Pata Pinati i le Faiga Faa-Aferika

TUSIA E LE SUI O LE ALA MAI! I LE CENTRAL AFRICAN REPUBLIC

I ATUNUU i Sisifo e masani lava ona manatu i le pata pinati ua na o sina mea e faapata ai le fasi falaoa. Peitaʻi, i nisi o atunuu o Aferika, o loo iai moni lava se vaega e sili atu ona tāua o loo faia e le pata pinati i le olaga i aso faisoo. E faapefea?

I Aferika tutotonu, o le tele o meaʻai masani o loo sauniunia faatasi ma le pata pinati. O iinei, e pei lava o isi oganuu tau atiaʻe, e faigatā lava ona maua le falaoamata ma le masoā—o mea e faaaogā e faatotoo ai sitiū ma sosi. O lea la ua masani ona faaaogāina le pata pinati e sui ai.

Peitaʻi, e lē na o le tau ina faatau mai o se fagu pata pinati i se faleoloa o latalata ane. O iinā i le faleoloa e faatau ai le pata pinati e fua i le sipunitī, ma e fai lava si taugatā. O lea la, o le toʻatele lava o fafine Aferika e sili atu ia i latou ona fai a latou lava pata pinati. O le auala o loo faataunuuina ai lenei galuega fitā e matuā mataʻina tele. O faamatalaga o loo mulimuli mai na aoaoina mai i le talanoa atu i ni fafine Aferika.

Le Galueaʻiina o le Pinati

O le mea moni, o pinati e lē o ni laau e faigatā ona tausia. O le vaega pito i sili ona faigatā o le sauniunia lea o le eleele. E faia lenei gaoioiga i le amataga o le tau timuga a o mago pea ma malō le eleele. Ia Aperila e totōina ai fatu pinati e faaaogā ai lima, ae afai e vave ona oo mai timuga, e  mafai ona seleseleina “pinati” i le faaiʻuga o Aokuso po o le amataga o Setema.

O le mea moni lava o le pinati e lē o se lama ae o le fatu e pei o se pī e fai ai meaʻai—o se ituaiga o laau e tutusa ma le pī. O pinati e lē mauaina mai i laau maualuluga, atonu e pei ona e manatu ai; na i lo lena, e ola i pupulaau maualalalo, lea e matuā ese ai lava le auala o loo fuaina mai ai ona fua i lalo o le eleele. O pinati la ua masani ona taʻua o fatulaau o le eleele po o fatulaau o le palapala.

I Aferika tutotonu o le telē o le eleele mo le totōina o pinati e pe tusa o le 300 i le 150 futu [90 i le 50 mita]. O nisi o tagata ua latou totōina pinati i se tamaʻi fasi fanua e latalata ane i ō latou fale. E masani lava ona faaaogā se tamaʻi lato ma se sapelu e galueaʻiina ai le fanua. E mafai ona aofia ai taumafaiga mamafa! E manaʻomia e le faatoʻaga se tausiga tele, ae maise lava i le amataga. E manaʻomia ona leoleoina le fanua ina ia lē elia e ni isumu fatu ma aai ai. Ma e manaʻomia ona faamaveve le palapala ma ia faamamā le vao.

E manaʻomia faapitoa lava ona vaavaaia lelei le fanua pe a latalata le taimi e selesele ai. E mafai ona faaaogā tamaiti e leoleoina a o latalata le taimi e selesele ai. Na lipotia mai e se tasi o fafine faapea na mauaina e lona tuaoi ana pinati i luga o laau maualuluga. Na aveina i ai e manukī i luga iinā ma olioli ai i se faigaʻai i mea na alu ai lona malosi!

O le seleselega e masani lava ona avea ma galuega a le aiga lava latou. E ō atu tagata uma o le aiga i le fanua e fesoasoani. E seʻi i luga laau ona tuu lea e faamamago, ona aveese mai lea o iʻo o pinati mai le laau ma aumaia i le nuu i ni apa lapotopoto lapopoa, ia e tauaveina i luga o ulu o le ʻau selesele.

O le ā la o le a faia nei i pinati? A uma ona fufulu, ona sakaina lea i se vai faamasima. O nisi o pinati e ʻaia loa lava e le aiga, ae o le tele lava e tuu e faaaogā mulimuli ane i le faia o kuka. E folafola pinati i luga o le eleele i tala ane o le fale ina ia faamamago lelei ai. E tatau lava ona vaavaaia lelei e se tasi pinati ina ia puipuia ai mai i ʻoti tataa solo e mananaʻo e ʻaia pinati.

Pe a mamago pinati, ona teuina lea i se fale e ato i falalauvao ma tanu i palapala ma e faauumi i luga ona pou. O le auala lea e tumau ai pea ona mamago pinati, ma puipuia ai foʻi mai isumu faapea foʻi ma tamaiti o loo vaavaai mo se meaʻai a o alu Tinā e galue i le togālaau.

Mai Pinati i le Pata Pinati

E tatau ona aveese paʻu a o leʻi faia ia maua ai le pata pinati. Ona faapaʻu lea, e masani lava i totonu o se falai lautelē māfolafola, i luga o se afi e lē soona faaaʻasaina e tafu i fafie e faia i luga o le eleele. E mauaina ai lona tofo moni o se pinati i le auala lena ma faigofie ai ona āuāuese paʻu. Ona faamaalili lea o pinati, ona mili ese lea o paʻu. Ona faaaogā lea o le masini e olo ai pinati ia ua uma ona faapaʻu, seʻia oo ina usi lelei. Afai e leai se masini e maua, ona fola lea e se fafine o pinati i luga o se maa telē māfolafola ma olo ai i se fagu po o se maa lapotopoto.

O le a lē pine ona faaaogā loa lea o le pata pinati e fai ma mea e faatotoo ai sosi, e masani lava o se meaʻai e fai i totonu o se ulo ma ʻai faatasi ma manioka, faʻi Samoa po o le araisa. Afai e te taumānatu pe faapefea le tofo o se meaʻai e fai i le pata pinati, aiseā la e lē faia ai loa?

E mafai ona e mulimuli i se fua e masani ai ma sauniuni se sitiū povi, aniani, aniani saina, ma se sua totoo o tamato (tomato paste). Ia kukaina seʻia oo ina malū le fasipovi, ona lafo lea i ai o laupele ua uma ona tipitipi pe a manaʻomia. A o kukaina na mea, sui i sina vai le pata pinati ina ia fai ai se ʻalu—pe tusa o le tasi le ipu pata pinati mo pauna povi e lua [pe tusa ma le tolu tesilita mo le kilokalama povi]—ona saʻeu lea i totonu o le sitiū. Ia kuka mo le sefulu minute po o le sili atu foʻi a o matuā faaaʻasa le afi ina ia lē malosi tele ai le tofo o le pata pinati. Afai e lē o totoo lelei i le tulaga e te manaʻo ai, toe faaopoopo i ai sina pata pinati. Faamasima e tusa ai ma lau tofo. Afai e te manaʻo e faafeū, e mafai ona e faaopoopo i ai sina pepa feū.

O le toʻatele e latou te iloa le manaia tele o lea ituaiga o meaʻai e ʻai faatasi ma le araisa! Ma e ui lava atonu o le a lē tutusa lelei le auala e te faia ai lena meaʻai mai le auala e fai ai e tagata Aferika, ae o le a e maua ai sina tomai i le faaaogāina o le pata pinati!

[Ata i le itulau 26]

E seleseleina pinati, ona auina atu lea i le fale ina ia āuāuese paʻu ma oloina ai