‘E Matuā Maua le Faafouina Mai ia i Latou!’

TALU ai nei lava na asiasi ane ai i le ofisa o le lālā o Molimau a Ieova i Ebina le pule sili o se faletalimalo e tū latalata ane i se tasi o malae vaalele faava-o-malo i Iapani. Na foliga mai sa matuā fiafia lava o ia. Aiseā?

I le tausaga e 1998, e silia ma le 200 Molimau na nonofo i le faletalimalo e pule ai lenei tagata a o latou faimalaga atu ma toe taliu mai i tauaofiaga faava-o-atunuu i Aferika, Amerika i Mātū, Ausetalia, ma Korea. Ina ua tauaofia le ʻaufaigaluega mo le auaunaga a le faletalimalo e toe tilofaʻia galuega o le tausaga ua tuanaʻi, na latou taʻua ai faapea mai malo faaletausaga e 30,000 a le faletalimalo, o nei sui usufono sa avea ma ē pito sili ona faagaeetia ai.

O lea la, na malaga atu ai le pule o le faletalimalo i Ebina e faailoa atu lo latou talisapaia. Na ia faapea mai, ‘E ese ma le faaaloalo o nei malo ma latou te tuʻua o latou potu i se tulaga mamā ma teu lelei. E masani lava ona latou faailoa mai lo latou talisapaia. E lē gata i lena, latou te saunia upu faalāʻeiʻau mai le Tusi Paia. E matuā maua le faafouina mai ia i latou!’

Na faaauau faapea le tala a le pule: ‘O le tele o malo e matou te vaʻaia le lē mautonu. O lea sa matou sāʻilia ai ni faamatalaga e aogā mo i latou. Matou te mananaʻo ia latou maua aogā mai aʻoaʻoga a le Tusi Paia auā e uunaʻia ai se aafiaga lelei i olaga o tagata.

O le iʻuga, na talosagaina e le pule ni kopi se 80 o lōmiga eseese a Molimau a Ieova ina ia mafai ona ia tuuina i potu o le faletalimalo. E aofia ai i lōmiga na ia talosagaina le tusi e 192 ona itūlau o Le Ala e Maua ai le Fiafia i le Aiga. Afai e te finagalo i se kopi, faamolemole faatumu le kuponi o loo i lalo ma lafo atu i le tuatusi o loo faaalia atu i le kuponi po o se tuatusi talafeagai o loo i le itūlau e 5 o lenei mekasini.

□ Auina mai mo aʻu le tusi o Le Ala e Maua ai le Fiafia i le Aiga.

□ Faamolemole faafesootaʻi mai aʻu ona o loo oʻu manaʻomia se suʻesuʻega faale-Tusi Paia e aunoa ma se totogi.