O Lagona Fiafia i Agelu

“E tofu ‘uma’ lava ma agelu o loo taʻitaʻiina, leoleoina i tatou . . . Pe a aua neʻi o tatou faalavelave fua ia i latou ae ia pei i tatou o ni tamaiti i le tuuina atu ia i latou o lo tatou faatuatuaga atoatoa, lo tatou alofa ma o tatou agaga faafetai ma le lotomaulalo, ona faapena foʻi lea ona latou liligiina ifo le anoanoaʻi o a latou faamanuiaga ia i tatou. Tatou te taaalo faatasi ma i latou. Latou te tausia maia i tatou. Latou te faamālōlōina i tatou, e paʻi mai, ma faamāfanafana mai ia i tatou i o latou aao māfana lē vaʻaia, ma e masani lava ona latou taumafai e foaʻi mai ia i tatou mea tatou te mananaʻo ai.”—Mai le tusi “Angel Letters.”

E TATAU ona e ioe e ese le logo mālie o lenei manatu taatele e faatatau i agelu. Fai mai manatu o nisi o ē ua taʻua o “le tulaga faaleagaga fou,” pe ā ma le tasi se agelu ua tofia mai mo i tatou uma taʻitoʻatasi, e fai ma tiute a lena agelu le faamāfanafana ma puipuia i tatou mai ni mea leaga. Ua taʻua faapea, o lau agelu e lē gata e mālosi ae alofa foʻi. E na te lē manaʻomia sou usiusitaʻi atu pe tapuaʻi atu ia te ia, ma e lē taitai foʻi ona ia aʻoaʻia pe faamasinoina oe. E tū lava o ia mo oe i taimi uma, e galue mālosi mo sou lelei ma naunautaʻi e faamalie ou moomooga uma. E toʻatele tagata i aso nei ua matuā talitonu lava i nei manatu.

O le talitonu i agelu, o le mea moni lava, e lē o  se talitonuga fou. Ua latou faatinoina se matāfaioi telē i talitonuga faalotu o tagata talu mai lava taimi anamua. Ua atagia mai lea i tusiga ata. O ata o kerupi, o se ituaiga o agelu, sa teuteuina ai le fale fetafaʻi ma le malumalu o tagata Iutaia anamua. O loo teuteu ai foʻi falesā ma malumalu o lotu Kerisinetoma i agelu. Ua faatumulia fale mataaga i atatusi ma faatagata o agelu na vaneina.

Le Tulaga Lauiloa o Agelu

I ni taimi e leʻi mamao tele atu, ua matuā taʻutaʻua ai lava agelu i nisi atunuu. E masani ona faaāta mai agelu i tifaga o ni tagata o ē ua maliliu ae ua toe taliu mai i le lalolagi e faatino ni gaoioiga lelei. I se tasi ata tifaga, o loo fesoasoani atu ai agelu i se ʻaupesipolo o loo faiaʻina. I se isi ata, o loo fesoasoani atu ai se agelu leoleo i se tama talavou e faaoo atu lana taui ma sui ona o le fasiotia o lana uō teine. E iai se polokalame taʻutaʻua o loo faaalia i televise i le Iunaite Setete o loo sili foʻi ona faaautū atu i se agelu o loo fai ma fesoasoani.

E anoanoaʻi pese e faatatau i agelu. I le faitau sefulu o tausaga e leʻi leva tele atu i le Iunaite Setete, e 1 le pese mai pese taʻutaʻua uma e 10 e taʻua ai se agelu. E oo mai i tausaga ogatotonu o vaitausaga mai le 1990, ua silia ma le 120 “faleoloa faaagelu” na tatalaina i Amerika. O nei faleoloa latou te faatauina atu tamaʻi faatagata o agelu, o lote o asoa e iai ata o agelu, ma pepa ma teutusi e iai foʻi ata o agelu—e oo lava i meataalo mo pepe ua teuteuina i ata o agelu. E iai seminā ma tusitusiga, sāvali, ma tamaʻitusi ua fuafua mo le aʻoaʻoina o tagata i auala e fesootaʻi atu ai i nei meafaiola faalelagi. O mekasini, o nusipepa, ma faatalatalanoaga i televise ma leitiō, o loo faamatalaina ai tala e uiga i fesootaʻiga a tagata ma agelu.

O Tusi e Faitau Selau

E iai foʻi ma tusi e faatatau i agelu. O se tasi faletusi tele lava i le aai o Niu Ioka o loo latou faatauina atu le silia ma le 500 tusi eseese o loo talanoaina ai matāʻupu e uiga i agelu, aemaise lava agelu o loo fai ma leoleo. O loo folafola e na tusi lo latou faaalia mai i a latou tagata faitau o le auala e fesootaʻi atu ai i agelu o loo fai ma leoleo, ia aʻoaʻo e iloa o latou igoa, ia talanoa atu ia i latou, ma le auala e mauaina ai la latou fesoasoani. O loo iai i nei tusi le tele o tala i auala e faaali mai ai agelu i taimi o mafatiaga, i le tatosoʻeseina o tagata mai le auala o loo ō mai ai ni taavale, le togafitia o ni faamaʻi mataʻutia, le aumaia o faamāfanafanaga ia i latou o mafatia, ma le puipuia o fitafita i tafā o taua. O na agelu o loo latou faatinoina ni auaunaga “e aunoa ma le manaʻomia o se faailoga o le salamō, le liliu ese, po o le gauaʻi atu i ni talitonuga patino.” Peitaʻi e seāseā lava i na “fesootaʻiga” faaonaponei ona uunaʻia ai tagata e faia ni suiga i o latou olaga. O i latou e faapea mai na tutupu moni ai na mea, e masani lava ona uma ane e na o se lagona fiafia lava e iai.

I se vaitaimi o mafatiaga ma mala, e ono foliga mai ai o nei tala o ni tala e sili ona lelei. Ae pe mafai ea ona faatuatuaina? Pe iai ea se āfaina?

[Faamatalaga faaopoopo i le itulau 4]

E toʻatele tagata e iai le lagona faapea ua latou fesootaʻi moni lava ma agelu