Mai se Olaga o le Solitulafono i se Olaga o le Faamoemoe

UA FAAMATALAINA E COSTA KOULLAPIS

NA OU FAATAUPUPULA ATU I PUIPUI PALAPALĀ O SE SELA NA OU NOFO AI I LE FALEPUIPUI MA OU MAFAUFAU E FAAPEA UA OU MANAʻOMIA LAVA SE AUALA OU TE MAUA AI SE TUPE MATUĀ TELĒ INA IA MAFAI AI ONA OU ALOESE MAI LE OLAGA SOLITULAFONO SA OU IAI MA AMATA SE OLAGA FOU.

A O OʻU nofo ai iinā—ma se faalogona lē fiafia ma le mafatia—sa ou manatua ai e faapea i le tausaga na seʻi mavae atu, na maliliu ai le toʻa 11 o aʻu uō. O le tasi na sisi lona ua ona o le fasioti tagata, o le isi na pule i lona lava ola a o faatali lona faamasinoga mo le fasioti tagata, o le toʻatolu na maliliu ona ua soona faaaogā fuālaau faasāina, o le toʻalua na fāsia i se misa i le auala ma feoti ai, ma e toʻafā na feoti i faalavelave faafuaseʻi tau taavale. E iai foʻi isi aʻu uō sa tuli ni faasalaga i falepuipui eseese ona o solitulafono mataʻutia.

O lea, i le pogisa o loʻu potu i le falepuipui, na ou tatalo faatauanau ai i le Atua, po o ai lava o ia, ina ia faailoa mai ia te aʻu se auala ou te sao ese ai mai lenei olaga solitulafono. Sa leʻi faailoaina mai i lena taimi seʻia oo i se taimi mulimuli ane, na ou maua ai le tali i laʻu tatalo. I lena taimi, sa mafai ona ou ʻalofia le matuiā o le mōliaga o le faaoolima ma le manatu e faaoo ni manuʻa ogaoga i se tagata. O se  feagaiga i le va o aʻu ma le malo sa avea ma fesoasoani, ma na mafai ai ona tatalaina aʻu mai se mōliaga e lē matuiā faapea ma le faaitiitia o le faasalaga. Ae seʻi oʻu faamatala muamua atu le māfuaʻaga na ou oo ai i lena tulaga mataʻutia.

Na ou fanau i Pretoria, i Aferika i Saute, i le 1944 ma ola aʻe ai iinā. Sa leai se fiafia i uluaʻi tausaga o loʻu olaga, ma sa masani ona lē fiafia le olaga o lo matou ʻāiga ona o le ita leaga ma le sauā o Tamā, sa sili ona leaga ona o le inu tele pea i le ʻava mālosi. E fai foʻi ma ana masani le pelē tupe, ma o ona uiga fesuisuiaʻi e masani ona iʻu ai i le fai o upu masoā ma faatigā ma faaoolima ai ia i matou uma, aemaise lava Tinā. Ina ia sola ese mai le tauaʻimisa soo na ou fealuaʻi solo ai i le auala tele.

Loʻu Ala Agaʻi i le Solitulafono

O le iʻuga o lena mea, na oo ai ina ou poto i ala o le lalolagi a o oʻu laʻitiiti lava. Mo se faaaʻoaʻoga, ina ua valu oʻu tausaga, sa ou aʻoaʻoina ai ni lesona se lua. O le lesona muamua, ina ua maua aʻu o iai ni mea taalo ia sa ou gaoia mai ʻāiga tuāʻoi. E matuā sasaina lava aʻu e loʻu tamā. Ou te faalogoina pea ana upu faamataʻu i lona ita: “A ou toe maua oe ma ni mea na e gaoia, ou te gagauina lou ua!” Ou te leʻi manatu tele faapea ou te lē toe gaoi, ae sa ou mafaufau ia aua neʻi toe maua aʻu o oʻu gaoi. Na ou faapea ifo ia te aʻu lava, ‘O le isi taimi o le a ou nanāina ma o le a lē maua lava.’

O le lesona lona lua na ou aʻoaʻoina a o laʻitiiti lava sa lē fesootaʻi atu ma le solitulafono. I se vasega faale-Tusi Paia sa aʻoaʻoina i le aʻoga, na aʻoaʻoina ai i matou e lo matou faiaʻoga e faapea e iai se suafa tōtino o le Atua. Na faateʻia i matou i lona faapea mai: “O le suafa o le Atua, o Ieova, ma e faafofoga mai o ia i so o se tatalo e te fai atu, tau lava ina ia auala atu lau tatalo i le suafa o lona Alo, o Iesu.” O lena faamatalaga na tāmau ai se mea i loʻu mafaufau laʻitiiti, e ui sa leʻi taofia ai aʻu mai le seesee atu i se olaga solitulafono. E oo ane i le taimi na ou siitia ai i le aʻoga maualuga, ae ua ou matuā poto lava i le gaoia o faleoloa ma le talepe o fale ma gaoia oloa. Sa leai se fesoasoani na maua mai i aʻu uō i le aʻoga, talu ai o le toʻatele o i latou ua uma ona oo i aʻoga e aʻoaʻia ai tamaiti solitulafono ona sa latou faia solitulafono eseese.

A o mavae atu tausaga, sa oo ai ina avea ma aʻu masani le faia o solitulafono. A o leʻi aulia le 20 o oʻu tausaga, ae sa ou aafia i le anoanoaʻi o faiga faaoolima ma le fāoa faamālosi o mea, talepe fale ma gaoi oloa, gaoia o taavale, ma gaoioiga sauā o le fasi tagata. Talu ai sa ou fealualuaʻi solo lava i fale piliati ma falepia, i le faia o feʻau mo ē e faaauilumaina pisinisi faatalitane, fafine talitane, ma tagata solitulafono, e leʻi iʻu ai loʻu tausaga muamua i le aʻoga maualuga o matātā eseese.

Sa matou faifaimea faatasi e lē aunoa ma tagata solitulafono lotomaaa, o ē e lē popoi lava i le faataumaʻoia o so o se tasi e faalataina i latou. Sa ou aʻoaʻoina e aua lava neʻi oʻu tautala ma aua neʻi gugutu e uiga i mea ia sa ou faia ma fia faalialia solo i tupe. O le faia faapea o le a na ona faalauiloa atu ai se solitulafono na faia, ma oo ai ina iloa e leoleo ma faia ai se suʻesuʻega faigatā. E sili atu foʻi ona leaga, e ono iʻu ina teʻi ua ō mai ai isi tagata solitulafono e mananaʻo foʻi i sa latou vaega o le vete.

Ae peitaʻi, e tusa lava po o ā na faaeteetega, ae i nisi taimi e mataʻitū ai lava aʻu e leoleo ona o le masalosalo i loʻu aafia ai i gaoioiga e lē tusa ma le tulafono. Ae sa ou faaeteete ina ia aua lava neʻi maua ia te aʻu se mea e ono faafesootaʻi ai aʻu i se solitulafono pe e mafai ona avatu ai se faamaoniga o loʻu aafia ai. E faatasi ona osofaʻi e leoleo lo matou fale i le tolu i le vaveao. E faalua ona latou suʻeina le fale atoa e sāʻili mo ni masini e alu i le uila—o ni oloa siiatoa a se kamupanī i lena vaipanoa na gaoia. E leai se mea na latou maua. Na ave aʻu i le ofisa o leoleo e suʻe oʻu tulaga lima, ae sa leʻi mōliaina aʻu.

Aafia i Fuālaau Faasāina

Mai le 12 o oʻu tausaga, na amata ai ona ou faaaogāina e le aunoa ia fuālaau e faalēlelei ai le mafaufau. Na amata ona faaleagaina loʻu soifua mālōlōina mai le faaaogāsesēina o na mea, ma i nisi taimi, na toetoe lava a ou oti ai ona o le soona faaaogāina o fuālaau faasāina. E leʻi umi ae faafeiloaʻi aʻu i se fōmaʻi o lē e matuā mālolosi ana fesootaʻiga ma faalapotopotoga o faiga solitulafono. O lenei mea na iʻu  ina avea ai aʻu ma se tasi e faatauina atu ia fuālaau faasāina, ma sa leʻi pine ae ou iloa o le faatauina atu i ni nai tagata o ē e tufatufa atu fuālaau faasāina e lē lamatia tele ai mo aʻu auā e mafai lava ona lilo aʻu ae lamatia ai isi.

E faanoanoa ai, o nisi o tagata na faia a matou feutagaʻiga i fuālaau faasāina sa soona inuina ma maliliu ai pe na faia foʻi ni solitulafono matuiā a o aafia i le mālolosi o fuālaau faasāina. O se tasi o aʻu “uō” na ia fasiotia se fōmaʻi lauiloa. O lenei mea na avea ma talatomua i le atunuu atoa. Ona ia taumafai lea e faaaafia ai fua aʻu, ae ou te leʻi faalogo lava e uiga i le mea na tupu seʻi oo ina ua taunuu mai leoleo i loʻu fale. O le mea moni, e masani lava ona ō mai leoleo ma suʻesuʻe aʻu e uiga i solitulafono eseese ia na faia.

Ae peitaʻi, i se tasi aso, na ou faia ai se mea e matuā valea lava. Ina ua mavae se vaiaso o inu fuālaau faasāina ma le ʻava mālosi, na ou osofaʻia ai ma le ita tele ni tagata se toʻalua ona o se lē femalamalamaaʻi, ma na matuā manunuʻa leaga ai lava i laʻua. I le taeao na sosoo ai, na la faailoaina atu ai aʻu e faapea na ou osofaʻia i laʻua, ma na puʻe faapāgotāina ai aʻu ona o le faaoolima ma le taumafai e faaoo ni manuʻa ogaoga i tino o ia tagata. O le auala lena na ou oo ai i le falepuipui.

Sāʻili le ʻOa ma Faasaʻo ai le Olaga

Ina ua uma ona tatala mai aʻu mai le falepuipui, sa ou faalogo ai o faasalalau se avanoa mo se tagata e vaʻaia oloa a se kamupani o vailaau. Sa ou talosaga mo le avanoa ma faatalitonuina le kamupanī e faapea ua ou agavaa mo le galuega. Faatasi ma ni faamaoniga mai se uō o loo faigaluega ai i le kamupanī, na ou maua ai le galuega. O le auala lenei sa ou manatu o le a tele ai ni aʻu tupe e mafai ona maua ma ou alu ai i se isi mea e toe amata ai se olaga mamā. O lea sa ou toʻaga ai e aʻoaʻoina vala uma o le pisinisi i se vave na mafai ai ma ala ai e oo i le leva o po taʻitasi e aʻoaʻoina igoa o vailaau uma. Sa ou mautinoa e faapea o le auala lenei e mafai ai ona ou ola i se olaga fou.

O laʻu fuafuaga, sa ou faatali mo se avanoa e sili ona lelei ma ia faatuatuaina aʻu e oʻu pule. O lea, pe a oo loa i le taimi ua tatau ai, ona ou osofaʻia loa lea ma gaoi se aofaʻiga tele o ni fuālaau faapitoa sa ou iloa o le a aogā tele mo le faatauina atu i ni auala faalilolilo e lē tusa ma le tulafono, faatau atu ia mea ma oo ina vave ona tele ai ni tupe e maua. Sa ou fuafuaina le mea ua ou iloa o le a fetaui lelei e fai ma ʻalofaga ina ia faamautinoa ai loʻu saʻolotoga faapea ma se olaga fou.

Na oo mai le taimi mo aʻu e faatino ai le fuafuaga. I le tasi po, ina ua uma ona ou ulufale ma le faaeteete i totonu o le fale e teu ai vailaau, sa ou vaavaai i luga o fata o loo teu ai fuālaau e tusa ma le faitau selau afe talā lo latou tau. Iinā na ou iloa ai se avanoa mo aʻu e amataina ai se olaga e aunoa ma ni solitulafono ma faiga sauā. Ae peitaʻi, o se uluaʻi taimi lea i loʻu olaga ua amata ai ona faalavelave mai loʻu loto fuatiaifo ia te aʻu. O le ā na faapogaia lenei faalogona tigā faafuaseʻi o loʻu loto fuatiaifo ae na toeitiiti lava galo ia te aʻu e iai soʻu loto fuatiaifo? Seʻi ou faamatala atu pe na faapēfea ona oo mai lenei mea.

I ni nai vaiaso a o leʻi tupu lenei mea, na ma talanoa ai ma le pule e faatatau i le uiga o le olaga. I le tali atu i se tala na ia fai mai, na ou faapea atu ai, o le fesoasoani sili mo se tasi, o le tatalo lea. Na ia fesili mai, “Ia te ai?” Na ou tali atu, “I le Atua.” Na ia faapea mai: “Ae e tele atua o loo tatalo atu i ai tagata, o fea la le atua o le a e tatalo atu i ai?” Na ou fai atu: “O le Atua e Ona le Mālosi Uma Lava.” Na ia toe faapea mai: “O, o ai la lona suafa?” Na ou fai atu: “O le ā le uiga o lau tala?” Na ia tali mai e faapea: “Ia e pei o oe ma aʻu ma isi tagata uma lava, e iai le suafa tōtino o le Atua e Ona le Mālosi Uma Lava.” Sa ou lagona e saʻo, ae sa amata ona oso aʻe loʻu ita. O lea na ou fai atu ai ma le ita: “Ia o ai la le suafa o le Atua?” Na ia tali mai: “O le suafa o le Atua e Ona le Mālosi Uma Lava o Ieova!”

Na faafuaseʻi lava ona vavala mai i loʻu mafaufau mea na tutupu i aso ua mavae, ma na saputu mai i loʻu mafaufau le lesona i le potu aʻoga a o na o le valu oʻu tausaga. Sa ou ofo lava i āuga maoaʻe na oo ia te aʻu ona o la ma talanoaga ma le pule. Sa ma nonofo ai mo se taimi umi ma faia sa ma talanoaga loloto. I le aso na sosoo ai na ia aumai ai ia te aʻu le tusi o Le Upu Moni E Taʻitaʻi Ai I Le Ola Faavavau. * Na ou faitauina le tusi atoa i lena po ma na ou talitonu ai loa ua ou maua le  upu moni ma le uiga moni o le olaga. Mo le isi lua vaiaso na sosoo ai, sa tau leai ni a ma mea na faia ae na faaalu le tele o le taimi e talanoaina ai matāʻupu eseese i lena tusi lanumoana uigaese.

O lea, a o oʻu nofo i le pogisa ma le toʻafilemu o le fale e teu ai oloa, na taʻu mai ai e loʻu loto fuatiaifo ia te aʻu e faapea, o aʻu fuafuaga e gaoia ma faatau atu ia vailaau e sesē uma lava. Sa ou alu ese lēmū loa ma alu atu i le fale, na ou filifili ai e faapea, e amata mai i lena aso ma faasolo atu ai lava, ou te lē toe gaoi.

Se Suiga Atoatoa

I aso na sosoo ai, na ou taʻu atu ai i loʻu ʻāiga e faapea, ua ou filifili o le a amata se ala fou o le olaga, ma na amata loa ona ou tufa atu ia i latou nisi o upu moni o le Tusi Paia na ou aʻoaʻoina. Sa manaʻo loʻu tamā e tuli ese aʻu ma le fale. Ae na ʻau mai loʻu uso o Ioane ia te aʻu, i le faapea atu i loʻu tamā: “O le taimi muamua lea i lona olaga ua aafia ai Costa i le faia o se mea e lē o se solitulafono, a o lea ua e manaʻo e tuli ese? O lea o le a ou sāʻiliʻili atili e uiga i lenei mea.” I loʻu ofo ma le fiafia, na fai mai ai Ioane ia te aʻu e ma te suʻesuʻe i le Tusi Paia. E amata atu i lena taimi ma faasolo atu ai lava, o i latou uma na ō mai ia te aʻu mo ni fuālaau faasāina, na latou maua se kopi o le tusi o le Upu Moni na i lo o fuālaau faasāina! E leʻi pine ae ou faia ni suʻesuʻega faale-Tusi Paia se 11 e ala i le fesoasoani a lena tusi.

O lea na ou iloa ai o le pule o le kamupanī, e lē o ia o se Molimau. Ua 18 tausaga talu ona avea lana avā ma Molimau, ae sa “leʻi maua lava se taimi e faia ai [sana] gaoioiga e uiga i le upu moni.” O lea na ia fuafuaina ai mo se Molimau tomai e faia saʻu suʻesuʻega faale-Tusi Paia e lē aunoa. O aʻu suʻesuʻega sa leʻi pine ae ou iloa ai le manaʻomia ona faafesagaʻia isi vala o le olaga, ma sa leʻi umi lava se taimi ae amata ona tuusaʻoloto aʻu e upu moni o le Afioga a le Atua mai oʻu ala faalelalolagi.—Ioane 8:32.

Ae peitaʻi, na faafuaseʻi lava ona ou lagona le lofitūina ona o le vave tele ona tutupu o nei suiga i na o ni nai vaiaso. Na ou fesagaʻi ma le faia o ni suiga tetele, ma na amata ai ona ou iloa e faapea, o se taua tele i le va o le tino ma le agaga lea o loo faatali mai mo aʻu pe afai e faaauau pea ona ou mulimuli i le taʻiala lea o loo faasino mai e aʻu suʻesuʻega faale-Tusi Paia ia te aʻu. I le isi itu, na ou iloa ai e faapea atonu o le oti po o le nofo i le falepuipui mo ni tausaga se tele lea o loo faatali mai mo aʻu, pe afai e faaauau pea ona ou ola i le olaga lea sa ou ola muamua ai seʻia oo mai i lena taimi. O lea, ina ua uma ona mafaufau loloto faatasi ma le tatalo faatauanau, na ou filifili ai loa e mulimuli i le ala o le upu moni. Na faailogaina loʻu tuuina atu ia Ieova le Atua e ala i le papatisoga i le vai i le ono masina mulimuli ane, ia Aperila 4, 1971.

Taui Ona o le Uia o le Auala Saʻo

Pe a ou toe tepa i tua, i nisi taimi e oo ai ia te aʻu ni faalogona ootia pe a ou mafaufau i faamanuiaga ia ua ou mauaina talu ona ou filifili e lafoaʻia le ala solitulafono. Mai tagata e toʻa 11 ia na amata ona matou suʻesuʻe i le faagasologa o nai uluaʻi vaiaso fesouaʻiina, e toʻa 5 o loo savavali pea i le ala o le upu moni. Na talia foʻi e loʻu tinā se suʻesuʻega faale-Tusi Paia ma avea ai ma Molimau papatisoina, ma faaauau pea ona auauna faamaoni i le Atua seʻia oo i lona maliu i le tausaga e 1991. Na tuuina atu foʻi e oʻu uso e toʻalua o la ola ia Ieova ma ua auauna nei o ni toeaina. Sa mafai foʻi ona ou fesoasoani i le uso o loʻu tinā e aʻoaʻoina le upu moni, ma sa auauna faataimi atoa i le faiva mo le 15 tausaga ua mavae.

O le pule o le kamupanī o vailaau lea na ou galue ai, sa matuā faalāʻeiʻauina i suiga na faia i loʻu olaga, o lea na amata ai ona matuā uigā ia te ia upu moni o le Tusi Paia. Ina ua mavae le tausaga talu ona ou papatiso, na faailogaina ai foʻi lona tuuina atu i le Atua e ala i le papatisoga i le vai. Mulimuli ane na auauna ai o ia e avea o se toeaina mo le tele o tausaga i se tasi o faapotopotoga o Molimau a Ieova i Pretoria.

I le taimi nei ua ou faaipoipo atu i se tuafafine Kerisiano tuuina atu o Leonie ma na ma siitia atu i Ausetalia i le 1978. O iinā na fananau ai la ma fanau tama e toʻalua, o Elia ma Paulo. O faalāʻeiʻauga a loʻu ʻāiga ua avea o se puna moni o le mālosi mo aʻu. Ua ou maua se faaeaga o le auauna e avea o se toeaina i se faapotopotoga i Canberra, le laumua o Ausetalia. Ou te faafetai atu ia Ieova i aso taʻitasi, o lē na laveaʻiina aʻu mai se olaga gaogao o le solitulafono lea na ono iʻu i faanoanoaga ma le oti. E lē gata i lea, na ia aumaia se uiga i loʻu olaga e ala i le saunia o se faamoemoe moni mo aʻu ma ē pele ia te aʻu.

[Faaopoopoga i lalo]

[Ata i le itulau 18]

Ina o 12 oʻu tausaga

[Ata i le itulau 18]

I maʻua ma laʻu avā ma oʻu atalii e toʻalua i aso nei