Fesagaʻi Tinā ua Aafia i le AIDS ma se Faafitauli Faigatā

O CYNTHIA, * o se fafine e nofo i le West Indies, sa fesagaʻi o ia ma se filifiliga pe faasusu ia te ia lana pepe faatoʻā fanau mai, pe faasusu fagu. Atonu e foliga mai o se filifiliga faigofie. Ae maise ai, ua faitau fiasefulu tausaga o fautuaina mai pea e tagata popoto faapitoa i matāʻupu tau soifua mālōlōina le avea o le suāsusu o le tinā ma “meaʻai e silisili ona lelei mo le mālōlōina” o pepe. E lē gata i lea, o pepe e faasusu fagu i atunuu matitiva e tusa ma le 15 taimi e ono mafai ai ona feoti mai faamaʻi o le manava tatā, na i lo pepe o loo faasusu i o latou tinā. O le mea moni, ua lipotia mai e le United Nations Children’s Fund (UNICEF) le tusa ma le 4,000 tamaiti o loo feoti i aso taʻitasi ona o lamatiaga e fesootaʻi atu i isi mea ia e faaaogā e suia ai le faasusu o tamaiti i o latou tinā.

Ae peitaʻi, i le tulaga o Cynthia, o le filifiliga i le pe faasusu ia te ia lana tama sa telē lava se isi lamatiaga na aofia ai. Na pisia o ia mai i lana tane i le siama (HIV) lea e māfua mai ai le AIDS. Ina ua fanau mai lana pepe, na iloa ai e Cynthia, o se tamaitiiti ua aafia lona tinā i le siama o le AIDS e tusa ma le 1 i le 7 le tele o avanoa e ono aafia ai i lea lava siama pe a fafaga i le suāsusu o lona tinā. * O lea, sa tatau ai ona ia faia se filifiliga faigatā: pe faasusu pea lana pepe ia te ia ma ono oo ai i ni lamatiaga i le mauaina o le AIDS, po o le tuu atu i lamatiaga o le faasusu fagu.

I vaipanoa o le lalolagi lea o loo matuā mālosi ai le pipisi o le AIDS, e tusa ma le 2 pe 3 fafine totō mai le toʻa 10 o i latou ua aafia i le siama o le HIV. I se tasi atunuu, e silia ma le ʻafa o fafine totō uma na faia i ai suʻesuʻega ma iloa ua aafia. Ua lipotia mai e le leitiō faasalalau a Malo Aufaatasi e faapea: “O nei fuainumera e tupu ai le popole ua matuā uunaʻia faavavevave ai saienitisi e sāʻili mo se vaifofō.” I le tali atu i lenei faamataʻu, ua tuufaatasia ai e ni faalapotopotoga se ono a Malo Aufaatasi o latou tomai, o taumafaiga, ma a latou alāmanuia ina ia latou faatūina se polokalame tuufaatasi ua taʻua o le Joint United Nations Programme on HIV/AIDS, lea e lauiloa i le taʻu UNAIDS. * Peitaʻi o le mea ua iloa e le UNAIDS e faapea, o le vaifofō mo le faafitauli faigatā o le AIDS e lē faigofie.

Toʻatugā Lavelave ua Lē Maua ai se Vaifofō Faigofie

E tusa ai o se manatu o Edith White, o se tagata e suʻesuʻe faapitoa i le tulaga o le faasusuina o pepe i o latou tinā ma le pipisi atu o le HIV mai le tinā i le tamaitiiti, fai mai a ia, o loo fautuaina e tagata o loo galulue i le soifua mālōlōina fafine o loo nonofo i atunuu tamaoaiga o ē ua aafia i le HIV ina ia ʻaua neʻi faasusuina a latou pepe ia i latou, talu ai  o lenei faiga ua toetoe lava faaluaina ai le lamatiaga o le ono aafia o le pepe. O le faaaogāina o le susu palu mo le pepe e foliga mai o se filifiliga talafeagai e sui aʻi le suāsusu o le tinā. Peitaʻi i atunuu tau atiaʻe—lea e vave ai lava ona suia manatu faaāta e mea moni mataʻutia e tutupu—ua faigatā ai lava ona faatinoina lenei vaifofō faigofie.

O se tasi o toʻatugā e fesootaʻi atu lea i le tulaga lautele o le soifuaga. I atunuu o loo avea ma masani le faasusu o tamaiti i o latou tinā, o le a manatu ai i fafine ia e faasusu fagu a latou pepe faapea o lea ua latou faalauiloa atu lo latou aafia i le HIV. E ono fefe ai se fafine faapea o le a tuuaʻia o ia, o le a tuulafoaʻia, pe oo lava foʻi ina fasi pe a oo ina lauiloa atu lona tulaga o iai. O nisi fafine o loo i lenei tulaga ua latou lagona faapea, ua leai se isi filifiliga e mafai ona latou fai, ae faasusu pea a latou pepe i a latou ma nanā ai lo latou aafia i le HIV.

E iai foʻi isi toʻatugā. Mo se faaaʻoaʻoga, seʻi manatu ia Makerita, ua 20 ona tausaga. Sa pei lava o ia o isi fafine mai nuu i tua o Uganda a itiiti mai e 95 pasene, e leʻi faia lava muamua sona suʻesuʻega po ua aafia i le HIV. Peitaʻi e iai māfuaʻaga na popole ai Makerita. O lana tamaitiiti muamua lava na oti, ma o lana tamaitiiti lona lua e auvaivai ma maʻimaʻia. E faasefulu i le aso ona faasusu e Makerita lana tama lona tolu, e ui lava atonu o loo aafia i le HIV. Ua faapea mai o ia: “E lē taitai mafai ona ou faasusuina laʻu pepe i se susu fagu.” Aiseā e lē mafai ai? E taʻua e Makerita faapea, o le tau o le fafagaina o se tamaitiiti e toʻatasi i se susu fagu, e faaaluina ai le tasi ma le ʻafa o le tupe e maua a se ʻāiga i lona nuu i le tausaga atoa. E tusa lava pe maua fua mai ni susu fagu, ae o le a iai lava le faafitauli o le tau sāʻilia mai o ni vai mamā e palu ai le susu ina ia avea o se meaʻai e saogalemu mo le pepe. *

O nisi o nei toʻatugā e mafai ona faaitiitia pe afai o loo maua e tinā ua aafia i le HIV ni tulaga mamā tau le soifua mālōlōina, e lava ni sauniuniga o mea o le a suia i ai le faasusuina ia i latou o a latou pepe, ma ia mamā ni vaitaumafa latou te maua. Pe taugatā ea? Atonu e taugatā. Peitaʻi, o se mea e māofa ai, o le mauaina o na sauniuniga e foliga mai e faalagolago atu i le faatulaga saʻo o mea e tatau ona faamuamua na i lo le suʻeina o ni tupe. O le mea moni, ua lipotia mai e Malo Aufaatasi faapea, o nisi o atunuu e sili ona matitiva o le lalolagi e faaluaina le tele o tupe o loo latou faaaluina i meatau na i lo tupe o loo latou faaalu mo le soifua mālōlōina ma aʻoaʻoga.

Ae Faapēfea Vailaau ua Faaaogā e Tetee Atu ai i le AIDS?

Ua lipotia mai e saienitisi a Malo Aufaatasi e faapea, o se fuālāʻau e lē taugatā e taʻua o le AZT e mafai ona matuā faaitiitia ai le pipisi atu o le HIV o le tinā i lana pepe. Ona o le fesoasoani a le UNAIDS, ua paʻū ifo ai le tau o lenei togafitiga i le $50 tupe Amerika. E lē gata i lea, na faasilasila mai ia Iulai o le 1999 e i latou o loo faia suʻesuʻega i le AIDS e faapea, o le togafitia o tinā ma a latou pepe ia ua maua i le HIV i le na o le $3 tupe Amerika e alu i le fuālaau o le nevirapine, e foliga mai e sili atu ona aogā na i lo le faaaogā o le fuālaau o le AZT lea e taofia ai le pipisi atu o le HIV. Ua faapea mai tagata popoto faapitoa i matāʻupu tau le soifua mālōlōina, e mafai e le nevirapine ona puipuia le oo atu i le 400,000 pepe faatoʻā fananau mai i le tausaga e tasi, mai le oo ina aafia o latou olaga amata i le HIV.

Peitaʻi ane, e iai nisi latou te faitioina na togafitiga e faaaogā ai fuālaau, i le faapea mai talu ai o na fuālaau na pau le mea e mafai ona latou faia o le taofia o le pipisi atu o le HIV o le tinā i lana pepe, o lona uiga la, e iʻu lava ina oti le tinā i le AIDS ma tuʻua ai loa le tamaitiiti ua mātuaoti. Ua tali fuaitau mai i ai le UN e faapea, o se filifiliga e matuā lē alofa le tuu atu o nai pepe e aafia i le HIV, ma iʻu ina māumau atu fua nai nei tamaiti e leai sa latou sala i se oti faanoanoa e faifai mālie atu. Ua latou finau mai foʻi faapea, o tinā ua aafia i le HIV atonu e soifua pea mo ni tausaga se tele. Seʻi manatu ia Cynthia, lea na taʻua i le amataga. Na ia iloa ua maua o ia i le HIV i le tausaga e 1985, ina ua fanau mai lana pepe, ae na faatoʻā amata ona maʻi ai i le valu tausaga mulimuli ane. Ma e ui lava na fanau mai lana pepe ua aafia i le HIV, ae oo ane i le lua tausaga o le tamaitiiti ua lē o toe ia te ia le siama.

O le faamautinoaga faamāfanafanaloto a le Tusi Paia e faapea, o loo taatia mai i le lumanaʻi se siʻomaga e saogalemu moni, ma se vaifofō tūmau i mala e pei o le AIDS. (Faaaliga 21:1-4) Ua folafola mai e Ieova le Atua se lalolagi fou lea o le a “le fai mai foi se tasi ua mau ai, Ou te maʻi.” (Isaia 33:24) E fia taʻu atu e Molimau a Ieova ia te oe lenei vaifofō tūmau. Mo nisi faamatalaga, ia faafesootaʻi atu i latou na lōmiaina lenei mekasini po o Molimau a Ieova i lou vaipanoa.

[Faaopoopoga i lalo]

[Ē Ana le Ata i le itulau 28]

WHO/E. Hooper