“Le Leise e Pei o se Faamoega o se Apogaleveleve”—Mea Taulima Mataʻina a Paraguay

MAI SE SUI O LE ALA MAI! I PARAGUAY

I ASUNCIÓN, I PARAGUAY. Ua aveese a ma ato mai le vaalele, o lea lava o loo maua ai sina taimi puupuu e ma te matamata solo ai. Ua faafuaseʻi lava ona toso atu aʻu e loʻu toʻalua i mea o loo tautau i le puipui o loo faaali ai. Sa faapea mai ma le māofa o ia, “E ese le manaia o le mea le la!” ma faasino atu i se ie ufi laulau leise matagofie e matuā ninii lava le lalagaina o lona mamanu. Sa ia tau manatu ai loa lava pe na faapefea ona faia.

O le leise e pei o se faamoega o se apogaleveleve, na amata mai i Arapi. E tusa ai ma le faamatalaga i le tusi, Paraguay, Touristic and General Information e faapea, “o lenei leise na aveina atu i Canary Islands ma oo ai i Sepania, ma i le va o lona 17 ma lona 18 o senituri, na aumaia ai i Paraguay, o iinā na suia ai le taʻu faapea o le leise sa pei o ave o le la lona mamanuina mai Tenerife ma faaigoa ai o le leise a Paraguay, po o le faamoega o le apogaleveleve (nanduti).” I Paraguay, na faia ai e le tagata fai leise ni ana ia lava mamanu i le leise, ma tuuina i ai i le mamanu o lenei leise matagofie ia ata o laau ma manu o lena vaipanoa. E ui lava o le leise e lē o se mea na amata mai ai i le atunuu, ae sa faaopoopo e tagata Paraguay i la latou leise ia ni suʻi tuāfilo fou e ese mai ai. Ua oo ina avea le lalagaina o leise ma galuega e maua ai mea e ola ai le toʻatele o tagata o le atunuu.

Na faapefea ona latou faia lenei leise ninii o loo faaatagia mai ai le faamoega o se apogaleveleve? Ina ia fesoasoani ia i maʻua e iloa le tali, na aveina ai i maʻua e lē na avea ma o ma faasino ala i se mamao e 18 maila [30 kilomita] i le itu i sasaʻe o Asunción i le aai laitiiti o Itauguá. Na faailoa mai e le tamāloa ia i maʻua e faapea, o le tele o leise e pei o se faamoega o se apogaleveleve a Paraguay, e saunia atu i le vaipanoa lenei. E moni, o le tele o mea e lalaga o loo faaalia i faleoloa o loo tutū faasolo i le aualatele.

Na faafeiloaʻia ma le māfana i matou e se tasi o lē ona se faleoloa ma faaali mai ia i matou nisi o mea mananaia. Sa faamatala mai e lenei fafine e faapea: “E fuafuaina le ituaiga o leise e faia i lima, e tusa ma le auala o loo faia ai. O le leise e pei o se faamoega o se apogaleveleve, e suʻiina i le nila. O le toʻatele o tagata e faia leise i Paraguay, e taulotoina a latou mamanu, a o isi e faaaogā ia ata po o fua. E faaaogā e i latou uma lava ia se fasi ie vavae e faamauina i se mama laau e suʻi ai le leise i le nila ma le filo. E latou te aʻoaʻoina lenei galuega taulima mai o latou tinā a o laiti lava, ona aʻoaʻo ai foʻi lea i a latou fanau.”

So o se apogaleveleve lava e lalagaina faalapotopoto lona faamoega, e na o le lua po o le tolu itula e lalaga ai. Na taʻua e le fafine lea e ana le faleoloa e faapea: “O le suʻiina i le nila o se ie ufi laulau e tusa lona umi ma se laulau e toʻavalu tagata e nonofo ai, e faaalu ai le lua i le tolu masina pe a faaaogā le filo matuatua. Ae o le faia o le ie ufi laulau lava lea e tasi e faaaogā ai le filo tuaiti, e faaalu ai le tusa ma le ono i le valu masina. O le tuaiti o le filo, o le sili atu foʻi lena ona matagofie le leise e maua mai ai.”

A o ia sisi aʻe i luga se tamaʻi napekini (lace doily) paʻepaʻe, ua ia faamatala mai e faapea: “O le mamanu lea e i le ogatotonu, o le fugālaau o le fua o le laau o le kuava, ma e tatau ona faitau le aofaʻi o filo ia a o suʻiina. E sili atu ona faigatā ona faia o le mamanu lea, ma e faaalu ai le lua vaiaso e faia ai i le filo tuaiti. I le amataga lava, sa faaaogā ai e le au fai leise na o le filo tuaiti ma o leise uma lava sa matuā taugatā. O le mea lea, na amata ai e le toʻatele o le au fai leise ona faaaogā le filo matuatua ina ia mafai ai ona faia vave mea ma ina ia taugofie ai foʻi.”

Sa faaalia ai tamaʻi fala felanulanuaʻi ma papaʻe e tuu i lalo o ipu māfolafola, o ie ufi laulau, o leise ufi meafale, o tamaʻi fala e tuu i lalo o iputi, ma isi lava mea i le aiga. Ina ua ma fesili atu e uiga i ni lavalava, na vave lava ona aumaia i fafo e lē ona le faleoloa se ofu matagofie o lana tama teine, lea e mautinoa lava lona matuā mitamita ai i lea ofu. O se ofu felanulanuaʻi atoa e pei o se nuanua. I isi faleoloa, sa ma maua ai ni postcard na matagofie ona faia i le leise tuaiti. E lētioa ona manatu i le leise pei se faamoega o se apogaleveleve a Paraguay o se mea taulima e sili ona taʻutaʻua.

 [Ata atoa i le itulau 18]