Po o E Faasaoina le Eletise pe E te Faamaʻimauina?

TUSIA E LE SUI O LE ALA MAI! I PERETANIA

O LE eletise pe tusa e 1 piliona tālā Amerika lona tau, e lava lelei mo le avatua o le mālosi faaeletise i se aai e pei lona telē o Chicago, ua faapea ona faamaʻimauina i le Iunaite Setete i tausaga taʻitasi. E faapēfea? O masini e pei o komepiuta, masini fax, vitiō, televise, ma lāʻau pese e tāina ai CD, e oo lava foʻi i masini fai kofe o loo tuʻua e aunoa ma le tapēina o le eletise. Ua faia faapea ina ia ola ai pea uati o nei masini, ia aua neʻi leiloloa faamatalaga ua uma ona teuina ai, ia tūmau pea le auala na faatulaga ai—po o le tuu ai pea faapena ina ia faigofie ona faaaogā i so o se taimi e manaʻomia vave ai.

Ua mātauina i Peretania faapea o le eletise o loo faaalu lē aogā e na masini i tausaga taʻitasi ua faapogaia ai le ʻafa miliona tone o kasa vevela, e ala lea i le faleeletise. Ua oo atu nei kasa i le atimosifia ma e ono faaopoopo atu i aafiaga o le vevela o le lalolagi. Ua faapea mai le nusipepa a Lonetona o le Times: “E ui ina taatele le manatu e faatatau i le puipuia o le siʻosiʻomaga i le toʻatele o ē faaaogāina le eletise, e toʻaitiiti lava i latou o loo amanaʻia le sootaga o le gaosia o le eletise ma le vevela o le paneta.”

E lē o mātauina e le lautele faapea o le tele o tamaʻi masini elekitoronika e toeitiiti lava tutusa le eletise o loo latou faaaogāina pe a tapē le masini a o loo ola pea le eletise ma le taimi e faaola ai ma faaaogā. Mo se faataʻitaʻiga, e ono faaalu e le satelite mo TV le 15 uati pe a faaaogā ae 14 uati na te faaaluina pe a tapē ae o loo ola pea le eletise. O le lē lelei ona fausia o se tasi foʻi lea o māfuaʻaga o le tele o uati e faaaogā. O se tasi lāʻau pese e ta ai CD na suʻesuʻeina e na te faaaluina le 28 uati pe a tapē le mūsika ae o loo ola pea le eletise, ae o le isi ituaiga e tutusa lava o la aogā, na faaaluina na o le 2 uati. Peitaʻi ua fuafuaina nei se komepiuta manifinifi fou ua manatu faapea e mafai ona ia faaitiitia le eletise o loo faaaluina pe a tau ina tapē se masini ae o loo ola pea le eletise mai le 10 uati i le 1 le uati po o le oo lava i le 0.1 uati. E faamoemoe a o faaauau pea le taua faasaga i le polusione, o le a iai se taimi e faaaogā ai e falegaosimea i le lalolagi atoa lenei masini manifinifi, e $2.50 Amerika lona tau, e avea ma vaega autū. Ae i le taimi lenei, o le ā e mafai ona e faia?

Na mātauina e le minisita o le siʻosiʻomaga a Peretania faapea: “O le telē o le eletise o loo faaaogāina e tamaʻi masini taʻitasi e ono foliga mai e laʻitiiti. Ae peitaʻi ona e 60 miliona i tatou o loo i nei motu [Peretania] e matuā telē lava la pe a faaopoopo faatasi.” O mea e faaaogā i le fale e pei o pusa ʻaisa e matuā manino mai lava le lē tatau ona tapēina. Ae e fautuaina ia le fai ma masani le tapē o molī e lē manaʻomia ma le tapēina o isi meafaigaluega na i lo le tau lava ina tapē ae o loo ola pea le eletise. O le faia faapea o le a lē gata ina faasaoina ai au tupe ae fesoasoani foʻi i le faasaoina o lo tatou paneta mai le faapolusioneina fua.