu mata, o se tomai faapitoa i le tuufaatasia o fatu kofe ua fetaui lelei ina ia faamatagofie ai le tofo, le manogi, le tulaga, ma le foliga mai o le kofe. O le luʻitau o i latou e tuufaatasia o le faatumauina lea o le maua mai o se kofe lelei ua maoaʻe le lelei i lo isi.

O le isi laasaga e sosoo ai, o le faavelaina, e faaeteetegatā foʻi i le mauaina o se kofe pito lelei. A o faagasolo le tulaga lenei, e iai ni suiga o mea e tupu i totonu o fatu kofe, lea e maua ai le manogi o le kofe. E mafai ona aua le soona faavelaina, ia pe faaleogalua, po o le faauliuli foʻi, e faalagolago i le tofo o loo manaʻomia ma le auala foʻi o loo saunia ai. Peitaʻi, o le soona faavela naʻuā e māfua ai ona pei ua iila foliga o fatu kofe, o le māfuaaga ona ua alu ese le suāuu lea e maua ai le manogi. O le māfuaaga lena e oona ai le kofe ma faalētele ai se manogi.

E tāua foʻi le oloina lelei mo le mauaina o se kofe sili ona lelei. E fua le tulaga o le kofe ua olo i le auala o le a saunia ai le kofe. Mo se faaaʻoaʻoga, o le kofe e lē matuā faamalūina lelei e faaaogā mo kofe e vaimamā i se fasi ie po o se pepa, a o le kofe e matuā malū lava le oloina e faaaogā mo le kofe mai Take, lea e lē faamamāina.

A uma loa ona olo, ona utu loa lea i taga ma auina ese atu. O kofe e teu i pepa iila e lelei pe ā mo le 60 aso, a o kofe e matuā malū lelei e leai se ea e sao i ai e oo atu i le tausaga o lelei. O le taimi lava e tatala ai, e ao lava ona teu le kofe i se mea e malu lelei lona tapuni, ma e sili ona lelei pe a tuu i le pusa aisa.

Le Sauniaina o le ‘Ipu Kofe Sili Ona Lelei’

Ina ua maeʻa galuega uma e pei o le totōina, le atinaʻeina, le tauina, le sauniunia, le faavasegaina, le tuufaatasia, le faavelaina, ma le oloina, ona tatou oo mai loa lea i le vaega o loo e faatali i ai—le sauniaina o le ‘ipu kofe sili ona lelei’! E tele ituaiga faiga eseese e gaosi ai, e pei o le faa-Take, le automatic drip, ma le moka faa-Italia, ua na o ni nai vaega na ua taʻu atu—ma e tofu lava foʻi ma auala eseese e sauniunia ai. Peitaʻi, i le tulaga masani, e fautuaina lou faaaogā o le va o le ono i le valu sipuni kofe i le kuata [lita] vai e tasi. Sauniuni tau lava o le tele lea e te fuafua e faaaogā i le taimi lava lea. Aua lava neʻi faaaogāina faalua ia penu kofe, ma ia fufulu i taimi uma i vai ia le tipoti, le faamamā, ma isi mea sa faaaogā i le faiga o le kofe i le taimi lava e uma ai ona faaaogā.

O le isi taimi e te nofo ai i lalo e tofo le lelei ma le manogi o lau kofe e te fiafia i ai, pe o se cafezinho faa-Pasili, le tinto faa-Kolomepia, le espresso faa-Italia, ia po o lau lava kofe e te fiafia i ai, aiseā e te lē mālōlō lelei ai ma mafaufau i galuega mamafa uma sa faaalu ina ia saunia mai ai lena kofe sili ona lelei—mai le laau seʻia oo mai i lau iputi.

[Ata i le itulau 20]

I le fale e faamili ai laau, e maua e tamaʻi laau le vevela talafeagai o le la ma le paolo

[Ata i le itulau 20]

O togā kofe ua matutua

[Ata i le itulau 21]

E tauina fua o le kofe e ala i le ave ese mai i lālā

[Ata i le itulau 21]

O tagata e tauina le kofe i Pasili o loo vaimamā fua o le kofe i lima ina ia ave ese lau ma otaota

[Ata i le itulau 22]

E faavasegaina fatu ua suʻesuʻeina e ala i le faitauina o mea leaga i le taʻi sefulu aunese [300 kalama] o fatu kofe

[Ata i le itulau 22]

E tatau i le tagata na te tofoina ona lava sona poto masani