Le Manatu o le Tusi Paia

Le Pepelo—Pe e Iai ni Taimi e Lē Afaina Ai?

“O SINA TALA LĒ SAʻO I NISI TAIMI, E ALOFIA AI LE FAIA O LE TELE O NI FAAMALAMALAMAGA.”

O LENEI manatu, ua faaalia ai lagona o le toʻatele e uiga i le pepelo. O lo latou manatu e faapea, e lē sesē le pepelo pe afai e lē o afaina ai se tasi. O lena manatu, ua oo lava ina iai sona igoa faaleaʻoaʻoga—o amioga e fai e tusa ma le tulaga o loo iai (situation ethics), lea e faapea mai, e na o le pau lava le tulafono e manaʻomia ona e mulimuli ai, o le tulafono lea ua taʻua o le alofa. I se isi faaupuga, ua faamatala mai e le tusitala o Diane Komp e faapea: “Afai e saʻo au māfuaaga ma saʻo faanaunauga o lou loto (o le) mea moni la, o lau pepelo . . . e lē afaina.”

O manatu faapena, ua taatele i le lalolagi i aso nei. O faiga matagā e aofia ai pepelo ua faia e tagata faipolotiki lauiloa ma isi taʻitaʻi o le lalolagi, ua faateʻia ai le sosaiete o tagata. Ona o taʻaiga i lenei tulaga, ua toʻatele ai tagata ua lē manatu mamafa i lo latou faailoaina mai o le mea moni. I nisi o atunuu, ua oo ina avea le pepelo ma uiga masani. Na faitio mai se tasi tamaʻitaʻi faatauoloa e faapea: “Na totogiina aʻu ina ia ou pepelo. Ua ou manumalo i tauvaga o fefaatauaʻiga ma e matuā viiviia lava aʻu e oʻu pule pe a latou iloiloina laʻu galuega fai i tausaga taʻitasi pe a ou pepelo. . . . E foliga mai ua avea le pepelo ma autū o aʻoaʻoga i le auala e faatauina atu ai oloa o loo faia i vaipanoa uma lava.” E talitonu le toʻatele e faapea, e leai lava se afaina tele i mea ua taʻua o pepelo papaʻe laiti. Pe moni ea lenei mea? Pe e iai ni taimi e lē afaina ai mo se Kerisiano pe a faia se talapepelo?

Tapulaa Maualuluga a le Tusi Paia

E matuā taʻusalaina malosi e le Tusi Paia ituaiga uma lava o pepelo. Ua taʻutino mai e le faisalamo e faapea: “E fano ia te oe [le Atua] o e tala pepelo.” (Salamo 5:6; tagaʻi i le Faaaliga 22:15.) I le Faataoto 6:16-19, ua lisiina mai ai e le Tusi Paia ia mea e fitu e inosia e Ieova. Ua faamatilatila mai ai lava i lenei lisi “le laulaufaiva pepelo,” ma “le molimau pepelo, na te tautala i mea pepelo.” Aiseā? Auā e ʻinoʻino Ieova i le leaga e faapogaia e ni tala pepelo. O le tasi lenei o māfuaaga na taʻua ai e Iesu ia Satani o le pepelo ma o le fasioti tagata. O ana tala pepelo ua tofu atu ai le fanau a tagata i le  malaia ma le oti.—Kenese 3:4, 5; Ioane 8:44; Roma 5:12.

I le matuiā o le silasila a Ieova i le tala pepelo, o loo faamatilatila mai i le mea na tupu ia Anania ma Safaira. Na pepelo ma le loto i ai le toʻalua lenei i le ʻauaposetolo i se taumafaiga na faafoliga atu e sili ona agalelei na i lo o le tulaga moni. Sa la fuafua lelei ma mafaufau muamua i a la gaoioiga. I lea na faalauiloa atu ai e le aposetolo o Peteru e faapea: “Ua e le pepelo i tagata, a o le Atua.” Ona o lenei mea, na feoti ai i laua uma i le aao o le Atua.—Galuega 5:1-10.

I tausaga mulimuli ane, na apoapoaʻi atu ai le aposetolo o Paulo i Kerisiano e faapea: “Aua le fetaupelopeloai.” (Kolose 3:9) E matuā tāua faapitoa lava lenei apoapoaʻiga i le faapotopotoga Kerisiano. Na fetalai Iesu e faapea o le alofa e faavae i mataupu silisili o le a avea ma faailoga e iloa ai ona soo moni. (Ioane 13:34, 35) O lena alofa lē faatagāfai e mafai ona tupu ma olaola i na o se siʻomaga e matuā faamaoni atoatoa ma maufaatuatuaina. E faigatā tele ona alofa i se tasi pe afai e tatou te lē mautinoa o le a ia tautala i le mea moni ia i tatou i taimi uma.

A o taʻusalaina pepelo uma, e sili atu lava ona matuiā isi pepelo i lo o isi. Mo se faaaʻoaʻoga, atonu e pepelo se tasi ona o le maasiasi po o le fefe. O le isi e faia se pepelo leaga ma le manatu e faaafaina pe faamanuʻalia ai se tasi. Ona o ona uunaʻiga leaga, o ia pepelo e faia ma le loto i ai, e mafai ona lamatia ai isi ma o le a faateʻaina ai o ia mai le faapotopotoga pe afai e lē salamō. Talu ai e lē o pepelo uma na faagaeeina ona o ni faalogona leaga, e tatau la ona faaeteete ina ia aua neʻi taʻusalaina ma le lē tatau, ae ia faamautinoa ua iloa e se tasi mea moni uma o loo aafia ai pe a fai atu e se tasi se pepelo. E tatau ona iloiloina uunaʻiga ma tulaga o loo iai atonu e mafai ona aafia ai gaoioiga.—Iakopo 2:13.

“Ia Atamamai e Pei o Gata”

O le mea moni, o le faamaoni, e lē o lona uiga ua avea ma o tatou tiute tauave le faailoa atu o faamatalaga uma i so o se tasi e fesili mai ia i tatou. Na lapataʻi mai Iesu i le Mataio 7:6: “Aua tou te avatu le mea paia i ulī; aua foi tou te lafo a outou penina i luma o puaa, neʻi latou . . . liliu mai, i le saeia ai outou.” Mo se faaaʻoaʻoga, o tagata e iai faanaunauga leaga, atonu e leai se aiā e iloa ai fua nisi o mea patino. Ua malamalama Kerisiano o loo latou ola i se lalolagi tetee. O lea na lapataʻi atu ai Iesu i ona soo ina ia “atamamai e pei o gata” ae “ia fifilemu e pei o lupe.” (Mataio 10:16; Ioane 15:19) Sa leʻi faailoa atu e Iesu i taimi uma le upu moni atoatoa, ae maise pe a faaali atu mea moni uma e ono aumaia ai se lamatiaga sa lē tatau ai ia te ia po o ona soo. Ae e oo lava i taimi faapena, sa lē pepelo ai Iesu. Na i lo o lea, sa ia filifili ai e lē fai atu se tala pe sui le talanoaga i se isi mataupu.—Mataio 15:1-6; 21:23-27; Ioane 7:3-10.

O tane ma fafine faamaoni ia o loo taʻua i le Tusi Paia, e pei o Aperaamo, Isaako, Raava ma Tavita, sa faapena foʻi ona faautauta ma atamamai pe a feutagaʻi ma ē sa ono avea ma fili. (Kenese 20:11-13; 26:9; Iosua 2:1-6; 1 Samuelu 21:10-14) Ua faavasegaina e le Tusi Paia tane ma fafine faapena o ni tagata tapuaʻi faamaoni o ē sa iloga o latou olaga i le usiusitaʻi. O lea la ua onomea ma tatau ai ona faataʻitaʻi ia i latou.—Roma 15:4; Eperu 11:8-10, 20, 31, 32-39.

Atonu e iai taimi e foliga mai e avea ai le pepelo ma auala faigofie e foia ai se mataupu. Ae e sili ona lelei mo Kerisiano i aso nei ona faataʻitaʻi i le auala a Iesu ma mulimuli i o latou lotofuatiaifo ua aʻoaʻoina e le Tusi Paia pe a fesagaʻi ma ni tulaga faigatā lava.—Eperu 5:14.

Ua faalaeiauina i tatou e le Tusi Paia ina ia tautala i le upu moni ma ia faamaoni. E sesē le pepelo ma e ao ona tatou mulimuli i le fautuaga a le Tusi Paia e faapea: “Ia tautalatala faamaoni taitasi ma lē la te tuaoi.” (Efeso 4:25) O le faia faapea, o le a tatou tausia ai se lotofuatiaifo mamā, faaauilumaina ai le filemu ma le alofa i le faapotopotoga, ma faaauau ona āva i “le Atua faamaoni.”—Salamo 31:5; Eperu 13:18.

[Ata i le itulau 22]

Na leiloa ola o Anania ma Safaira ona o pepelo