Le Mea Moni e Uiga i Agelu

E PEI lava ona tatou iloa, o manatu ma tala taatele e uiga i agelu e lē o ōgatusa i taimi uma ma mea o loo aʻoaʻoina e le Tusi Paia. Ae pe iai ea se āfaina pe afai e lē o ōgatusa? Pe iai ea se leaga o le taliaina o talitonuga taatele e uiga i agelu? E mautinoa lava e iai.

Mo se faaaʻoaʻoga, seʻi manatu i uiga ia o loo uunaʻia e “le tulaga faaleagaga fou.” O tusi i ona po nei e uiga i agelu e uunaʻia ai uiga faatamaiti o le taaʻina i manatu o isi, ae lē uunaʻia le faaaogā o le tomai faalemafaufau. E seāseā lava faalāʻeiʻauina tagata faitau ina ia taumafai e foʻia o latou faafitauli pe sāʻili atu i se malamalamaga o le Tusi Paia ma le poto e uiga i le Atua. E faamautinoa mai ia i tatou e tusi e uiga i agelu faapea, o loo tatou iai i se olaga e lagolagoina ai i tatou e se agelu agalelei ma le alofa, ma e  leai se pogai e popole ai, talu ai o loo tatou ola i se olaga maopoopo o loo iai mea uma i le tulaga e tatau ona iai. Pe a tulaʻi mai se faafitauli, na pau lava le mea tatou te manaʻomia o le faatalitali mo se faalaa mai a se agelu. Peitaʻi, pe afai e moni lenei manatu, ae aiseā la ua fai mai ai le Tusi Paia ia tatou “faamalolosi ona finau mo le faatuatua”?—Iuta 3.

E tele tusi e uiga i agelu o loo faamalieina ai uiga faamaualuga ma le faavalevalea o tagata. O o latou manatu e taulaʻi atu i le tagata lava ia. E tusa ai o faamatalaga a na tusitusiga, e mananaʻo agelu faaonaponei ia tatou iloa, o i tatou o ni tagata e aulelei ma ʻoliʻoli. E ui ina lelei le iai o so tatou faalogona mautinoa mo i tatou lava, peitaʻi o le matāʻupu autū lava e faamamafa e “le tulaga faaleagaga fou” o lo tatou alolofa ifo lea ia i tatou lava e aunoa ma ni tapulaa. Ua faapea mai se tasi tusitala, o le poloaʻiga muamua ma le sili o le “alofa atu ia te Oe Lava i le avea ma Alii.” Pagā le feteenaʻi o lenei manatu ma fetalaiga a Iesu! Na ia fetalai faapea: “E te alofa atu i le Alii [Ieova] lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili.” (Mataio 22:36-39) O le a sili ona tatou maua le fiafia i le olaga pe afai tatou te faamuamua le sāʻilia o manaʻoga o le Atua na i lo tatou lava manaʻoga.

O le avea o agelu ma taulaʻiga o manatu e matuā tuufaafeagai lava ma le Faa-Kerisiano moni. Na taʻusalaina e le aposetolo o Paulo tapuaʻiga i agelu. (Kolose 2:18) Ina ia tapuaʻi o lona uiga “ia faamamalu pe faaaloalo atu i se atua po o se mana e silisili ona mālosi na i lo tagata.” Peitaʻi, o le faamamalu ma le faaaloalo atu i agelu o le mea tonu lava lena o loo uunaʻia e tusi taatele e uiga i agelu a latou tagata faitau ina ia fai. Ae seʻi manatu foʻi i le mea na tupu ina ua tāpā e Satani Iesu e faatino mai ia te ia se gaoioiga e tasi faaletapuaʻiga. Na tali atu i ai Iesu: “E te ifo i le Alii [Ieova] lou Atua, ua na o ia lava e te auauna i ai.” (Luka 4:8) Mulimuli ane, ina ua faapaʻū ifo le aposetolo o Ioane i luma o se agelu, na faapea atu le agelu ia te ia: “Ia oe, aua lava; o aʻu o lou uso a auauna, o so lou au uso foi ua i ai le mau ia Iesu; ia e ifo i le Atua.”—Faaaliga 19:10.

Le Auala e Mafai Ona Fesoasoani ai Agelu ia te Oe

O lē e ao ona faalatalata atu i ai mo taʻitaʻiga ma le fesoasoani, o le Atua lea, ae lē o agelu. E nofosauni o ia ma fiafia e liligi ifo lona alofa i luga o i latou uma o ē usitaʻi i ana faatulagaga amiotonu. Na tusi atu le aposetolo o Ioane i ona uso Kerisiano: “O lenei foi le loto tele ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia ia te i tatou. Afai foi ua tatou iloa, e faafofoga mai o ia ia te i tatou i se mea tatou te faatoga atu ai, ua tatou iloa e maua e i tatou mea tatou te faatoga atu ai ia te ia.”—1 Ioane 5:14, 15, LF.

E tele mea tatou te lē o iloa e uiga i agelu faamaoni a le Atua. Peitaʻi, ua tatou iloa, o loo auauna i latou i le Atua, o loo galulue e ōgatusa ma lana fuafuaga ma lana taʻitaʻiga. Ua latou naunau e faaauilumaina le upu moni e uiga i le Atua. (Faaaliga 14:6, 7) Latou te lē o manaʻomia sa tatou tapuaʻiga. Talu ai e lē mafai ona tatou vāʻai ia i latou, tatou te lē iloa foʻi la po o le ā le tele e faaaogā ai i latou e le Atua i le fesoasoani atu i ona tagata i matāʻupufai o aso taʻitasi. Peitaʻi ua tatou iloa e puipuia ma taʻitaʻia e Ieova le Atua ona tagata o se vaega.

Maʻeu se faaaʻoaʻoga matagofie ua faataatia e agelu faamaoni mo i tatou! Latou te faamamaluina ma viiviia le Atua. (Salamo 148:2) E ui ina maoaʻe lo latou tulaga faalemafaufau ma lo latou mālosi faaleagaga, ae latou te faaalia le faaaloalo loloto mo le pule silisili ese a Ieova. (Iuta 9) E matuā naunau mai i latou i le faataunuuina o fuafuaga a le Atua. (1 Peteru 1:11, 12) Ua tatou aʻoaʻoina nei mea uma mai le Afioga a le Atua, le Tusi Paia. Ioe, o le Tusi Paia o le tusi lea o loo taʻu maia ia i tatou le mea moni e uiga i agelu.

[Faamatalaga faaopoopo i le itulau 10]

E naunau tele agelu e faaauilumaina le upu moni e uiga i le Atua

 [Ata i le itulau 8, 9]

Ina ua taumafai le aposetolo o Ioane e tapuaʻi i se agelu, na faapea atu i ai le agelu: “Aua lava”!