O le ā le Uiga o Nei Mea Uma?

PE ANA fai sa e vaʻiliʻilia tapulaa o amioga i ni tausaga e leʻi mamao tele atu, semanū e te silafia ai se āʻega manino lava. E aunoa ma se masalomia, ua matuā manatu faatauvaa se aofaʻiga tele o tagata i tapulaa o amioga. O le ā ua faaatagia moni mai e lenei mea?

Po o lona uiga ea, e pei ona taʻua e nisi tagata, o lo tatou olaga atoa ma le fanau uma a tagata ua matuā malapagā lava, ua toe ā ina faatamaʻia aʻiaʻi? Po o le mea ea, o na suiga ua na o se vaega o le olaga masani ma le fesuisuiaʻi o loo iai le faagasologa o talafaasolopito?

O le manatu mulimuli na taʻua e tau i ai mafaufau o le toʻatele o tagata. Latou te vaai i le paʻū maulalo o amioga i o tatou taimi ua na o se isi lava āʻega, mai le tele o āʻega o loo fai mai ma toe mou atu i le faagasologa o talafaasolopito. E maumauaʻi lava lo latou talitonuga faapea, o le tulaga fesuisuiaʻi lea e iai nei e toeitiiti foʻi ona toe suia lea i le mea na iai muamua ma toe foʻi ai i tapulaa e sili atu ona maualuluga tau amio. Pe o saʻo ea latou?

“O Aso e Gata Ai”

Seʻi tatou iloiloina mea moni e tusa ai o faamatalaga a se tusi ua faitau fia senituri o taliaina lautele e avea ma taʻiala i mataupu o amioga—le Afioga a le Atua, le Tusi Paia. E matuā manino lava pe a faatusatusa atu le tulaga o le lalolagi i aso nei ma le faamatalaga faavaloaga o loo taʻua e le Tusi Paia e faatatau i le vaitaimi sili ona mataʻutia i le talafaasolopito o tagata. O le vaitaimi lenei o loo taʻua faapea “o aso e gata ai” po o “le faaiʻuiʻuga o le faiga o mea.” (2 Timoteo 3:1; Mataio 24:3, NW) E pei ona faaalia i nei taʻu, o lenei vaitaimi e faailogaina ai le iʻuga mautinoa o se vaitaimi ma le amataga mai o se isi vaitaimi fou.

Na valoia e le Afioga a le Atua faapea o le a faailogaina aso e gata ai i “taimi faigata.” Ina ia faafaigofie mo tagata mataala o loo mātauina mea ona latou iloa aso e gata ai, ua aumaia ai e le Tusi Paia le tele o ni auiliiliga, pe a tuufaatasia, ona saunia ai lea o se faamatalaga manino po o se faailoga tuufaatasi, o lenei vaitaimi tutasi.

Uiga Leaga i Tagata

Seʻi mātau se tasi o vala o lenei faailoga ua taatele i aso nei: ʻO tagata o le a peiseai ua amio Atua, a o le mana ua i lea mea ua latou teena.’ (2 Timoteo 3:2, 5, LT) E leai lava se isi vaitaimi i le talafaasolopito ua faamatalaina i ni uiga lē faalelotu e sili ona malolosi ma sili ona maumauaʻi faapenei. Ua taatele le teena o le avea o le Atua ma pule e toʻatasi, ma o le toʻatele o tagata latou te lē taliaina le Tusi Paia faapea ua na o lea le puna o upu moni. O le mea moni, o loo iai pea lotu, peitaʻi o le tele o na lotu e itiiti lava ni aafiaga o maua mai ai. Ua na ona faafoliga mai.

Ua taʻua e le Tusi Paia le isi vala o le faailoga: “E avea tagata ma e . . . e le taofi manao o le tino, o e faasaua,” ma ua “maalili foi le alofa o le toatele o tagata, ona ua tupu tele o le amio leaga.” (2 Timoteo 3:2, 3; Mataio 24:12, LF) O le upu Eleni ua faaliliuina mo le “faasaua” o se tasi o ona uiga, “o le leai o se tigā alofa ma ni faalogona faaletagata.” I aso nei, ua faasolosolo ifo pea lava pea le laiti o tamaiti o loo faaalia uiga “faasaua” ma ua matuā uaʻi atu i solitulafono o faiga sauā.

E lē gata i lea, o le saosaoa o le tuputupu aʻe o atamai tau i masini faaonaponei ma atinaʻe tau tamaoaiga, ma le matapeʻapeʻa ua aumaia e nei mea, ua faapogaia ai le tele ma le anoanoaʻi o tagata ua latou lafoaʻia mea sa latou faatāuaina i aso anamua. Ona ua leai se faaaloalo mo isi, latou te faaaogā ai so o se auala e mafai, e tusa lava pe lē faamaoni ai, ina ia maua ni  mea se tele latou te mafai e faamalie ai o latou faanaunauga manatu faapito. O le faateleina o taaloga pelētupe o le isi lena faamaoniga o le manatu faapito, ma o faamaumauga o soligātulafono i ni nai sefulu tausaga ua tuanaʻi atu e matuā fofola manino mai ai lenei mea.

O se vala o loo sili ona taatele i o tatou taimi o lenei: “E avea tagata ma e . . . ua tele le manao i mea faafiafia a e leai se manao i le Atua.” (2 Timoteo 3:2, 4) O se faaaʻoaʻoga o lenei mea o tagata e mananaʻo i le faamalieina o faalogona faaleituaiga, ae lē o mananaʻo i le tiute tauave o le nonofo ma se paaga faaipoipo se toʻatasi i le olaga atoa. O le iʻuga, ua pei ai o se taifanaʻe le tele o faiā faaleaiga malepelepe, o fanau e ola lē fiafia ma leai ni o latou lagona māfana i o latou aiga, o mātua nofo toʻatasi, ma faamaʻi pipisi ona o feusuaʻiga lē mamā.

O le isi vala o le faailoga e faapea, “e avea tagata ma e alolofa i latou ia i latou, o e mananao i tupe.” (2 Timoteo 3:2) E tusa ai o se faamatalaga a le mekasini Siamani o le Die Zeit, “o le uunaʻiga autū o le [tamaoaiga i aso nei] o le manatu faapito.” Ua sili atu na i lo se isi lava taimi, ona avea le saʻilia o tupe ma mea e sili ona tāua i olaga o le toʻatele o tagata. I lenei saʻiliga manatu faapito, ua lē amanaʻia ai isi mea e ao ona faatāua.

Mea Tutupu i le Lalolagi

E lē gata i le faamatalaina o le malepe o tulaga tāua faaletagata, ae ua valoia foʻi e le Tusi Paia le faailogaina o aso e gata ai i suiga tetele mataʻutia o le a aafia ai le aiga faaletagata. Mo se faaaʻoaʻoga ua faapea mai, “e sii le taua e le tasi nuu i le tasi nuu, ma le tasi malo i le tasi malo. E i ai mafuie tetele i lea mea ma lea mea, o oge foi, ma faamai.”—Luka 21:10, 11.

E leai lava se isi vaitaimi i le talafaasolopito e tutusa ma le 20 senituri, i le anoanoaʻi o tagata ua aafia i le tele o mala mataʻutia i le lalolagi i totonu o se vaitaimi puupuu. Mo se faataʻitaʻiga, e silia ma le 100 miliona tagata na fasiotia i  taua i lena vaitaimi, o se fuainumera e tele taimi e sili atu ai na i lo le aofaʻi o tagata na maliliu i taua i le tele o ni senituri ua mavae atu pe a tuufaatasi. Na aumaia e le 20 senituri ia i tatou taua e lua e matuā eseese lava mai isi fetauaʻiga ia sa taʻua faapea o taua a le lalolagi. Sa leʻi tutupu muamua lava ni fetauaʻiga i le lalolagi aoao e pei o nei taua.

Se Uunaʻiga Leaga

Ua faaalia foʻi e le Tusi Paia le iai o se foafoaga malosi ma o se foafoaga agaga leaga, o lē “ua igoa i le tiapolo, i le ma Satani,” o lana fuafuaga ina ia maileia ese tagata mai mea moni e tatau ona faatāua ae uunaʻi i latou i faiga leaga tau amio. Ua faapea mai, a o faagasolo aso e gata ai, e sau o ia i le lalolagi, “ua lotoa tele, auā ua na iloa ua saasaa ona po.”—Faaaliga 12:9, 12.

Ua faamatalaina le Tiapolo i le Tusi Paia faapea o “le taʻitaʻi o le au faipule i le va nimonimo, o le agaga lea o loo matuā galue nei i e ua faalogogata.” (Efeso 2:2) E faasino atu lenei mea i le faatinoina e le Tiapolo o sana taaʻiga sili ona malosi i le toʻatele o tagata, e masani lava ona ia faia e aunoa ma lo latou iloa, e pei lava ona lē mafai i nisi taimi ona tatou iloa atu mea o loo faaleagaina ai le ea.

Mo se faaaʻoaʻoga, ua vaaia taaʻiga a Satani i le tele o ala faaonaponei o fesootaʻiga: vitiō, tifaga, televise, le Initineti, faasalalauga, tusi, mekasini, ma nusipepa. O le tele o na mea, aemaise lava mea o loo taulaʻi atu i nai talavou o loo lē mataala, ua matuā tumu i uiga mataʻutia ma le matagā, e pei o le faailogalanu, o saʻiliʻiliga i faiga faataulaitu, o amioga lē mamā, ma faiga sili ona sauā.

E toʻatele tagata lotofaamaoni ua faateʻia i le tutusa o le faamatalaga o loo aumaia e le Tusi Paia e faatatau i aso e gata ai, ma tulaga moni lava o loo tutupu i le lalolagi i o tatou aso. E moni, sa iai ni mea tutupu i le talafaasolopito a o leʻi oo mai i le 20 senituri lea e tau foliga e toeitiiti fetaui lelei ma le faamatalaga a le Tusi Paia. Peitaʻi, o le faagasologa tonu lava o le senituri lona 20, ma le senituri lona 21 lenei, ua mafai ona mātauina ai le faataunuuina o vala uma o le faailoga.

Le Talutalu Fou o Loo Fotuaʻi Mai

E leai lava se tasi e saʻo, o i latou ia e talitonu faapea o le a faaumatia le fanau a tagata po o i latou foʻi e faapea mai o le a faaauau pea ona iai mea i le tulaga o loo iai nei. Na i lo lea, ua manino le faailoa mai e le Tusi Paia faapea, o le faiga o mea a lenei lalolagi o loo puleaina le lalolagi o le a suia i se mea e fou atoatoa.

Ina ua mavae ona lisi mai e Iesu vala o le faailoga o aso e gata ai, ona ia fetalai lea: “Ia faapea foi outou, pe a iloa e outou ia mea ua faia, ia outou iloa ua latalata le malo o le Atua.” (Luka 21:31) O le Malo faalelagi o le Atua o le matua autū lena o le talaʻiga a Iesu. (Mataio 6:9, 10) Ma na tofia o ia e le Atua e avea ma Tupu o lenei Malo, le faiga malo lea ua toe o se āga ona pule lea i le lalolagi aoao.—Luka 8:1; Faaaliga 11:15; 20:1-6.

I le iʻuga o aso e gata ai, o le a soloiesea ai e le Malo faalelagi o le Atua, e ala mai ia Keriso, i latou uma o fai mona fili—le Tiapolo ma i latou e lagolagoina o ia—ma suia le sosaiete amio lē mamā o loo iai nei i se lalolagi fou amiotonu. (Tanielu 2:44) I lenei lalolagi fou, o le a olioli ai tagata e saʻo o latou loto i le ola e faavavau i se lalolagi ua liua e avea ma parataiso.—Luka 23:43; 2 Peteru 3:13; Faaaliga 21:3, 4.

O i latou o loo ʻinoʻino i le tulaga paʻū maulalo o amioga i aso nei ma latou iloa ua faataunuuina le faailoga tuufaatasi o aso e gata ai e ala i mea o tutupu nei, e mafai ona latou tulimataʻi atu i se lumanaʻi ofoofogia. O lea tatou te faafetaia ai le Atua e Ona le Malosi Uma Lava, o loo tausia maia i tatou ma ua iai sana fuafuaga mamalu mo lana foafoaga, le lalolagi.—Salamo 37:10, 11, 29; 1 Peteru 5:6, 7.

E valaaulia oe e Molimau a Ieova ina ia e aʻoaʻoina atili nisi mea e uiga i le peresona alofa, o Lē na Foafoaina i tatou, faapea le faamoemoe o le ola i se lalolagi mamā tau amio, lea ua ia faataatia mai mo tagata uma e saʻili atu ia te ia. E pei ona faapea mai le Tusi Paia, “o le uiga lenei o le ola e faavavau, ia latou mauaina pea le poto e uiga ia te oe, le Atua moni e toʻatasi, ma lē ua e auina mai, o Iesu Keriso lea.”—Ioane 17:3, NW.

[Ata i le itulau 10]

O le a olioli tagata e saʻo o latou loto i le ola e faavavau i le lalolagi parataiso