Le Manatu o le Tusi Paia

Le Auala e Filifilia ai se Paaga Faaipoipo

NA FESILIGIA SE FAFINE E LEʻI FAAIPOIPO, “PO O E MAFAUFAU E FAAIPOIPO?” “MAFAUFAU?” O LANA TALI VAVE MAI LEA. “OU TE POPOLE.”

O LE faamatalaga puupuu a lenei fafine ua faamatala lelei mai ai le matuā tele o le naunau o nisi tagata i le alofa ma le mauaina o se faauōga. E toʻatele ua latou faavasegaina le mauaina o se paaga faaipoipo o se tasi o mea e aupito sili ona tāua i le olaga. O lea, i le lalolagi aoao, ua pei o se tai fānaʻe le anoanoaʻi o sauniuniga ua fuafuaina e fesoasoani i tagata ia maua se paaga faaipoipo. E ui i lea, i le tele o vaega o le lalolagi, o le aofaʻiga o faaipoipoga lē taulau ua tele atu na i lo faaipoipoga o loo taulau manuia.

I atunuu i Sisifo, o se mea masani le filifilia e tagata o a latou lava paaga faaipoipo. Peitaʻi i nisi vaega o Asia ma Aferika, o loo fai pea ma tu masani le sailia e isi o paaga faaipoipo mo isi. E tusa lava po o le ā le tulaga, ae lē tatau lava ona manatu māmā i le sailia o se paaga. E iai lava nai isi faaiʻuga e faia e le tagata i le olaga e telē se avanoa e ono iʻu ai a lē i le fiafia po o le faanoanoa. O se faaipoipoga e iai le alofa e mafai ona avea ma mea e sili ona faatamaoaiga ma faataulauina ai. Ae i le isi itu, o se mafutaga e femisaʻi e mafai ona avea ma puna faifai pea o tigā ma mafatiaga.—Faataoto 21:19; 26:21.

I le pei lava o isi, e mananaʻo Kerisiano moni i a latou mafutaga faalefaaipoipoga ina ia aumaia ai le olioli ma le faamalieina. Ae latou te faanaunau foʻi ina ia faafiafiaina le Atua ma āva ia te ia. (Kolose 3:23) I le avea ma Lē na Foafoaina Mea ma Lē na Amataina faaipoipoga, e matuā silafia lelei e le Atua o tatou manaʻoga moni ma le mea e sili ona lelei mo i tatou. (Kenese 2:22-24; Isaia 48:17-19) E lē gata i lena, ua ia molimauina le miliona ma miliona o faaipoipoga, e lelei ma leaga, i le tele o meleniuma talu ona iai le tagata. Na te silafia le mea e manuia ai ma le mea e lē manuia ai. (Salamo 32:8) E ala mai i lana Afioga, le Tusi Paia, ua ia faatulaga ai ma le manino, mataupu silisili maʻoti e mafai ona fesoasoani i so o se Kerisiano ina ia faia ni filifiliga e faavae aʻe i le atamai. O ā nisi o nei mataupu silisili?

Vaai i Tua Atu o Foliga Mai i Fafo

I vaipanoa e filifili ai lava e le tagata ia lē o le a la faaipoipo, latou te ono feiloaʻi ai ma se tasi e ono fetaui ma talafeagai ona avea ma paaga pe na faailoa ane e ni uō po o ni aiga. O le mea masani, e muamua lava ona oso aʻe le naunau fetosinaaʻi ona o faatosinaga mai fafo. E ui lava o le mea moni o se uunaʻiga masani lenei ma malosi, ae ua faalaeiʻauina i tatou e le Tusi Paia ina ia tuutuu atu i le loloto le vaai na i lo le na o foliga mai i fafo pe a mafaufau e faaipoipo.

“O le matagofie e pepelo lea, o le mea faatauvaa le lalelei; a o le fafine ua mataʻu ia Ieova, e viia lava o ia,” ua fai mai ai le Faataoto 31:30. Na tautala le aposetolo o Peteru e faatatau “i le mea e le pala, o le loto  agamalu ma le filemu, o le mea tau tele lea i luma o le Atua.” (1 Peteru 3:4) Ioe, o uiga faaleagaga o lē o fuafua e avea ma au paaga—le tuutōina o lena tagata i le Atua ma lona alofa i le Atua faatasi ai ma ona uiga faa-Kerisiano—e matuā sili atu ona tāua na i lo le aulelei o foliga mai i fafo. E matuā tāua le faaalu o le taimi e faia ai se filifiliga e faavae i le malamalamaga, i le filifilia o se tasi e tutusa o oulua sini faaleagaga ma o lē o loo tauivi e faaalia fua o le agaga o le Atua. O le a matuā saosaolaumea atu lena mea i se mafutaga o se faaipoipoga fiafia.—Faataoto 19:2; Kalatia 5:22, 23.

‘Faaipoipo Tau Lava o Lē ua i le Alii’

O le tutusa o sini masani ma talitonuga ma le tagata ua e manaʻo e te faaipoipo i ai e tāua tele. O le faaipoipoga o se matuā luʻi lava, e manaʻomia ai le tele o fetuutuunaʻiga i amio ma uiga o tagata uma e toʻalua. I se tulaga talafeagai, o le tele o mea na muamua lua tutusa ai ma lē o fuafua e avea ma au paaga, o le faigofie foʻi lena ona fai o na fetuutuunaʻiga.

Ua fesoasoani lenei mea ia i tatou e iloa ai le māfuaaga na timaʻi mai ai le aposetolo o Paulo i Kerisiano ina ia ʻalofia le “amo faalegatasi ma e le faatuatua.” (2 Korinito 6:14, LF) Na iloa e Paulo o le faaipoipo atu i se tasi e lē tutusa faatuatuaga ma le malamalamaga i mataupu silisili o le Tusi Paia e mafai ona mapuna aʻe ai ni feteenaʻiga ma ni feeseeseaʻiga. E fetaui tele le apoapoaʻiga ina ia ‘faaipoipo tau lava o lē ua i le Alii.’ (1 Korinito 7:39) E atagia mai ai le finagalo o le Atua. O i latou e mulimuli ai ma le atamai latou te ʻalofia le tele o faalavelave ma faafitauli matuiā.—Faataoto 2:1, 9.

Faaipoipoga e Filifili Mai e Isi

Ae faapefea vaipanoa o loo avea ai faaipoipoga e filifili mai e isi ma a latou aganuu? Mo se faaaʻoaʻoga, i le itu i saute o Initia, ua taumate mai e isi faapea o le 80 pasene o faaipoipoga uma iinā sa filifilia e mātua. E tusa lava pe mulimuli mātua Kerisiano pe leai foʻi i lenei aganuu, ae o le mataupu e faia i ai le faaiʻuga a le tagata lava ia. Po o le ā lava le tulaga e iai, o faaipoipoga faapena e filifilia e isi, o le a taulau manuia pe afai e pulea e māfuaaga tāua faaleagaga.

E lagona e i latou e fiafia i faaipoipoga e filifili mai e isi faapea o le faia faapea ua tuu atu ai le matāfaioi o le faia o le faaiʻuga ia i latou ua lava le poto masani ma ua faatagata matutua. Ua faapea mai se tasi toeaina Kerisiano i Aferika: “Ua lagona e nisi mātua faapea ona o tausaga ua oo i ai a latou fanau ma le leai o se poto masani, e lē mafai la ona faalagolago atu i ai latou te faia se faaiʻuga saʻo i le matua faaleagaga o lē o fuafua e avea ma a latou paaga.” Ua faaopoopo mai se ovasia femalagaaʻi mai Initia faapea: “O ē laiti e leai so latou poto masani i le olaga ma latou te ono faia faaiʻuga e tusa o ō latou faalogona.” Talu ai e sili atu ona malamalama lelei mātua i le ituaiga tagata e iai a latou fanau na i lo se isi lava, latou te lagona ai faapea ua talafeagai lelei lo latou tulaga e filifili ai ma le atamai mo a latou fanau. E atamai foʻi lo latou tilofaʻia o le vaaiga a le tama ma le teine talavou.

Peitaʻi, afai e lē amanaʻia e mātua mataupu silisili faale-Tusi Paia, e ono iʻu ai i lo la toe selesele mai o mafatiaga pe afai e mulimuli ane fesagaʻi le faaipoipoga ma faafitauli. Talu ai, e seāseā maua se avanoa e muaʻi faamasani lelei ai ē ua fuafua e faaipoipo, e ono iʻu la i ni faafitauli. Ma afai e tulaʻi mai se tulaga faapena, ua faapea mai se tamā Kerisiano i Initia, “o le tulaga masani lava, e lafo atu le tuuaʻiga i mātua.”

Mo mātua Kerisiano o loo la filifilia se paaga faaipoipo mo so la alo, e ao foʻi ona tilofaʻia le uunaʻiga ua faia ai faapea. Pe afai e pulea e ni sini matapeʻapeʻa po o se faanaunauga o le fia mamalu le filifilia o se paaga faaipoipo, o le a aliaʻe la ni faafitauli. (1 Timoteo 6:9) O lea la, o i latou o loo filifilia se paaga faaipoipo mo isi e tatau ona latou fesili ifo ia i latou lava, ‘Pe o lenei filifiliga ua faia ina ia faamautūina ai le fiafia ma le lelei faaleagaga o i laʻua uma? Pe o le mea ea ina ia faamamaluina atili ai le tulaga o le aiga po o le tamaoaiga pe ina ia maua mai ai ni faamanuiaga tau tupe?’—Faataoto 20:21.

E manino ma aogā le fautuaga a le Tusi Paia. Pe a mafaufau mo se paaga faaipoipo, o le mamā tau amio ma le faaleagaga o lē o fuafua e avea ma au paaga e tatau lava ona sili atu lou manatu mamafa i ai, e tusa lava po o le ā le auala e faia ai le filifiliga. Pe a faia faapea, ona faamamaluina ai lea o Ieova le Atua, o Lē na Amataina le faatulagaga faalefaaipoipoga, ma o i laʻua ua faaipoipoina o le a amata i se faavae mausalī faaleagaga. (Mataio 7:24, 25) O le a saosaolaumea atu lena mea i se mafutaga fiafia ma le faaʻoaina.